Nobyembre 28, 2021
Unang Domingo sa Adbiyento (Tuig C)
Mga Pagbasa Karong Adlawa
Paminaw sa Iningles
“Pagbantay kamo sa tanang panahon ug pag-ampo.” Lucas 21:36a
Ang Adbiyento nagsugod sa usa ka tawag sa pagkamabinantayon, sama sa gipakita sa teksto sa ibabaw. Daghang mga teksto sa Kasulatan ang nagtawag kanato niining pagkamabinantayon ug pagpaabot sa pag-abot sa Ginoo. Ang pagkamabinantayon nagpasabot usab nga andam kita. Dili kita maabtan nga wala mangandam. Hunahunaa kon miabot na ang buntag sa Pasko ug sa imong pagmata kalit kang nakaamgo nga nakalimot ka sa pagpangandam! Hunahunaa kon wala kay mga gasa, wala kay napalit nga pagkaon, ug wala kay nahimong mga plano. Siyempre, dili nimo kana tugotan nga mahitabo, apan usahay gitugotan nato kini nga mahitabo sa atong espirituhanong kinabuhi. Kasagaran dili kita andam sa pagsaulog sa pagkatawo ni Kristo sulod sa atong mga kasingkasing.
Ang unang semana sa Adbiyento nagpunting usab sa Ikaduhang Pag-anhi ni Kristo. Mobalik pag-usab si Jesus, uban sa bug-os nga kahalangdon ug himaya, aron sa paghukom sa mga buhi ug sa mga minatay. Gipahayag nato kining kamatuoran matag Domingo sa atong Kredo. Busa, bisan tuod ang Adbiyento usa ka panahon sa pagpangandam alang sa pagsaulog sa unang pag-anhi ni Jesus sa Iyang pagpakatawo, panahon usab kini sa pag-ila nga ang Iyang unang pag-anhi makaabot sa hingpit nga katumanan sa Iyang kataposang mahimayaong pag-anhi.
Sa pagsugod sa Adbiyento, pamalandongi kon unsa ka na kaandam sa pag-anhi ni Jesus. Nangandam ka ba niini uban sa samang kadasig sa imong pagpangandam alang sa Pasko pinaagi sa pagpamalit, pagluto, pagdayandayan, ug uban pa? Mahinam ka bang nagpaabot nianang adlawa nga Siya mobalik? Nangandam ka ba alang sa espirituhanong pagsaulog sa Iyang pagkatawo? Nagmata ug nagmatngon ka ba sa daghang paagi sa pagpakigsulti sa Dios kanimo matag adlaw?
Kon imong makita nga dili ka pa ingon kaandam sa imong gitinguha alang sa Iyang pagbalik diha sa himaya, himoa kining Adbiyento nga panahon sa pagpangandam sa imong kasingkasing. Itugyan ang imong kaugalingon sa pag-ampo, mga espirituhanong pagbansay, pagpamalandong, ug maminaw pag-ayo sa Iyang malumo ug mahimayaong tingog.
Ginoo, sa pagsugod sa Adbiyento, tabangi ako sa pagtutok sa akong mga mata diha Kanimo. Tabangi ako sa pag-abli sa akong mga dalunggan sa Imong tingog. Ug tabangi ako sa pag-abli sa akong kasingkasing sa Imong mahimayaong presensya. Hinaot nga magmatngon ako Kanimo sa matag paagi nga buot Nimong pag-anhi kanako. Jesus, misalig ako Kanimo.
Tan-awa ang tanan namong mga Kapanguhaan alang sa Adbiyento
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Adbiyento
Mga Santos/Kasaulogan Karong Adlawa
Mga Kapilian sa mga Basahon sa Misa
