Cebuano

Ayaw Kahadlok

Abril 17, 2021
Sabado sa Ikaduhang Semana sa Pasko sa Pagkabanhaw
Mga Basahon alang sa Adlawng Karon

Bidyo

Paminaw sa Iningles

Sa dihang nakabugsay na sila og mga tulo o upat ka milya, nakita nila si Jesus nga naglakaw ibabaw sa dagat ug nagkaduol sa sakayan, ug nangahadlok sila. Apan miingon Siya kanila, “Ako kini. Ayaw kamo kahadlok.”  Juan 6:19–20

Niadtong Oktubre 22, 1978, si Papa San Juan Pablo II pormal nga misugod sa iyang katungdanan isip ika-264 nga Santo Papa sa atong Balaang Simbahan. Sa iyang homiliya, miingon ang Santo Papa, “Mga igsoon, ayaw kamo kahadlok sa pagdawat kang Kristo ug sa Iyang gahom.” Ang mga pulong nga “Ayaw kahadlok” gibalikbalik sa tibuok niyang pontipikado. Sa iyang libro nga Crossing the Threshold of Hope, nga gisulat isip pagpangandam alang sa bag-ong milenyo, gipasabot sa Santo Papa ang mosunod: “Sa dihang gilitok ko kining mga pulonga sa Plasa ni San Pedro, nasayod na ako nga ang akong unang ensiklika ug ang tibuok nakong pagkapapa madugtong sa kamatuoran sa Pagtubos. Diha sa Pagtubos atong makaplagan ang labing lawom nga sukaranan sa mga pulong nga ‘Ayaw kahadlok!’: ‘Kay gihigugma pag-ayo sa Diyos ang kalibotan nga Iyang gihatag ang Iyang bugtong Anak’ (itandi sa Jn 3:16).

Kining pag-awhag nga dili mahadlok gibalikbalik sa daghang higayon sa tibuok Bibliya. Makaplagan kini sa Daang Tugon sa nagkalainlaing pahayag kapin sa usa ka gatos ka higayon, ug sa Bag-ong Tugon kapin sa kalim-an ka higayon. Sa makadaghan, buot sa Diyos nga mabuntog nato ang kahadlok, kabalaka, ug kakulba. Buot Niya nga mosalig kita Kaniya sa tanang butang ug ibutang nato ang tanan natong paglaom diha Kaniya.

Unsa ang labing imong gikahadlokan sa kinabuhi? Alang sa uban, matag adlaw silang makasinati og kahadlok. Tingali nag-atubang ka og kawalay kasigurohan sa pinansiya, dili maayong panglawas, nabungkag nga relasyon, mga kalisdanan sa sikolohikal nga kahimtang, ug uban pa. Daghan kaayong butang sa kinabuhi nga daling makatintal kanato sa pagkahadlok.

Sa Ebanghelyo karon, si Jesus naglakaw ibabaw sa tubig paingon sa Iyang mga tinun-an samtang nagbalod pag-ayo ang Dagat sa Galilea. Kusog ang hangin, ug makapabalaka ang mga balod. Bisan tuod daghan na kaayong gabii nga kining mga mangingisda didto sa dagat, gipili ni Jesus nga moduol kanila niadtong higayona, dili kaayo aron tabangan sila sa pag-abot sa baybayon, kondili aron tudloan kitang tanan nga bisan unsang “unos” ang atong atubangon sa kinabuhi, anaa Siya uban kanato sa mga paagi nga tinuod nga milagroso. Wala gayoy usa sa mga tinun-an nga nagdahom nga makita si Jesus nga maglakaw ibabaw sa tubig sa tungang gabii samtang ang mga balod naghapak sa ilang sakayan. Apan gibuhat kini ni Jesus ug miingon, “Ayaw kamo kahadlok,” kay gusto Niyang masayod kita nga bisan unsa pa ang atong ginaagihan sa kinabuhi, anaa Siya kanunay, nagaduol kanato uban sa gugma, ug luwas kitang dad-on ngadto sa baybayon sa Iyang kalinaw.

Kon ikaw mismo nakigbisog sa kahadlok, itutok ang imong panan-aw sa kamatuoran sa Pagtubos. Gipadala sa Amahan ang Anak nganhi sa kalibotan aron luwason ka. Si Jesus wala lamang moanhi aron magtudlo, o magdasig, o motabang. Mianhi Siya aron moluwas. Aron motubos. Aron laglagon ang kamatayon, kahadlok, sala, ug ang tanan nga nagpahilayo kanato gikan sa Amahan. Ang Iyang makaluwas nga buhat nag-usab sa katawhan hangtod sa kahangtoran. Kon nasabtan ug gituohan mo kana, walay bisan unsa nga makailog sa imong kalinaw ug makapuno kanimo sa kahadlok.

Pamalandongi karong adlawa kining mubo apan gamhanang mga pulong: “Ayaw kahadlok!” Handurawa nga anaa ka sa sakayan uban sa mga tinun-an sa kagabhion, gitabyogtabyog sa mga balod, ug gilibotan sa kangitngit. Unya tan-awa si Jesus nga nagaduol kanimo ug nagasulti niining mga pulonga. Hibaloi nga Iyang gisulti kini kanimo sa labing mangitngit nga mga higayon sa imong kinabuhi ug nga dili ka gayod Niya biyaan. Paglaom diha Kaniya ug tugoti nga ang Iyang makaluwas nga buhat sa Pagtubos magbag-o sa imong kinabuhi hangtod sa kahangtoran.

Jesus, akong Manunubos, nagpasalamat ako Kanimo sa Imong pag-anhi niining kalibotana aron sa pagluwas kanamo. Salamat sa gasa sa Pagtubos sa kalibotan. Sa dihang matintal ako nga mahadlok ug motutok sa mga kalisdanan sa kalibotan, hatagi ako sa grasya nga akong gikinahanglan aron modangop Kanimo uban sa paglaom ug pagsalig. Sulori ang mga unos sa akong kinabuhi, hinigugmang Ginoo, ug kuhaa ang akong palas-anon sa kahadlok. Jesus, nagsalig ako Kanimo.

Mga Pag-ampo sa Pasko sa Pagkabanhaw

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Mga hulagway sa ibabaw: Si Jesus nga Naglakaw Ibabaw sa Dagat sa Galilea, obra nila Paul Bril ug Frederik van Valckenborch


Mga Libro alang sa Panahon sa Pasko sa Pagkabanhaw

Adlaw-adlaw nga Katolikong mga Pamalandong:
Panahon sa Pasko sa Pagkabanhaw 2021

Adlaw-adlaw nga mga Pamalandong sa Diyosnong Kalooy:
365 ka Adlaw Uban ni Santa Faustina