Disyembre 12, 2021
Ikatulong Domingo sa Adbiyento (Tuig C)
Mga Pagbasa Karong Adlawa
Paminaw sa Iningles
Si Juan mitubag kanilang tanan, nga nag-ingon, “Ako nagbunyag kaninyo sa tubig, apan moabot ang usa nga mas gamhanan kay kanako. Dili ako takos sa paghubad sa mga higot sa Iyang mga sandalyas. Siya magbunyag kaninyo sa Espiritu Santo ug sa kalayo. Anaa sa Iyang kamot ang Iyang nigo aron hinloan ang Iyang giukan ug tigomon ang trigo ngadto sa Iyang kamalig, apan ang tahop Iyang sunogon sa kalayo nga dili mapalong.” Lucas 3:16–17
Niining Dominggoha, gihatagan na usab kita sa mahimayaong pagpamatuod ni San Juan Bautista. Niining wali ni Juan, siya nag-ingon nga si Jesus moabot ug magbunyag “sa Espiritu Santo ug sa kalayo.” Ang hulagway sa pagbunyag “sa kalayo” maayong pamalandongan. Ilabina, kini nagpadayag kanato sa lawom nga pagputli nga gitinguha ni Jesus alang sa atong mga kalag.
Unsay kahulogan sa pagkaputli? Una sa tanan, ang pagputli sa atong kalag masakit. Apan kini usa ka kasakit nga adunay katam-is. Ang pagbiya sa sala ug ang pagduol sa Diyos nagkinahanglan og dakong sakripisyo ug pagtugyan sa kaugalingon. Nagkinahanglan usab kini nga atong tugotan ang Diyos sa pagbuhat og gamhanang mga butang sulod kanato. Ug ang labing gamhanang buhat nga gusto sa Diyos nga himoon mao ang pagputli kanato.
Ang atong pagtuong Katoliko nagpadayag kanato sa kamatuoran sa Purgatoryo human sa atong kamatayon. Ang Purgatoryo giingong usa ka dapit sa dakong espirituhanong kasakit, apan sa makausa pa, kini usa ka kasakit nga adunay katam-is. Masakit kini tungod kay kuhaon gikan kanato ang tanan natong gigunitan nga gusto sa Diyos nga atong buhian. Masakit kini tungod kay moagi kita sa hingpit nga pagbag-o sa atong pagkatawo ug sa atong gihigugma. Makakat-on kita sa paghigugma sa Diyos ug sa Diyos lamang. Ug sa atong paggakos sa paghigugma sa Diyos, makakat-on kita sa paghigugma sa tanang tawo.
Matam-is usab kini tungod kay, samtang giputli kita, mas maduol kita sa Diyos sa walay sukod ug motubo sa pagkabalaan. Kini magwagtang sa palas-anon sa sala ug maghatag kanato og kagawasan sa paghigugma sumala sa angay natong paghigugma.
Apan ang atong pagputli dili angay magsugod lamang sa Purgatoryo. Kitang tanan gitawag sa pagsulod nianang proseso sa pagputli dinhi ug karon. Gitawag kita sa pagpaminaw ug pagtuman sa mga pulong ni Juan Bautista karong adlawa ug sa paghinulsol sa tanan nga nagpugong kanato sa pagkabalaan sa kinabuhi.
Pamalandongi karong adlawa ang pagputli nga tingali gitawag ka sa Diyos nga agian. Unsa man ang imong gigunitan nga gusto Niyang makagawas ka gikan niini? Itugyan ang imong kaugalingon sa makaputling kalayo sa gugma sa Diyos ug tugoti nga kanang gugma maghinlo kanimo niining panahon sa Adbiyento.
Ginoo, nangandoy gayod ako nga Imong putlion ang akong kalag. Nagtinguha gayod ako sa pagkabalaan sa kinabuhi. Tabangi ako sa pagsugod niining proseso dinhi ug karon aron masugdan nako ang pagsinati sa kalipay ug kagawasan nga Imong gitagana alang kanako. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Tan-awa ang among mga kapanguhaan alang sa Adbiyento!
Santos sa Adlaw – Birhen sa Guadalupe—Pista sa USA
Dili saulogon isip liturhikanhong handumanan karong tuiga kay natunong kini sa Domingo
Mga Kapilian sa mga Basahon sa Misa
