Pagsulti diha sa Espiritu sa Amahan

Hulyo 9, 2021
Biyernes sa Ikanapulog-upat nga Semana sa Panahon sa Tuig
Mga Pagbasa Karong Adlawa

San Agustin Zhao Rong ug mga Kauban, mga Martir—Opsiyonal nga Handumanan

Paminaw sa Iningles

Sa dihang itugyan kamo nila, ayaw kabalaka kon unsaon ninyo pagsulti o unsay inyong isulti. Nianang higayona ihatag kaninyo ang inyong isulti. Kay dili kamo ang mosulti kondili ang Espiritu sa inyong Amahan nga mosulti pinaagi kaninyo. Mateo 10:19–20

Kini usa ka leksiyon nga sayon sabton apan lisod kaayong isabuhay. Kini nga pagtulon-an ni Jesus kabahin sa Iyang pagsulti sa Iyang mga Apostoles nga sa ilang paglakaw aron isangyaw ang Ebanghelyo sa Gingharian, itugyan sila ngadto sa mga hukmanan, latigohon sa mga sinagoga, ug dad-on atubangan sa mga gobernador ug mga hari. Lutoson sila sa tagsa-tagsa ka lungsod tungod sa ilang pagpaambit sa Ebanghelyo. Bisan kon sa sinugdan dili ingon ka makapadasig kining maong “mga pulong sa pagdasig,” ang teksto sa Ebanghelyo nga gikutlo sa ibabaw angayng makahatag ug dakong kadasig. Makapadasig kini, kon masunod nila ang tambag ni Jesus uban sa pagtuo.

Kon kita hukman nga sad-an, hukman, dili sabton ug uban pang susama niini, kasagaran magsugod dayon kitag paghimo sa atong depensa sulod sa atong hunahuna. Pangatarongan nato ang atong mga buhat, magtukod kitag hukmanan sa atong hunahuna diin kita mismo ang maghuhukom ug hurado sa uban, maghukom nga sad-an sila ug magpahamtang ug silot kanila. Ang sala nga sa naandan gitawag ug “gugma sa kaugalingon” usa ka sala nga naggikan sa garbo ug dili gayod gugma. Tintalon kita niini sa pagpanalipod sa atong kaugalingon, gamit ang atong kaugalingong tawhanong kaalam ug tambag.

Kon atong palandongon pag-ayo ang pagtulon-an ni Jesus sa ibabaw, kadaghanan sa mga tawo makaamgo nga lisod kaayo kining dawaton nga pagtulon-an. Sa kinatibuk-an, kon hukman kang sad-an o daogdaogon sa uban, magpabiling malinawon ug hilom ang imong kasingkasing. Ayaw dayon pagtutok sa samad nga ilang gipahinabo. Ayaw itugot nga ang daw inhustisya maoy mohawod sa imong hunahuna. Ayaw kabalaka o pagpuno sa imong kaugalingon sa kahingawa tungod sa imong gibating paglutos. Hinuon, ipunting ang imong mga mata kang Jesus, ug ang Iyang Tingog ug Iyang Kamatuoran lamang ang hatagig pagtagad. Ug imbes nga tutokan ang samad nga gipahinabo kanimo, tan-awa ang tawo nga nagpahinabo niini. Ug tan-awa siya uban sa gugma. Dili siya ang kaaway; siya ang natad sa pakigbisog alang sa Kamatuoran, ug misyon nimo ang pagtabang kaniya nga madungog ang kamatuoran sa Dios. Busa unsaon nimo kini? Tin-aw ang tubag ni Jesus. “Ihatag kaninyo nianang higayona ang inyong isulti.” Dugang pa, giklaro ni Jesus nga ang “Espiritu sa inyong Amahan” ang kinahanglang mosulti pinaagi kanimo sa ingon niana nga kahimtang.

Ang pagkinabuhi sumala niini nga pagtulon-an ilabinang nagkinahanglan og duha ka butang: pagpaubos ug pagsalig. Ang pagpaubos makatabang kanimo sa pagsalikway sa tentasyon sa paghigugma sa kaugalingon (garbo). Kinahanglanon kini aron madungog nimo ang Tingog sa Diyos nga nakigsulti kanimo ug, sa kataposan, matugotan Siya sa pagsulti pinaagi kanimo. Ikaduha, kinahanglan gayod nga mosalig ka nga tinuod ang gisulti ni Jesus. Kinahanglan mosalig ka nga, kon mapainubsanon ka ug bukas sa Iyang Tingog, ihatag Niya kanimo ang Iyang mga pulong sa dihang gusto Niyang ipamulong kini. Lisod kini tungod kay kasagaran gusto kitang mosulti og labaw pa kay sa gipili sa Diyos nga isulti. Kanunay kitang gitawag sa Diyos sa pagpakahilom atubangan sa inhustisya. Usa ka pagpakahilom nga napuno usab sa gugma alang sa naglutos. Nagkinahanglan kini og dakong pagsalig sa grasya sa Diyos, nga moresulta sa madagayaong gugma diha kanimo.

Pamalandongi karon kining pagtulon-an sa atong Ginoo. Hunahunaa kon unsa ang imong reaksiyon kon adunay mokondena o mohukom kanimo. Giunsa nimo pagtubag ang maong mga paglutos? Sugdi sa paghilom, tan-awa ang maong tawo uban sa gugma alang kaniya, ug dayon paminaw ug paghulat sa Ginoo. Hulata hangtod nga hatagan ka Niya sa mga pulong nga imong isulti. Ang pagbuhat niini dili lamang maayo alang sa naglutos kanimo, kondili hilabihan usab ka maayo alang sa imong kaugalingong kalag ug sa pagkabalaan sa imong kinabuhi.

Akong mapailobong Ginoo, Ikaw nga Manluluwas sa Kalibotan ug Diyos sa tanan, mitugot nga bakak nga akusahan, hukman ug kondenahon. Sa tanan niining mga hitabo, nagpabilin Kang hilom ug misulti lamang sa dihang ang Amahan misulti pinaagi Kanimo. Tabangi ako nga mahigawas sa tanang garbo, minahal kong Ginoo, aron ang Imong balaang mga pulong lamang ang akong isulti, ang mga hunahuna lamang nga Imong gidasig ang akong hunahunaon, ug molihok lamang ako sumala sa Imong balaang sugo sa gugma. Hesus, misalig ako Kanimo.