Hunyo 28, 2021
Lunes sa Ikanapulog Tulo nga Semana sa Ordinaryong Panahon
Mga Pagbasa Karong Adlawa
San Ireneo, Obispo ug Martir—Handumanan
Paminaw sa Iningles
“Magtutudlo, mosunod ako Kanimo bisan asa Ka moadto.” Si Jesus mitubag kaniya, “Ang mga milo adunay mga lungag ug ang mga langgam sa kalangitan adunay mga salag, apan ang Anak sa Tawo walay kapahulayan sa Iyang ulo.” Mateo 8:19–20
Dili klaro gikan lamang niining tekstoha kon nganong ingon niini ang tubag ni Jesus sa maong eskriba. Sa unang tan-aw, daw debotado kaayo ang pamahayag sa eskriba: “Magtutudlo, mosunod ako Kanimo bisan asa Ka moadto.” Apan daghan sa mga Amahan sa Simbahan, sa ilang mga pamalandong bahin niining panag-istorya ni Jesus ug sa eskriba, naghatag og makatabang nga mga pagsabot.
Una sa tanan, timan-i nga si Jesus wala modawat ni mosalikway sa tanyag sa eskriba nga mahimong Iyang sumusunod. Hinuon, si Jesus yanong nagpahayag aron pagpatin-aw kon unsa gayod ang gikinahanglan sa pagkahimong Iyang sumusunod. Ang pipila sa mga Amahan sa Simbahan nag-ingon nga kining eskribaha nagtinguha sa pagsunod kang Jesus kay naghunahuna siya nga makadawat siyag dagkong mga ganti kon buhaton niya kini. Kay kon hunahunaon, si Jesus nagbuhat og mga milagro, nagkaanam ka ilado, ug nagpakitag katakos nga mahimong bantog nga pangulo. Busa, kuwestiyonable ang tinuod nga tuyo niining eskribaha sa pagsunod kang Jesus bisan asa Siya moadto. Gusto ba niyang mosunod kang Jesus kay naghunahuna siya nga makahatag kini kaniya og kalibotanong kaayohan?
Ang tubag ni Jesus niining eskribaha adunay duha ka katuyoan. Una, giwagtang niini ang tanang sayop nga pagsabot kon unsay kahulogan sa pagsunod kang Jesus. Kon gusto sa eskriba nga mosunod kang Jesus, kinahanglan siyang andam sa pagsunod Kaniya ngadto sa kakabos ug kawalay puy-anan imbes ngadto sa mga bahandi ug kabtangan. Gusto ni Jesus nga maklaro sa eskriba kon unsa gayod ang iyang gipili. Ikaduha, ang tubag ni Jesus sa pagkatinuod usa ka pagdapit sa eskriba sa pagsunod Kaniya, apan uban lamang sa pagsabot niining bag-ong kahibalo. Sa laing pagkasulti, mao kini ang gisulti ni Jesus: “Oo, umari ka ug sunod Kanako. Apan sabta kon unsay kahulogan niana. Ang pagsunod Kanako dili magdala kanimo ngadto sa kalibotanong kadato kondili ngadto sa kalibotanong kakabos.”
Nganong nagsunod ka kang Jesus? Mahinungdanon nga usahay pamalandongan nimo ang imong mga motibo. Ang uban mipili sa pagsunod kang Jesus tungod kay mao lamang kini ang ilang gidak-an. Ang uban nagsunod Kaniya tungod kay mas maayo ang ilang pamati kon buhaton nila kini. Ug ang uban usab nagsunod Kaniya tungod kay nagtuo sila nga makapaayo kini sa ilang kinabuhi sa nagkalainlaing paagi. Apan unsa man ang labing maayong motibo sa pagsunod sa atong Ginoo? Yano ra kaayo ang labing maayong motibo sa pagsunod kang Jesus sa hingpit ug dili matarog nga paagi. Nagsunod kita Kaniya tungod kay Siya ang Anak sa Dios ug ang Manluluwas sa Kalibotan. Mianhi Siya aron tawgon kita ngadto Kaniya ug gidapit kita nga magkinabuhi nga nahiusa Kaniya pinaagi sa pagtuo. Busa, angay unta nga mosunod kita kang Jesus tungod lamang kay kini ang matarong nga buhaton. Dili nato kini buhaton tungod sa gitawag nga mga kaayohan nga atong makuha. Ang gugma, sa labing putli nga dagway niini, dili mahigugma sa uban tungod sa unsay atong makuha gikan niini. Ang putli nga gugma usa ka gasa nga ihatag ngadto sa uban tungod kay takos sila sa atong gugma. Ug si Jesus takos sa atong gugma ug pagsimba tungod lamang sa kon Kinsa Siya.
Pamalandongi karon ang pagdapit ni Jesus kanimo sa pagsunod Kaniya diha sa kakabos, sa pagkadili mahigot sa tanang butang, sa kayano sa kinabuhi ug, sa kataposan, sa pagsakripisyo sa imong tibuok kinabuhi. Nasabtan ba nimo kon unsay gipasabot sa pagkahimong sumusunod ni Cristo Jesus? Nasabtan ba nimo nga dili mahimong mosunod kang Jesus tungod sa hinakog nga mga katuyoan? Nakaamgo ka ba nga ang pag-ingon og “Oo” sa atong Ginoo mao usab ang pag-ingon og “Oo” sa Iyang Krus? Pamalandongi ang kinabuhi ni Jesus ug susiha kon andam ka ba nga mosunod Kaniya ngadto sa kakabos sa Krus. Kon mopili ka sa pagsunod sa atong Ginoo, nga hingpit nimong nasabtan kon unsay imong giingnan og “Oo,” nan ang sangpotanan mao usab ang mahimayaong pag-ambit sa Iyang kinabuhi sa pagkabanhaw.
Akong mahimayaong Ginoo, milakaw Ka niining kalibotana diha sa kakabos, pagsalikway ug pag-antos. Wala Kay kaugalingong puloy-anan dinhi sa yuta, apan karon nagpuyo Ka sa kadato sa Langit. Tabangi ako sa pagsunod Kanimo, minahal nga Ginoo, bisan asa Mo ako dad-a niining kinabuhia. Kon dad-on Mo ako ngadto sa yutan-ong kakabos ug pag-antos, nagpasalamat ako Kanimo. Nagpasalamat ako Kanimo ug mipili sa pagsunod Kanimo bisan unsa pay mahitabo. Hatagi ako sa grasya nga akong gikinahanglan aron mosunod Kanimo tungod lamang sa akong gugma Kanimo, kay Ikaw ang Dios ug takos Ka sa tanan kong pagdayeg ug pagsimba. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Ireneo, Obispo ug Martir
Mga Kapilian sa mga Basahon sa Misa
_-_James_Tissot_-_overall.jpg){kind=link}