Septiyembre 13, 2021
Lunes sa Ika-24 nga Semana sa Ordinaryong Panahon
Mga Pagbasa alang Karong Adlawa
San Juan Crisostomo, Obispo ug Doktor sa Simbahan—Handumanan
Paminaw sa Iningles
“Ginoo, ayaw na paghago, kay dili ako takos nga mosulod Ka sa akong puloy-anan. Busa, wala usab nako isipa ang akong kaugalingon nga takos moduol Kanimo; apan isulti lamang ang pulong ug mamaayo ang akong sulugoon.” Lucas 7:6–7
Ang makapainteres mao nga kining mapainubsanong mga pulong, nga gikan sa usa ka Romanong senturyon, wala diay niya mismo isulti kang Jesus. Kini tungod kay ang senturyon wala motuo nga takos gani siyang moduol mismo kang Jesus. Busa, gipadala niya ang pipila sa iyang mga higala aron isulti kining mga pulonga kang Jesus alang kaniya. Sa tinuod gayod, ang mga higala niining senturyon nahimong mga tigpangamuyo atubangan ni Jesus. Agig tubag, gipadayag ni Jesus ang Iyang katingala sa pagtuo sa senturyon. Miingon si Jesus sa panon sa katawhan nga nag-uban Kaniya, “Sultihan Ko kamo, bisan sa Israel wala Ako makakaplag ug ingon niini nga pagtuo.” Ug niadtong higayona, giayo ni Jesus ang sulugoon bisan anaa Siya sa layo.
Kasagaran, kon aduna kitay mahinungdanong hangyo sa usa ka tawo, kita mismo ang moduol kaniya. Atong adtoon ang tawo ug makigsulti kaniya nga nag-atubangay. Ug bisan tuod makaduol gayod kita sa atong Ginoo pinaagi sa pag-ampo, nga nag-atubangay, sa usa ka personal nga pakighimamat Kaniya, adunay talagsaong pagkamapainubsanon sa pagdala sa atong mga panginahanglan ngadto sa atong Ginoo pinaagi sa pagpangamuyo sa laing tawo. Sa piho, adunay talagsaong pagkamapainubsanon sa pagpangayo sa pagpangamuyo sa mga santos.
Ang pagpangayo sa pagpangamuyo sa mga santos atubangan sa atong Ginoo wala nato buhata tungod kay nahadlok kita sa atong Ginoo o tungod kay masuko Siya kon direkta kitang moduol Kaniya. Ang labing maayong tuyo niini mao ang pagpakita sa kinahiladmang pagkamapainubsanon. Pinaagi sa pagtugyan sa atong pag-ampo ngadto sa mga anaa sa Langit, nga nagtan-aw sa nawong sa Diyos, gitugyan gayod nato ang atong pag-ampo ngadto sa Diyos. Apan ang pagsalig sa pagpangamuyo sa mga santos usa usab ka paagi sa pag-ila nga dili kita takos, tungod lamang sa atong kaugalingong mga merito, nga mobarog atubangan sa Ginoo ug modala Kaniya sa atong hangyo. Kini nga pagkamapainubsanon usahay lisod sabton, apan mahinungdanon nga maningkamot kita sa pagsabot niini.
Unsa man ang kinahanglan nimong iampo sa imong kinabuhi karon? Samtang imong hunahunaon kana, pagpili ug usa ka santos nga mahimong imong higala ug tigpangamuyo atubangan sa Diyos. Dangop nianang santosa uban sa pagkamapainubsanon ug pag-ampo ngadto kaniya, nga nag-ila nga dili ka takos moduol sa atong Ginoo sa imong kaugalingon lamang. Dayon itugyan ang imong pangamuyo nianang santosa ug hangyoa siya nga ipresentar kana nga pag-ampo ngadto sa atong Ginoo alang kanimo. Ang pag-ampo ngadto sa atong Ginoo, pinaagi sa pagpangamuyo sa usa ka santos, usa usab ka paagi sa pagpahayag nga nahibalo kang ang tubag ni Jesus kanimo lunsay nga kaluoy gikan Kaniya. Ug ang maayong balita mao nga tinguha gayod ni Jesus nga ibubo ang Iyang kaluoy kon magpaubos kita atubangan Kaniya, ilabina pinaagi sa pagduol Kaniya pinaagi sa pagpataliwala sa mga santos.
Pamalandongi karon ang pagkamapainubsanon niining tinahod nga Romanong senturyon. Paningkamoti nga masabtan ang gahom sa iyang mapainubsanong paagi sa pagduol, diin iyang gipadala ang iyang mga higala ngadto kang Jesus alang kaniya. Samtang buhaton nimo kini, pagpili ug usa ka santos sa Langit ug hangyoa siya nga moduol sa atong Ginoo alang kanimo ug mangayo nga hatagan ka sa atong Ginoo sa samang pagkamapainubsanon ug pagtuo nga anaa niining senturyon. Kon buhaton nimo kini, matingala usab ang atong Ginoo sa imong pagtuo ug pagkamapainubsanon.
Mga Santos sa Dios, palihog ihalad kang Jesus ang akong mapainubsanong hangyo nga motubo pa ako sa pagkamapainubsanon ug pagtuo. Minahal kong Ginoo, akong gidala kini ug ang tanan kong mga pag-ampo Kanimo. Sa pagbuhat ko niini, giila ko nga dili ako takos sa Imong Balaang Kalooy. Apan pinaagi sa pagpataliwala sa mga santos sa Langit, kon kabubut-on Mo nga ihatag ang Imong kalooy kanako, mapainubsanon kong gihangyo kini Kanimo pinaagi kanila. Inahang Maria, sa pinasahi gayod nga paagi akong gitugyan ang tanan kong mga pag-ampo sa Imong balaang pagpangamuyo. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Juan Crisostomo, Obispo ug Doktor sa Simbahan
Mga Kapilian sa mga Basahon sa Misa
.jpg){kind=link}