Pagkaon alang sa Kahangtoran

April 19, 2021
Monday of the Third Week of Easter
Readings for Today

Paminaw sa Iningles

“Rabbi, when did you get here?” Jesus answered them and said, “Amen, amen, I say to you, you are looking for me not because you saw signs but because you ate the loaves and were filled. Do not work for food that perishes but for the food that endures for eternal life, which the Son of Man will give you. John 6:25–27

Unsa man ang imong gipaninguhaan sa kinabuhi? Ang mga butang nga sa kataposan mahanaw ra? O ang mga butang nga molungtad sa kahangtoran? Kini usa ka importanteng pangutana nga angay tubagon sa kinasingkasing. Kasagaran kaayo, gigugol nato ang dakong bahin sa atong kinabuhi, panahon, ug kusog sa mga butang nga gamay rag bili alang sa kahangtoran.

Sa adlaw sa wala pa ang panag-istoryahang gikutlo sa ibabaw, gipadaghan ni Hesus ang mga tinapay ug isda ug gipakaon ang lima ka libo ka panimalay. Dako kaayo ang katingala sa mga tawo nga sa pagkasunod adlaw, sa dihang gigutom na usab sila, nangita sila kang Hesus ug nakaplagan nila Siya sa pikas daplin sa lanaw. Siyempre, nasabtan dayon ni Hesus ang kahimtang. Nasayod Siya nga ang panon sa mga tawo nga nakakaplag Kaniya mas interesado sa laing pagkaon kay sa espirituhanong pagkaon nga molungtad sa kahangtoran. Busa, sa malumo nga paagi, gigamit ni Hesus kini nga higayon sa paghatag kanila niining mubo nga pagtulon-an mahitungod sa labing importante. Ang “pagkaong molungtad ngadto sa kinabuhing dayon” mao gayod ang pagtuo kang Hesus.

Hunahunaa nga usa ka sa mga tawo nga nakasaksi mismo sa milagro sa pagpadaghan sa mga tinapay ug isda. Unsa kaha kadako ang epekto niini kanimo? Makapadani kaha kini kanimo ngadto sa lawom nga pagtuo kang Hesus, ang Anak sa Diyos? O mas makadayeg ka kaha sa libre ug milagrosong pagkaon? Ang makapainteres mao nga gipakaon ni Hesus ang lima ka libo sa dihang wala nila kini damha ug wala nila kini pangandoya. Apan sa dihang mibalik sila pagkasunod adlaw nga nagpaabot ug nangandoy niini, mibalibad Siya. Midumili si Hesus sa pagbuhat og laing milagro kay gusto Niya nga molawom ang pagsabot sa mga tawo sa kamatuoran nga walay kataposan.

Sa atong kaugalingong kinabuhi, kasagarang lisod ang pagpuyo nga nag-una sa mas lawom ug walay kataposang kamatuoran. Sayon ra nga ipunting ang atong mga mata sa taphaw ug dili kaayo importanteng mga bahin sa kinabuhi. Unsaon nako pagpangitag mas daghang kuwarta? O pagpalit og bag-ong sakyanan? O pagkaon og mas lami ug mas mahalong putahe? Unsaon nako paglingaw sa akong kaugalingon og mas maayo? Unsang bag-ong sinina ang angay nakong paliton? Ug daghan pa. Siyempre, walay daotan niining mga butanga sa ilang kaugalingon, apan kining tanan lumalabay ug walay epekto sa atong kalag nga molungtad sa kahangtoran. Ug sa pagkatinuod, kon hatagan nato og sobra nga pagtagad ang taphaw ug dili kaayo importanteng mga bahin sa kinabuhi, makapalinga kini kanato gikan sa labing importante.

Pamalandongi karong adlawa kining hagit ni Hesus. Ayaw pagpaningkamot alang sa mga butang nga mahanaw; paningkamot alang sa mga butang nga molungtad sa kahangtoran. Susiha ang imong mga prayoridad sa kinabuhi. Asa man nakapunting ang imong pagtagad? Unsa man ang labing gikabalak-an nimo matag adlaw? Hinaot nga ang imong labing dakong gikabalak-an mao ang pagpalawom sa imong pagtuo sa Anak sa Diyos. Hinaot nga mao kini ang pagkinabuhi sa gugma nga walay kataposan. Kon matinud-anon nimong susihon ang imong kinabuhi ug ang imong mga tumong ug makita nimo nga sobra ra ka nga nabalaka sa mga butang niining kalibotana, tugoti kining mga pulong sa atong Ginoo nga direktang mosulti kanimo aron makatigom ka og mga bahandi alang sa kinabuhing dayon.

Labing mahimayaon kong Ginoo, Ikaw ang Pagkaon nga walay kataposan. Ikaw ang Pagkaon alang sa kinabuhing dayon. Hatagi ako sa kaalam nga akong gikinahanglan, hinigugma kong Ginoo, aron iliso ko ang akong mga mata gikan sa lumalabay ug labing dili mahinungdanong mga butang niining kalibotana ug ipunting hinuon kini sa mga butang nga walay kataposan. Hinaot nga magpabilin ang akong mga mata diha Kanimo ug mabusog ako pinaagi sa akong pagtuo Kanimo. Hesus, misalig ako Kanimo.

Mga Pag-ampo alang sa Pasko sa Pagkabanhaw

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Featured image above: Sermon on the Mount By Cosimo Rosselli