Nobyembre 27, 2021
Sabado sa Ikatloan ug Upat nga Semana sa Kasagarang Panahon
Mga Pagbasa alang sa Karon
Tan-awa ang among mga kapanguhaan alang sa Adbiyento!
Paminaw sa Iningles
Miingon si Jesus sa iyang mga tinun-an: “Pagbantay nga ang inyong mga kasingkasing dili mahikatulog tungod sa pagpatuyang sa kalipayan ug paghubog ug sa mga kabalaka sa adlaw-adlaw nga kinabuhi, ug nga kanang adlawa dili mokalit pag-abot kaninyo sama sa usa ka lit-ag. Kay kanang adlawa moabot sa tanang nagpuyo sa nawong sa yuta.” Lucas 21:36
Kini ang kataposang adlaw sa tuig liturhiko. Ugma magsugod ang Adbiyento ug ang bag-ong tuig sa Simbahan. Niining adlawa, gipresentar na usab kanato ang usa ka tudling sa Ebanghelyo nga nagtudlo sa kataposang pag-abot ni Kristo. Aron makapangandam kita alang nianang adlawa, ang adlaw nga moatubang kita sa atong Ginoo aron hukman, gipunting ni Hesus ang duha ka seryosong kapeligrohan nga makapaduka sa atong mga kasingkasing ug magbilin kanatong dili andam. Una, miingon Siya nga ang “pagpatuyang sa kasadya ug paghubog” maghimo kanatong dili andam. Ikaduha, miingon Siya nga ang “mga kabalaka sa adlaw-adlaw nga kinabuhi” magbilin usab kanatong dili andam.
Sa literal nga kahulogan, ang pagpatuyang sa kasadya ug paghubog nagpasabot nga ang usa ka tawo nagsalig sa alkohol aron matagbaw sa kinabuhi, ug gigamit niya kini aron magkinabuhi nga puno sa kasadya ug daw walay gikabalak-an. Nagkinabuhi siya alang lamang sa karong higayona ug nangita og katagbawan sa pagpatuyang sa kaugalingong mga tinguha. Ug bisan tuod ang paghubog maoy espesipikong gihisgotan dinhi, daghan ang mga paagi nga gisulayan sa mga tawo aron magkinabuhi sa ingon niini.
Ang tanan gusto nga magmalipayon sa kinabuhi. Dili kita mahimong dili maningkamot aron makab-ot kining kinaiyanhong tinguha. Walay tinuyong mopili nga mahimong dili malipayon. Apan daghang tawo ang kanunayng mopili og mga butang sa kinabuhi nga mosangpot gayod sa pagkadili malipayon ug pagkadili kontento. Gibuhat nila kini tungod sa sayop nga pagtuo nga kini o kadtong buhata makatagbaw kanila. Ug bisan tuod daghang butang ang makahatag og temporaryo o taphaw nga “kalipay,” ang kamatuoran mao nga usa lamang ka butang, ug wala nay lain, ang makahatag sa kalipay ug katagbawan nga atong gipangandoy. Kanang usa ka butang mao ang buhing presensiya sa Diyos sulod sa atong mga kalag.
Ang “mga kabalaka sa adlaw-adlaw nga kinabuhi” bug-at usab nga palas-anon alang sa daghan kaayo. Walay tawo nga tinuyong mopili nga mabalaka. Walay gustong makasinati niining matang sa kasamok sa sulod sa kaugalingon. Ug bisan tuod ang kabalaka mahimong maggikan sa daghang hinungdan—pisikal, sikolohikal ug espirituhanon—usa sa mga nag-unang hinungdan niini mao ang tensiyon nga wala maatubang sa hustong paagi. Ang tensiyon mahimong maggikan sa mga panagbangi sa trabaho, sa panimalay o sulod sa kaugalingong kalag. Kasagaran kining motungha kon ang usa ka kalisdanan atubangon uban sa kahadlok, kalibog, kasuko, pagkawalay paglaom ug uban pa. Sumala ni Jesus, ang pagpadala niining mga kabalaka mahimong magbilin sa usa ka tawo nga dili andam alang sa adlaw sa iyang paghukom sa kataposan sa iyang kinabuhi o sa kataposan sa kalibotan. Apan dili kinahanglan nga ingon niana ang mahitabo. Ang tensiyon ug kabug-at sa pagbati, ug ang kabalaka nga resulta niini, labing epektibong matambalan pinaagi sa pagbalhin sa atong pagtagad gikan sa kalisdanan nga atong nasinati ngadto sa lawom ug hingpit nga pagsalig sa pag-atiman sa Diyos. Sa Misa, human sa “Amahan Namo,” ang pari nag-ampo nga ang Diyos “magluwas kanamo gikan sa tanang kagul-anan” ug nga kami “magpaabot sa bulahang paglaom ug sa pag-abot sa among Manluluwas, si Jesu-Kristo.” Ang pagtuo ug paglaom sa Diyos ug sa Iyang kataposang pag-abot sa kataposan sa panahon mao ang espirituhanong tambal alang sa kabalaka ug kagul-anan nga kanunay natong masinati sa kinabuhi. Ang pagsalig sa atong Ginoo, uban sa bug-os nga pagsalig Kaniya, makapahimo kanato sa pagkab-ot niining malinawon nga kahimtang sa kasingkasing, uban sa malipayong paglaom ug pagsalig.
Pamalandongi karon ang mga butang nga labing nakababag kanimo sa pagkaandam sa pagsugat sa atong Ginoo. Tingali nakigbisog ka sa balikbalik nga mga pagpili nga nagpakita og kinabuhi sa “pagpatuyang sa kalipayan ug paghuboghubog.” O tingali grabe ang imong pakigbisog sa kahingawa, kagul-anan ug kabalaka. Kon mao kini ang imong kahimtang, hibaloi nga naghulat kanimo ang kagawasan. Naghulat kini kanimo kon dawaton ug isabuhay lamang nimo ang kataposang pag-ampo niining pamalandong: “Jesus, misalig ako Kanimo.” Salig Kaniya. Itugyan Kaniya ang imong dili maayong mga desisyon sa kinabuhi. Itugyan Kaniya ang imong sala. Ug itugyan ang tanan nimong kabalaka ug tensiyon nga nakapabalisa sa imong kasingkasing. Samtang ginabuhat nimo kini, paningkamoti nga mopahulay sa mahupayong mga bukton sa atong Ginoo aron hingpit kang maandam alang sa mahimayaong adlaw sa paghukom sa atong Ginoo nga naghulat kanato.
Akong Ginoo nga naghatag og paglaom, Ikaw ug Ikaw lamang ang tubag sa matag pakigbisog sa kinabuhi. Ikaw ug Ikaw lamang ang makalingkawas kanako gikan sa akong mga palas-anon ug sa dili maayong mga pagpili nga akong ginahimo. Tabangi ako nga mosalig Kanimo kanunay ug sa tanang kahimtang sa kinabuhi. Tinuod kong gitugyan ang akong kaugalingon Kanimo ug gipili ko nga himoon Ka nga bugtong sentro sa akong kinabuhi. Jesus, tinuod gayod nga misalig ako Kanimo!
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
Gipasiugda nga hulagway sa ibabaw: Kataposang Paghukom ni Michelangelo, pinaagi sa Wikimedia Commons
.jpg){kind=link}