Cebuano

Ang Yano nga Dalan Padulong sa Talagsaon

Sabado, Mayo 1, 2021

Opsyonal nga Paghandum kang San Jose nga Mamumuo

Mga Pagbasa Karong Adlawa

Bidyo

Paminaw sa Iningles

Miabot si Jesus sa iyang kaugalingong lungsod ug nagtudlo sa mga tawo didto sa ilang sinagoga. Nanghitingala sila ug miingon, “Diin man kuhaa niining tawhana kining maong kaalam ug mga buhat nga gamhanan? Dili ba kini siya ang anak sa panday?” Mateo 13:54–55

Niadtong Disyembre 8, 2020, gipahibalo ni Papa Francisco ang pagsugod sa pagsaulog sa tibuok Simbahan sa “Tuig ni San Jose,” nga matapos sa Disyembre 8, 2021. Gipaila niya kining tuiga pinaagi sa usa ka Apostolikong Sulat nga giulohan og “Uban sa Kasingkasing sa usa ka Amahan.” Sa pasiuna sa maong sulat, miingon ang Santo Papa, “Ang matag usa kanato makakaplag diha kang Jose—ang tawo nga dili mamatikdan, nga anaa matag adlaw apan hilom ug tago—og usa ka tigpataliwala, usa ka kasaligan ug usa ka giya sa mga panahon sa kalisdanan.”

Ang Ebanghelyo sa ibabaw, nga gikuha sa mga basahon alang niining handumanan, nagpakita nga si Jesus mao ang “anak sa panday.” Usa ka mamumuo si Jose. Nagtrabaho siya sa iyang kaugalingong mga kamot isip panday aron matagana ang adlaw-adlaw nga mga panginahanglan sa Mahal nga Birhen Maria ug sa Anak sa Diyos. Gitagan-an niya sila og puloy-anan, pagkaon, ug uban pang mga gikinahanglan sa matag adlaw. Gipanalipdan usab silang duha ni Jose pinaagi sa pagsunod sa nagkalainlaing mga mensahe sa anghel sa Diyos nga nakigsulti kaniya diha sa iyang mga damgo. Gituman ni Jose ang iyang mga katungdanan sa kinabuhi sa hilom ug tagong paagi, nga nag-alagad isip amahan, bana ug mamumuo.

Bisan tuod si Jose giila ug gitahod karon sa tibuok natong Simbahan ug giila pa gani nga usa ka bantog nga tawo sa kasaysayan sa kalibotan, sa panahon nga buhi pa siya, lagmit usa siya ka tawo nga wala kaayo mamatikdi. Lagmit giisip siya nga usa ka yano nga tawo nga nagtuman sa iyang yano nga katungdanan. Apan sa daghang paagi, mao kana ang naghimo kang San Jose nga usa ka sulundong tawo nga angay sundogon ug usa ka tinubdan sa inspirasyon. Diyutay ra kaayo ang gitawag sa pag-alagad sa uban nga makita sa kadaghanan. Diyutay ra kaayo ang gidayeg sa publiko tungod sa ilang adlaw-adlaw nga mga katungdanan. Ilabi na ang mga ginikanan, nga kasagaran wala gayod hatagi sa takos nga pagpasalamat. Tungod niini, ang kinabuhi ni San Jose, kining mapaubsanon ug tago nga kinabuhi nga iyang gipuy-an sa Nazaret, naghatag sa kadaghanan og inspirasyon alang sa ilang kaugalingong adlaw-adlaw nga kinabuhi.

Kon ang imong kinabuhi daw balikbalik lang, dili makita ni pabilhan sa kadaghanan, kapoy, ug usahay laay pa gani, kuhaa si San Jose nga panig-ingnan. Ang handomanan karong adlawa nagpasidungog ilabina kang San Jose isip usa ka mamumuo. Yano ra kaayo ang iyang trabaho. Apan ang pagkabalaan makita ilabina sa yanong mga bahin sa atong adlaw-adlaw nga kinabuhi. Ang pagpili sa pag-alagad matag adlaw, bisag gamay ra o wala gayoy pagdayeg gikan sa kalibotan, usa ka pag-alagad nga tinubdan sa gugma ug pagsundog sa kinabuhi ni San Jose, ug usa usab kini ka tinubdan sa imong kaugalingong pagkabalaan. Ayaw pakamenosa ang kamahinungdanon sa pag-alagad niining mga paagiha ug sa uban pang yanong mga paagi nga dili mamatikdan.

Pamalandongi karong adlawa ang yano ug daw “walay talagsaon” nga adlaw-adlaw nga kinabuhi ni San Jose. Kon makita nimo nga ang imong kinabuhi susama sa iyang nasinati isip mamumuo, bana, ug amahan, ikalipay kana. Pagmaya kay gitawag ka usab ngadto sa kinabuhi sa talagsaong pagkabalaan pinaagi sa yanong mga katungdanan sa matag adlaw. Buhata kini pag-ayo. Buhata kini uban sa gugma. Ug sa pagbuhat niini, sunda ang panig-ingnan ni San Jose ug sa iyang asawa, ang Mahal nga Birhen Maria, nga nakaambit sa iyang yanong adlaw-adlaw nga kinabuhi. Hinumdomi nga ang imong ginabuhat matag adlaw, kon ginabuhat kini tungod sa gugma ug aron sa pag-alagad sa uban, mao ang labing seguradong dalan sa pagkabalaan sa imong kinabuhi.

Akong Jesus, Anak sa panday, nagpasalamat ako Kanimo sa gasa ug inspirasyon sa Imong yutan-ong amahan, si San Jose. Nagpasalamat ako Kanimo sa iyang yano nga kinabuhi nga gipuy-an uban sa dakong gugma ug pagkamay-tulubagon. Tabangi ako sa pagsundog sa iyang kinabuhi pinaagi sa maayong pagtuman sa akong adlaw-adlaw nga mga katungdanan sa trabaho ug pag-alagad. Hinaot mailhan ko diha sa kinabuhi ni San Jose ang usa ka sulundong panig-ingnan alang sa pagkabalaan sa akong kaugalingong kinabuhi. San Jose nga Mamumuo, ig-ampo mo kami. Jesus, misalig ako Kanimo.

Mga Pag-ampo sa Pasko sa Pagkabanhaw


Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santo sa Adlaw – San Jose nga Mamumuo

Mga Kapilian sa mga Basahon sa Misa

Mga hulagway sa ibabaw: San Jose nga Mamumuo