പിതാവിന്റെ ആത്മാവിൽ സംസാരിക്കുക

ജൂലൈ 9, 2021
ആണ്ടുവട്ടത്തിലെ പതിനാലാം ആഴ്ചയിലെ വെള്ളിയാഴ്ച
ഇന്നത്തെ വായനകൾ

രക്തസാക്ഷികളായ വിശുദ്ധ അഗസ്റ്റിൻ ഷാവോ റോങ്ങും സഹചാരികളും—ഐച്ഛിക അനുസ്മരണം

അവർ നിങ്ങളെ ഏല്പിച്ചുകൊടുക്കുമ്പോൾ, എങ്ങനെ സംസാരിക്കണമെന്നോ എന്തു പറയണമെന്നോ ഓർത്തു വ്യാകുലപ്പെടേണ്ടാ. പറയേണ്ടത് ആ സമയത്ത് നിങ്ങൾക്കു നൽകപ്പെടും. എന്തെന്നാൽ, സംസാരിക്കുന്നത് നിങ്ങളല്ല, നിങ്ങളിലൂടെ സംസാരിക്കുന്ന നിങ്ങളുടെ പിതാവിന്റെ ആത്മാവാണ്. മത്തായി 10:19–20

മനസ്സിലാക്കാൻ എളുപ്പമുള്ളതും എന്നാൽ ജീവിതത്തിൽ പ്രാവർത്തികമാക്കാൻ ഏറെ പ്രയാസമുള്ളതുമായ ഒരു പാഠമാണിത്. ദൈവരാജ്യത്തിന്റെ സുവിശേഷം പ്രസംഗിക്കാൻ പുറപ്പെടുമ്പോൾ തങ്ങൾ ന്യായാലയങ്ങളിൽ ഏല്പിക്കപ്പെടുകയും സിനഗോഗുകളിൽ ചമ്മട്ടിയടിക്കപ്പെടുകയും ഭരണാധികാരികളുടെയും രാജാക്കന്മാരുടെയും മുമ്പിൽ കൊണ്ടുപോകപ്പെടുകയും ചെയ്യുമെന്ന് യേശു തന്റെ അപ്പസ്തോലന്മാരോടു പറയുന്ന പശ്ചാത്തലത്തിലാണ് ഈ ഉപദേശം നൽകുന്നത്. സുവിശേഷം പങ്കുവെക്കുന്നതിന്റെ പേരിൽ ഒരു പട്ടണത്തിൽനിന്ന് മറ്റൊന്നിലേക്ക് അവർ പീഡിപ്പിക്കപ്പെടും. ഇത്തരമൊരു “പ്രോത്സാഹനപ്രസംഗം” ആദ്യം അത്ര പ്രചോദനം നൽകുന്നതായി തോന്നിയേക്കില്ലെങ്കിലും, മുകളിൽ ഉദ്ധരിച്ച സുവിശേഷഭാഗം വലിയ പ്രോത്സാഹനം നൽകേണ്ടതാണ്. അതായത്, യേശുവിന്റെ ഉപദേശം വിശ്വാസത്തോടെ അനുസരിക്കാൻ അവർക്കു കഴിയുമെങ്കിൽ അത് അവർക്കു പ്രോത്സാഹനമാകും.

നാം കുറ്റംവിധിക്കപ്പെടുകയോ മറ്റുള്ളവരുടെ വിധിക്കിരയാകുകയോ തെറ്റിദ്ധരിക്കപ്പെടുകയോ മറ്റോ ചെയ്യുമ്പോൾ, ഉടൻതന്നെ നമ്മുടെ മനസ്സിൽ സ്വയം പ്രതിരോധിക്കാൻ തുടങ്ങുന്നത് വളരെ സാധാരണമാണ്. നാം നമ്മുടെ പ്രവൃത്തികളെ ന്യായീകരിക്കുന്നു; മനസ്സിൽ ഒരു ന്യായാലയം സ്ഥാപിച്ച് മറ്റുള്ളവരുടെ കാര്യത്തിൽ ന്യായാധിപന്റെയും വിധികർത്താക്കളുടെയും സ്ഥാനം സ്വയം ഏറ്റെടുക്കുന്നു; അവരെ കുറ്റക്കാരായി കണ്ടെത്തി അവർക്ക് ശിക്ഷകൾ വിധിക്കുന്നു. പരമ്പരാഗതമായി “ആത്മസ്നേഹം” എന്നു വിളിക്കപ്പെടുന്ന പാപം അഹങ്കാരത്തിൽനിന്ന് ഉത്ഭവിക്കുന്ന ഒന്നാണ്; അത് യഥാർഥത്തിൽ സ്നേഹമേയല്ല. നമ്മുടെ സ്വന്തം മാനുഷിക ജ്ഞാനവും വിവേകവും ഉപയോഗിച്ച് സ്വയം ന്യായീകരിക്കാൻ അത് നമ്മെ പ്രലോഭിപ്പിക്കുന്നു.

മുകളിൽ പറഞ്ഞ യേശുവിന്റെ ഉപദേശം ശ്രദ്ധാപൂർവം പരിഗണിച്ചാൽ, അത് സ്വീകരിക്കാൻ വളരെ പ്രയാസമുള്ള ഒരു ഉപദേശമാണെന്ന് മിക്കവർക്കും മനസ്സിലാകും. അതിന്റെ സാരം ഇതാണ്: മറ്റൊരാൾ നിങ്ങളെ കുറ്റംവിധിക്കുകയോ നിങ്ങളോടു മോശമായി പെരുമാറുകയോ ചെയ്യുമ്പോൾ, ഹൃദയത്തിൽ നിശ്ശബ്ദരായിരിക്കുക. അവർ ഏല്പിച്ച മുറിവിനെക്കുറിച്ച് ഉടൻതന്നെ ചിന്തിച്ചുകൊണ്ടിരിക്കരുത്. അനീതിയെന്നു തോന്നുന്ന കാര്യത്തിൽ മനസ്സ് മുഴുകിപ്പോകരുത്. പീഡനമായി നിങ്ങൾക്കു അനുഭവപ്പെടുന്നതിനെക്കുറിച്ച് വ്യാകുലപ്പെടുകയോ ഉത്കണ്ഠയിൽ നിറയുകയോ ചെയ്യരുത്. പകരം, നിങ്ങളുടെ ദൃഷ്ടി യേശുവിലേക്കു തിരിക്കുക; അവിടുത്തെ സ്വരത്തിലും സത്യത്തിലും മാത്രം ശ്രദ്ധ കേന്ദ്രീകരിക്കുക. നിങ്ങൾക്കേറ്റ മുറിവിലേക്കു നോക്കുന്നതിനു പകരം, അതേല്പിക്കുന്ന വ്യക്തിയെ നോക്കുക. ആ വ്യക്തിയെ സ്നേഹത്തോടെ നോക്കുക. ആ വ്യക്തി ശത്രുവല്ല, സത്യത്തിനുവേണ്ടിയുള്ള പോരാട്ടം നടക്കുന്ന ഇടമാണ്; ദൈവത്തിന്റെ സത്യം കേൾക്കാൻ ആ വ്യക്തിയെ സഹായിക്കുക എന്നതാണ് നിങ്ങളുടെ ദൗത്യം. അപ്പോൾ നിങ്ങൾ അത് എങ്ങനെ ചെയ്യും? യേശുവിന്റെ ഉത്തരം വ്യക്തമാണ്: “പറയേണ്ടത് ആ സമയത്ത് നിങ്ങൾക്കു നൽകപ്പെടും.” മാത്രമല്ല, അത്തരമൊരു സാഹചര്യത്തിൽ നിങ്ങളിലൂടെ സംസാരിക്കേണ്ടത് “നിങ്ങളുടെ പിതാവിന്റെ ആത്മാവ്” ആയിരിക്കണമെന്ന് യേശു വ്യക്തമാക്കുന്നു.

ഇത്തരമൊരു ഉപദേശം ജീവിതത്തിൽ പ്രാവർത്തികമാക്കാൻ പ്രത്യേകിച്ച് രണ്ടു കാര്യങ്ങൾ ആവശ്യമാണ്: വിനയവും ആശ്രയവും. ആത്മസ്നേഹത്തിലേക്കുള്ള പ്രലോഭനം (അഹങ്കാരം) മാറ്റിവെക്കാൻ വിനയം സഹായിക്കും. നിങ്ങളോടു സംസാരിക്കുന്ന ദൈവത്തിന്റെ സ്വരം കേൾക്കാനും, ഒടുവിൽ, നിങ്ങളിലൂടെ സംസാരിക്കാൻ അവിടുത്തെ അനുവദിക്കാനും ഇത് അനിവാര്യമാണ്. രണ്ടാമതായി, യേശു പറയുന്നതു സത്യമാണെന്ന് നിങ്ങൾ വിശ്വസിച്ചാശ്രയിക്കേണ്ടത് അത്യാവശ്യമാണ്. നിങ്ങൾ വിനയമുള്ളവരും അവിടുത്തെ സ്വരത്തിനു ഹൃദയം തുറന്നവരുമാണെങ്കിൽ, തന്റെ വാക്കുകൾ പറയണമെന്ന് അവിടുന്ന് ആഗ്രഹിക്കുന്ന സമയത്ത് അവ നിങ്ങൾക്കു നൽകുമെന്ന് നിങ്ങൾ വിശ്വസിക്കണം. ഇത് പ്രയാസമാണ്; കാരണം, ദൈവം പറയാൻ തിരഞ്ഞെടുക്കുന്നതിനെക്കാൾ ഏറെ പറയാൻ നാം പലപ്പോഴും ആഗ്രഹിക്കുന്നു. അനീതിയുടെ മുമ്പിൽ നിശ്ശബ്ദരായിരിക്കാൻ ദൈവം പലപ്പോഴും നമ്മെ വിളിക്കുന്നു. പീഡിപ്പിക്കുന്ന വ്യക്തിയോടുള്ള സ്നേഹവും നിറഞ്ഞുനിൽക്കുന്ന ഒരു നിശ്ശബ്ദത. ഇതിനു ദൈവകൃപയിൽ വലിയ ആശ്രയം ആവശ്യമാണ്; അതിന്റെ ഫലമായി നിങ്ങളുടെ ഭാഗത്തുനിന്ന് ധാരാളം ഉപവിസ്നേഹം ഉണ്ടാകും.

ഇന്ന് നമ്മുടെ കർത്താവിന്റെ ഈ ഉപദേശത്തെക്കുറിച്ച് ധ്യാനിക്കുക. ആരെങ്കിലും നിങ്ങളെ കുറ്റംവിധിക്കുകയോ നിങ്ങളുടെമേൽ വിധിപറയുകയോ ചെയ്യുമ്പോൾ നിങ്ങൾ എങ്ങനെ പ്രതികരിക്കുന്നുവെന്ന് ചിന്തിക്കുക. ഇത്തരം പീഡനങ്ങളോട് നിങ്ങൾ എങ്ങനെയാണ് പ്രതികരിക്കുന്നത്? നിശ്ശബ്ദതയിൽനിന്നു തുടങ്ങുക; മറ്റേയാളോടുള്ള സ്നേഹത്താൽ നിങ്ങളുടെ ദൃഷ്ടി ആ വ്യക്തിയിലേക്കു തിരിക്കുക; തുടർന്ന് കർത്താവിനെ ശ്രവിച്ച് അവിടുത്തേക്കായി കാത്തിരിക്കുക. പറയേണ്ട വാക്കുകൾ അവിടുന്ന് നിങ്ങൾക്കു നൽകുന്നതുവരെ കാത്തിരിക്കുക. ഇങ്ങനെ ചെയ്യുന്നത് പീഡിപ്പിക്കുന്ന വ്യക്തിക്കു മാത്രമല്ല, നിങ്ങളുടെ സ്വന്തം ആത്മാവിനും ജീവിതവിശുദ്ധിക്കും അത്യന്തം പ്രയോജനകരമാണ്.

ക്ഷമാശീലനായ എന്റെ കർത്താവേ, ലോകത്തിന്റെ രക്ഷകനും എല്ലാവരുടെയും ദൈവവുമായ അങ്ങ്, വ്യാജമായി ആരോപിക്കപ്പെടാനും വിധിക്കപ്പെടാനും ശിക്ഷിക്കപ്പെടാനും സ്വയം അനുവദിച്ചു. അതിലെല്ലാം അങ്ങ് നിശ്ശബ്ദത പാലിക്കുകയും പിതാവ് അങ്ങയിലൂടെ സംസാരിച്ചപ്പോൾ മാത്രം സംസാരിക്കുകയും ചെയ്തു. പ്രിയ കർത്താവേ, എല്ലാ അഹങ്കാരത്തിൽനിന്നും മോചിതനാകാൻ എന്നെ സഹായിക്കണമേ. അങ്ങനെ ഞാൻ അങ്ങയുടെ വിശുദ്ധ വാക്കുകൾ മാത്രം സംസാരിക്കുകയും അങ്ങ് പ്രചോദിപ്പിക്കുന്ന ചിന്തകൾ മാത്രം ചിന്തിക്കുകയും അങ്ങയുടെ വിശുദ്ധമായ സ്നേഹകല്പനയനുസരിച്ചു മാത്രം പ്രവർത്തിക്കുകയും ചെയ്യട്ടെ. ഈശോയേ, ഞാൻ അങ്ങയിൽ ശരണപ്പെടുന്നു.