Biyernes, Disyembre 17, 2021
Adlaw sa Semana sa Adbiyento
Mga Pagbasa Karong Adlawa
Mga Antipona nga “O” sa Adbiyento
Disyembre 17–23
Paminaw sa Iningles
Si Eleazar nahimong amahan ni Matthan, si Matthan amahan ni Jacob, ug si Jacob amahan ni Jose, ang bana ni Maria. Gikan kaniya natawo si Jesus nga gitawag og Kristo. Matthew 1:15b–16
Karong adlawa, atong sugdan ang usa ka “oktaba” sa diha-diha nga pagpangandam alang sa pagkatawo ni Kristo. Human niining oktaba, mosulod kita sa mahimayaong Solemnidad sa Pasko!
Karong adlawa, gipresentar kanato ang taas nga kagikan ni Jesus. Ang mga bersikulo 2–16 sa Unang Kapitulo sa Ebanghelyo ni Mateo nagpakita kanato og tulo ka hut-ong nga adunay napulo ug upat ka katigulangan matag usa. Si Abraham ang sinugdanan sa kagikan ug si Jesus ang kataposan niini. Bisan tuod daghang makaiikag nga kamatuoran ang makuha sa usa ka eskolar sa Balaang Kasulatan gikan niining kagikan ug sa tanan nga gihisgotan niini, ang kinauyokan sa kahulogan niini makita sa Unang Bersikulo: “Ang basahon sa kagikan ni Jesu-Kristo, ang Anak ni David, ang anak ni Abraham.” Gipakita niini ang direktang sumpay gikan sa saad sa Diyos ngadto kang Abraham hangtod sa katumanan niini diha sa persona sa Anak sa Diyos.
Usa sa atong makita sa katumanan niining saara mao ang kamatuoran nga matinumanon ang Diyos. Tinuod, milabay ang daghang siglo una matuman ang Iyang saad kang Abraham, apan natuman gihapon kini, ug halos walay pagduhaduha nga hilabihan ang kalipay ni Abraham sa iyang pagsaksi sa mahimayaong pagkatawo sa usa sa iyang mga kaliwat isip Manluluwas sa Kalibotan.
Nagpasabot usab kini kanato nga ang gitakdang panahon ug ang mga pamaagi sa Diyos sagad lahi sa atong unang mahunahuna. Makahunahuna kita og daghang “maayong” ideya ug maglaom nga matuman kini. Apan kasagaran, kon dili dayon kini mahitabo sumala sa atong gilaoman, mahimo kitang mawad-an og kadasig.
Karong adlawa, kat-oni ang leksiyon sa hingpit nga “dugayng” plano sa Diyos. Nahibalo Siya sa Iyang gibuhat ug Iyang gipahinabo ang katumanan sa Iyang plano alang kanatong tanan. Hinay-hinay ug tinuyo Niya kitang giyahan sa dalan paingon sa kaluwasan ug kalinaw. Tingali dili kini mao ang atong paagi sa pagbuhat sa mga butang, apan kini ang hingpit nga paagi.
Pamalandongi karong adlawa ang plano sa Diyos alang sa imong kinabuhi. Gitawag ka ba Niya sa pagpailob ug paglahutay sa kalisdanan? Gipangayo ba Niya kanimo ang usa ka pagsalig nga lisod apan hingpit? Gipangayo ba Niya nga itugyan nimo ang imong kaugalingong mga ideya ug mga ambisyon? Oo, gipangayo Niya kining tanan ug labaw pa. Itugyan pag-usab ang imong kaugalingon sa hingpit nga plano nga anaa sa kasingkasing sa atong Amahan sa Langit, ug giyahan ka Niya sa matag lakang sa imong panaw.
Ginoo, nasayod ako nga hingpit ang Imong mga pamaagi ug nga ang Imong mga plano sagad dili mao ang akong kaugalingong mga plano. Tabangi ako nga buhian ang akong kaugalingong mga ideya ug mga tinguha ug nga mas bug-os kong itugyan ang akong kaugalingon, uban sa pagsalig, ngadto sa tanan nga Imong giandam alang kanako. Ginoo, hingpit ang Imong kaalam. Tabangi ako nga motuo niini sa tibuok kong kasingkasing. Jesus, misalig ako Kanimo.
Tan-awa ang tanan namong mga Kapanguhaan alang sa Adbiyento
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Adbiyento
Mga Santos/Kasaulogan Karong Adlawa
Mga Kapilian sa mga Basahon sa Misa
