Hulyo 6, 2021
Martes sa Ikanapulog-upat nga Semana sa Ordinaryong Panahon
Mga Pagbasa Karong Adlawa
Santa Maria Goretti, Birhen ug Martir—Opsiyonal nga Handumanan
Paminaw sa Iningles
Si Jesus milibot sa tanang lungsod ug kabaryohan, nagtudlo sa ilang mga sinagoga, nagmantala sa Maayong Balita sa Gingharian, ug nag-ayo sa tanang matang sa sakit ug balatian. Sa pagkakita Niya sa mga panon sa katawhan, natandog ang Iyang kasingkasing sa kaluoy alang kanila kay sila nabalaka ug gibiyaan, sama sa mga karnerong walay magbalantay. Mateo 9:35–36
Dako kaayo ang kadasig ni Jesus alang sa mga kalag. Ang kadasig usa ka kusog, usa ka mainitong tinguha ug usa ka pagpaningkamot sa pagtuman sa usa ka buluhaton. Ang buluhaton nga mainitong gitinguha ni Jesus mao ang pagkakabig sa matag kasingkasing nga Iyang nahimamat. Samtang naglakaw Siya gikan sa usa ka lungsod ngadto sa lain, nga nakighimamat sa matag tawo, makita ni Jesus ang sulod sa ilang mga kasingkasing. Nakita Niya nga daghan kaayong tawo ang “nabalaka ug gibiyaan.” Nakita Niya nga sila sama sa “mga karnerong walay magbalantay.” Ug kini nakapatandog Kaniya sa kaluoy, uban sa kadasig nga mahimong ilang Magbalantay, sa pagwagtang sa kabalaka sa ilang mga kasingkasing ug sa pagpahibalo kanila nga gidapit sila nga mahimong kabahin sa Iyang bag-ong Gingharian.
Maayong pamalandongan ang hulagway ni Jesus nga nakigkita sa daghang tawo nga nasamok ug gibiyaan. Kay kita man kini. Ang matag usa kanato adunay kaugalingong mga kabalaka sa sulod. Usahay mobati kitag kamingaw, kalibog, kawalay kasigurohan, ug daw nahisalaag. Ang tawo nga dili mobati niini usa kaha ka hingpit nga santos o dili matinud-anon sa iyang kaugalingon. Siyempre, ang lawom nga pagkabalaan ug panaghiusa sa Diyos makaayo gayod niining pakigbisog sa sulod nga nasinati sa daghan. Nianang kahimtanga, tin-aw nga nahibaloan sa tawo nga sakop siya sa pamilya sa Diyos, nasabtan niya ang iyang kaugalingon isip anak nga lalaki o babaye sa Diyos, ug nakakaplag siyag lawom nga kalinaw niining kamatuorana. Apan alang sa mga nakigbisog, kining teksto sa Kasulatan alang gayod kaninyo.
Una sa tanan, daghang butang ang mahimong hinungdan sa “pagkabalaka.” Alang sa uban, ang ilang ginaatubang mao ang mga handomanan sa nangagi, naguba nga mga relasyon, kakulang sa direksiyon, bug-at nga sala, kasuko ug uban pa. Busa ang unang pangutana nga angay pamalandongan sa matinud-anon nga paagi mao kon nabalaka ba ang imong kasingkasing o wala. Bisan ang labing bantog nga mga santos aduna gihapoy pipila ka bahin sa ilang kinabuhi nga ilang gikabisogan. Busa unsa man kana alang kanimo?
Ikaduha, ang pagbati nga “gibiyaan” usa ka bug-at nga krus. Mianhi si Jesus aron mahimo kitang kabahin sa Iyang pamilya. Kini matuman pinaagi sa gasa sa walay kataposang kaluwasan nga kinahanglang magsugod karon. Pinaagi sa pagdawat sa kapasayloan sa mga sala ug pagtubo sa kinabuhi sa pag-ampo, mailhan nato ang Dios sa usa ka suod kaayo ug personal nga paagi. Oo, Siya ang Dios nga Makagagahom sa tanan ug Magbubuhat sa tanan. Apan mahimo usab kitang makig-uban Kaniya sa lawom, personal ug suod nga paagi, ug buot Niyang magtukod og tinuod nga relasyon sa gugma uban kanimo.
Kon naglisod ka tungod sa bisan hain niining duha—ang pagkabalaka o ang pagbati nga gibiyaan, o silang duha—pamalandongi ang kadasig ni Jesus alang kanimo. Ang Iyang walay kakapoy ug halapad nga mga panaw nga gibaktas Niya sa panahon sa Iyang dayag nga ministeryo angay nimong tan-awon isip timaan sa Iyang kadasig sa pagduol kanimo mismo, aron mahimong imong Magbalantay. Buot Niyang kuhaon ang matag palas-anon ug hawanan ang dalan aron imong madiskobrehan ang imong dapit sa Iyang pamilya. Ang “Maayong Balita sa Gingharian” nga giwali ni Jesus nagdapit sa tanan nga mahimong sakop nianang Ginghariana. Sa Iyang pagduol kanimo, hibaloi nga ang Iyang kasingkasing puno sa kaluoy alang kanimo, sama kaniadto sa Iyang pagpanaw sa kabaryohan dugay na kaayong panahon ang milabay. Nakita ka Niya, gitan-aw Niya ang imong kasingkasing uban sa gugma, ug dili gayod Niya iwagtang ang Iyang mga mata gikan kanimo taliwala sa imong panginahanglan, kahuyang ug sala.
Pamalandongi karon ang dakong kadasig ni Jesus alang sa imong kaugalingong kaluwasan nga walay kataposan ug sa pagkabalaan sa imong kinabuhi. Dili ka makalahutay niining kalibotana kon wala Siya. Tugoti si Jesus nga mangita kanimo, moduol kanimo, makigsulti kanimo, ug modapit kanimo sa pagtugot Kaniya nga mahimong imong Magbalantay. Gitinguha Niya kini sa tibuok Niyang kaugalingon; tugoti si Jesus nga matuman ang Iyang misyon diha kanimo.
Akong diosnong Magbalantay, Imong gipangita ang tanang tawo uban sa hilabihang kadasig ug kaluoy. Imong nakita ang matag kasingkasing nga nasakitan ug nadugmok, ug gitinguha Nimo nga ayohon ang matag usa. Salamat sa Imong pag-anhi kanako, minahal nga Ginoo, ug sa Imong pagka-Magbalantay ug Giya nako. Tabangi ako nga makita Ka samtang nagtan-aw Ka kanako diha sa akong kahuyang ug kasakit. Ug tabangi ako nga ablihan ang akong kasingkasing Kanimo karon ug sa tibuok nakong kinabuhi. Gihigugma Ko Ikaw, akong Ginoo. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – Santa Maria Goretti, Birhen ug Martir
Mga Kapilian sa mga Basahon sa Misa
_-_Google_Art_Project.jpg){kind=link}