Abril 5, 2021
Lunes sulod sa Oktaba sa Pasko sa Pagkabanhaw
Mga Pagbasa Karong Adlawa
Paminaw sa Iningles
Ang mga pangulong pari nagtigom uban sa mga anciano ug nagsabot-sabot; unya gihatagan nila ang mga sundalo og dakong kantidad sa salapi ug giingnan sila, “Isulti ninyo, ‘Mianhi ang Iyang mga tinun-an sa kagabhion ug gikawat Siya samtang nangatulog kami.’ Ug kon makaabot kini sa gobernador, kami nay mokombinsir kaniya ug manalipod kaninyo batok sa bisan unsang kasamok.” Mateo 28:12–14
Ang Ginoo sa tanan nabanhaw gikan sa lubnganan, nagbuntog sa sala ug kamatayon, aron kitang tanan makaambit sa Iyang mahimayaong Pagkabanhaw! Napildi ang kamatayon. Napildi si Satanas. Napildi ang mga dunot nga pangulo sa relihiyon. Ug ang tanan nga mituo kang Jesus nabag-o na ang ilang paglaom sa kinabuhing dayon. Apan makapasubo nga ang labing dakong kadaugan nga nasinati sukad sa katawhan, usa ka kadaugan nga nag-abli sa mga pultahan ngadto sa walay kataposang himaya alang sa tanang motuo, wala madawat sa mga pangulong pari ug mga anciano sa katawhan. Sila ang nagsiguro nga mamatay Siya, ug karon nga nabanhaw na Siya, nagdali-dali sila sa pagbuhat sa tanan nilang mahimo aron matago kana nga kamatuoran.
Lisod buntogon ang garbo. Kon ang usa ka tawo moinsistir nga husto siya bisan sa pagkatinuod sayop siya, ug unya ipaatubang kaniya ang iyang sayop, ang sala sa garbo dili kalikayang motental kaniya sa pagpakasala pa. Mao kini ang atong makita karon niining bahin sa atong Ebanghelyo. Gisultihan sa mga sundalo ang mga pangulong pari ug mga anciano nga sa pag-abot sa mga babaye sa lubnganan sayo sa buntag, adunay kusog nga linog, ug nakita nila ang usa ka anghel sa Ginoo nga mikunsad gikan sa Langit, mipaligid sa bato, ug milingkod niini. Sa dihang nakita nila kini, “Ang mga guwardiya nangurog sa kahadlok kaniya ug nahimong daw mga patay” (Mateo 28:4). Ug human nila madungog ang anghel nga nagsulti sa mga babaye nga nabanhaw na si Jesus, milakaw ang mga guwardiya aron isulti kini sa mga pangulong pari ug mga anciano.
Human sa tanang milagro ug gamhanang pagwali ni Jesus, magdahom ka unta nga mituo na ang mga pangulong pari ug mga anciano. Apan wala sila motuo. Ug unya, human makadungog sa pamatuod niining mga sundalo, magdahom ka unta nga nangluhod sila, naghinulsol sa kagahi sa ilang mga kasingkasing, ug mituo. Apan wala gihapon sila motuo. Hinuon, mas migahi pa sila sa ilang pagpakasala ug midugang og sala ibabaw sa sala.
Adunay mga matang sa sala nga mas sayon ang pag-angkon, ilabina ang mga sala tungod sa kahuyang. Kon ang usa ka tawo huyang ug mahulog sa sala, tingali dili kanunay sayon ang pagbuntog nianang salaa sa umaabot, apan mas sayon ang pag-ila niini isip sala kon kini naggikan sa tawhanong kahuyang. Apan ang sala tungod sa kahuyang lahi kaayo sa sala tungod sa gahi og ulo nga garbo. Ang gahi og ulo nga garbo dili lamang lisod buntogon, lisod usab kining angkonon. Lisod ang pag-angkon sa atong sala kon kini nakagamot sa atong pagkagahi og ulo ug garbo. Tungod niini, kining matanga sa sala sagad mosangpot sa ubang mga sala sama sa padayong pagpanglimbong, pagmaniobra sa uban, ug kasuko. Makita kini niining mga pangulong pari ug mga anciano. Apan kon makapaubos ka sa imong kaugalingon ug makaangkon sa imong sala nga naggikan sa imong garbo, kana nga pagkamapainubsanon mahimong adunay gamhanang epekto nga makausab sa imong kinabuhi.
Pamalandongi karong adlawa kining mga pangulong pari ug mga anciano sa katawhan. Sulayi sa pagpamalandong ang kagahi sa ilang kasingkasing ug ang makapasubong kahimtang nga ilang nasudlan samtang naningkamot sila sa pagtabon sa ilang sayop ug sala. Paglig-on sa imong tinguha nga dili gayod mahulog niining matanga sa sala. Apan, kon nakigbisog ka niini, paningkamoti nga magmapainubsanon aron mapahigawas ka niining bug-at nga palas-anon pinaagi sa grasya sa Pagkabanhaw sa atong Ginoo.
Ginoo kong nabanhaw, gibuntog Mo ang sala ug kamatayon ug gihatagan Mo og bag-ong kinabuhi ang tanan nga nagtuo Kanimo. Hinigugma kong Hesus, hatagi ako sa grasya nga dili gayod nako tugotan ang akong sala sa garbo nga mahimong babag sa akong pagdawat sa mahimayaong buhat nga gusto Nimong himoon aron mabag-o ang akong kinabuhi. Palihog hatagi ako sa gasa sa pagpaubos aron kanunay kong talikdan ang akong sala ug modangop Kanimo. Hesus, misalig ako Kanimo.
Mga Libro para sa Pasko sa Pagkabanhaw!

Adlaw-adlaw nga Katolikong mga Pamalandong:
Panahon sa Pasko sa Pagkabanhaw 2021
Adlaw-adlaw nga mga Pamalandong sa Diyosnong Kaluoy:
365 ka Adlaw Uban ni Santa Faustina
Mga Pag-ampo sa Pasko sa Pagkabanhaw
Ikaupat nga Adlaw: Nobena sa pagpangandam alang sa Domingo sa Balaang Kalooy
Dugang nga mga Pamalandong sa Ebanghelyo
Mga Pamalandong sa Diosnong Kalooy
Rosaryo – Mga Misteryo sa Himaya (uban sa Balaang Kasulatan)
Adlaw-adlaw nga mga Pamalandong sa Diosnong Kalooy
Litaniya sa Diosnong Kalooy ni Santa Faustina
Pag-ampo alang sa Tuig sa Kalooy
Santos sa Adlaw – San Vicente Ferrer, Pari
(Dili saulogon isip liturhikanhong handomanan karong tuiga kay natunong kini sa Oktaba sa Pasko sa Pagkabanhaw)
Mga Kapilian sa mga Basahon sa Misa
Hulagway sa ibabaw: Ang Pagkabanhaw ni Piero della Francesca





