Oktubre 23, 2021
Sabado sa Ika-29 nga Semana sa Ordinaryong Panahon
Mga Pagbasa Karong Adlawa
San Juan de Capistrano, Pari—Opsiyonal nga Paghandom
Paminaw sa Iningles
“‘Tulo na ka tuig nga mianhi ako aron mangitag bunga niining kahoyng igos, apan wala gayod akoy nakit-an. Busa putla kini. Nganong pasagdan pa man kini nga mohurot sa katambok sa yuta?’ Mitubag siya kaniya, ‘Sir, pasagdi lang una kini niining tuiga, ug akong ugmaron ang yuta sa palibot niini ug abunohan; basin mamunga pa kini sa umaabot. Kon dili, mahimo na nimo kining putlon.’” Luke 13:7–9
Unsa kadaghan ang maayong bunga nga namugna sa imong kinabuhi? Usa kini ka importanteng pangutana nga angay tubagon sa matinud-anon. Usa sa labing maayong paagi sa pag-ila kon nagtuman ba kita sa kabubut-on sa Diyos mao ang pagtan-aw sa mga bunga nga namugna sa atong kinabuhi.
Ang maayong bunga motungha sa nagkalainlaing paagi ug makita sa nagkalainlaing porma. Apan duha ka matang sa bunga ang kinahanglan nimong pangitaon. Una, ang bunga nga makita sulod sa imong kaugalingong kalag isip resulta sa kinabuhing puno sa tinuod nga pag-ampo ug panaghiusa sa Diyos. Ikaduha, kinahanglan natong pangitaon ang bunga sa gugmang putli diha sa atong mga binuhatan ngadto sa uban.
Kon tan-awon nimo sa matinud-anon ang imong kaugalingong kalag, unsa may imong makita? Kasagaran, mahimo nimong makita ang usa ka matang sa pakiggubat sulod nimo, diin ang imong mga pagbati ug tinguha nga wala sa hustong kahusay nakigbatok sa Espiritu sa Diyos. Ang maayong espirituhanong bunga nagkinahanglan og pagputli sa sulod. Pinaagi sa pag-ampo, pagpuasa, espirituhanong pagbasa ug uban pa, kinahanglan nimong pangitaon ang mga paagi diin ang Espiritu sa Diyos nagdumala sa imong tawhanong kinaiya nga wala sa hustong kahusay ug naghan-ay niini pag-usab sumala sa Iyang balaang kabubut-on. Bisan kitang tanan mga makasasala ug usahay mapukan, kinahanglan kitang maningkamot pag-ayo sa pagbuntog sa matag binuhatan, tinguha ug tentasyon nga atong mailhan, pinasikad sa kamatuoran ug dili lang sa kaugalingong pagbati, nga supak sa kabubut-on sa Diyos. Usahay, ang imong tawhanong kinaiya nga napukan sa sala mahimong moguyod kanimo ngadto sa sala sa hilabihang kusog nga makalibog kini sa imong salabotan ug magdala kanimo sa pagpangatarongan aron hatagan og katarongan ang imong mga sala. Apan kon gusto nimo ang bunga sa presensya sa Diyos diha sa imong kinabuhi, kinahanglan padayon nimong pilion nga himoon ang imong sulodnong kinabuhi nga usa ka mabungahong tanaman diin ang mga hiyas sa Diyos motubo ug maatiman sa madagayaon. Busa, sa makausa pa, unsa gayod ang imong makita kon matinud-anon nimong susihon ang imong kaugalingong kalag?
Samtang gipalambo sa Diyos ang mga hiyas sa atong sulod, ug ang atong mga pagbati ug tinguha nga wala sa hustong kahusay mapasakop sa pagdumala sa Espiritu sa Diyos, mailhan usab nato ang panginahanglan nga tugotan ang mga bunga sa gugma sa Diyos diha sa atong sulod nga moagas gikan sa atong kinabuhi ngadto sa kinabuhi sa uban. Magsugod kitag pangandoy nga magkinabuhi nga dili hakog ug andam mosakripisyo. Magsugod kitag pangandoy nga unahon ang uban. Isipon nato ang kinabuhi sa uban nga bililhon ug puno sa dignidad. Ug mabuntog nato ang paghukom sa uban, kabangis, kasuko, ug uban pa. Mamatikdan nato nga nagtinguha kita sa kaayohan sa uban ug, pinaagi sa labaw-sa-kinaiyahang gahom sa grasya, madani kita sa pagbuhat og daghang gagmayng buhat sa kaayo ngadto sa tanan. Apan kining tanan nagsugod sa sulodnong kinabuhi sa usa ka tawo, nga gitinguha sa atong Ginoo nga ugmaron ug abunohan sa Iyang grasya aron ang mga bunga sa Iyang gugma motubo sa sulod ug sa kataposan dayag kaayong makita sa adlaw-adlaw niyang mga binuhatan ngadto sa tanan.
Pamalandongi karon ang imong kalag nga sama niining kahoyng igos nga wala mamunga. Handurawa ang atong Ginoo nga nagduol kanimo ug naghangyo nga tugotan nimo Siya sa pag-ugmad ug pag-abono sa yuta. Ilha nga nagkinahanglan kini og kausaban gikan kanimo. Kon buot kang mamunga og maayong bunga, gikinahanglan nimo kining pagpangilabot sa atong Ginoo. Pakigtambayayong Kaniya, pagmakugihon, ug buhata ang tanan nimong mahimo aron magsugod ka sa pagpamunga og daghang maayong bunga, aron dili ka mahilakip niadtong sa kataposan putlon tungod sa hustisya sa Diyos.
Ginoo kong makugihon sa pagbuhat, wala Ka gayod mohunong sa pagkugi sa pag-ugmad sa yuta sa akong kalag aron ang mga binhi sa Imong kalooy motubo ug mamunga sa maayong bunga nga buot Nimong motungha sa akong kinabuhi. Palihog hatagi ako sa grasya nga akong gikinahanglan aron magmatinud-anon sa inadlaw-adlawng pag-ampo, sa pagbuhat og penitensiya, ug sa pagpangita sa Imong balaang Pulong. Usba ako, hinigugma kong Ginoo, ug patunghaa sa akong kinabuhi ang maayong bunga sa Imong balaang Gingharian. Jesus, nagsalig ako Kanimo.
Nobena kang San Judas
Alang sa mga Kahimtang ug mga Kaso nga Daw Wala nay Paglaom
Mahimong ampoan bisan kanus-a sa tuig, ilabi na sa Oktubre 19–27
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Juan de Capistrano, Pari
Mga Kapilian sa mga Basahon sa Misa
