Hunyo 27, 2021
Ika-13 nga Domingo sa Ordinaryong Panahon (Tuig B)
Mga Pagbasa Karong Adlawa
Paminaw sa Iningles
Miingon siya, “Kon makahikap lang ako sa Iyang mga bisti, mamaayo ako.” Marcos 5:28
Ania ang usa ka panig-ingnan sa usa ka tawo nga miduol kang Jesus uban sa dakong pagtuo. Makapadani kini nga sugilanon, kay gihatagan kita sa gasa nga mahibaloan ang iyang mga hunahuna.
Kini nga babaye nag-antos pag-ayo sulod sa daghang katuigan. Gisulayan niya ang tanan aron matambalan siya sa mga doktor. Nahurot niya ang tanan niyang kabtangan. Ug unya, niining makaluluoy nga kahimtang, midangop ang babaye kang Jesus uban sa pagtuo.
Tingali dako na ang iyang pagtuo sa tibuok niyang kinabuhi; wala kita mahibalo. Ang atong nahibaloan mao nga tungod sa iyang pag-antos, nahimo siyang mapaubsanon kaayo ug wala na siyay laing kadangpan. Niining mapaubsanong kahimtang, gibuhat niya ang buhaton sa bisan kinsang santos. Migunit siya pag-ayo sa iyang lig-ong pagtuo nga si Jesus mao ang tubag. Kon mapakyas ang tanan, dili siya pakyason ni Jesus. Tingali wala siya mahibalo kon mamaayo ba ang iyang lawas, apan nasayod siya nga kinahanglan gihapon siyang modangop kang Jesus.
Adunay dakong leksiyon niining sugilanona: kinahanglan nga sama kalalom ang atong pagsalig ug sama kalig-on ang atong pasalig nga itugyan kang Jesus ang atong kinabuhi. Bisan wala pa nato masulayi ang tanang laing kapilian sa kinabuhi, kinahanglan natong tanan nga dawaton ug sundogon ang pagpamatuod niining babayehana.
Ang pagdangop kang Jesus uban sa lalom nga kasigurohan ug pagtuo nagpasabot nga nahibalo kita nga ang Iyang kabubut-on mao lamang ang mahinungdanon. Nagpasabot kini nga pilion nato Siya labaw sa tanan ug sa matag kahimtang sa kinabuhi. Nagpasabot kini nga dili lamang kita modangop Kaniya uban sa atong mga problema, kondili modangop usab kita Kaniya uban sa atong mga kalipay ug sa atong mga panalangin. Ang tanan natong buhaton kinahanglan maggikan sa usa ka lalom ug lig-ong pagtuo sa atong kasingkasing nga si Jesus mao ang tubag sa tanan sa kinabuhi.
Tingali daw sobra ra kini paminawon. Tingali naanad kita nga modangop lamang Kaniya kon daw mapakyas na kita sa tanan. Apan dili unta ingon niana. Gitawag kita sa pag-ugmad sa adlaw-adlaw nga batasan sa pagtinguha nga “makahikap sa Iyang mga bisti,” ingnon ta. Kini usa ka paagi sa pag-ingon nga kinahanglan kanunay natong ipunting ngadto Kaniya ang atong kasingkasing, hunahuna, kabubut-on ug kalag.
Pamalandongi karong adlawa kon unsa na kalalom ang imong batasan sa pagdangop kang Jesus. Siya ba ang una nimong gidayeg tungod sa imong mga panalangin? Ug Siya ba ang una nimong gidangpan sa imong mga kahadlok ug pakigbisog? Ugmara kini nga batasan sa imong kasingkasing ug makita nimo ang mga milagro sa grasya sa imong kinabuhi.
Ginoo, tabangi ako nga kanunay modangop Kanimo sa tanang butang. Tabangi ako nga mosalig Kanimo kon daw malisod ang kinabuhi ug kon daw nagkaguba ang tanan. Tabangi usab ako nga modangop Kanimo sa tanang daghang panalangin nga akong nadawat. Jesus, misalig ako Kanimo.
Katolikong mga Pamalandong Matag Adlaw
Ordinaryong Panahon: Mayo 24–Agosto 31
Anaa sa eBook & paperback gikan sa mosunod nga mga tigbaligya:
Amazon Paperback – Kindle – Google Play Books – iBooks – Barnes & Noble
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Cirilo sa Alexandria, Obispo ug Doktor sa Simbahan
Dili saulogon isip liturhikanhong handumanan karong tuiga kay natunong kini sa Domingo
Mga Kapilian sa mga Basahon sa Misa
