Marso 14, 2022
Lunes sa Ikaduhang Semana sa Kwaresma
Mga Pagbasa Karong Adlawa
Paminaw sa Iningles
“Ayaw na kamo paghukom ug dili kamo pagahukman. Ayaw na kamo pagkondenar ug dili kamo pagakondenahon.” Lucas 6:37
Nakasulay ka na ba nga sa unang higayon nimong pagkakita sa usa ka tawo, bisan wala pa nimo siya maestorya, nakahimo ka na dayon og konklusyon bahin kaniya? Tingali kay morag dili siya gustong makigduol, walay makita nga ekspresyon sa iyang nawong, o morag lahi ang iyang gihunahuna. Kon magmatinud-anon kita sa atong kaugalingon, kinahanglan natong angkonon nga sayon ra kaayo ang paghukom dayon sa uban. Sayon rang maghunahuna dayon nga tungod kay morag dili sila gustong makigduol, dili mahigalaon, walay makita nga kainit sa ilang pagtagad, o morag lahi ang ilang gihunahuna, aduna gayod silay problema.
Ang lisod buhaton mao ang hingpit nga pagpugong sa atong paghukom sa uban. Lisod ang dili dayon pagduda kanila ug ang paghunahuna lamang sa labing maayo bahin kanila.
Sa laing bahin, mahimo usab kitang makatagbo og mga tawo nga maayo kaayong moarte. Hapsay silang mosulti ug matinahoron; motan-aw sila sa atong mga mata ug mopahiyom, makiglamano ug motagad kanato nga puno sa pagkamabination. Mahimo kang mobiya nga maghunahuna, “Sus, maayo gyod kaayo modala sa iyang kaugalingon kadtong tawhana!”
Ang problema niining duha ka paagi sa pagtan-aw mao nga dili man gayod atong katungod ang paghukom kon maayo ba o daotan ang usa ka tawo. Tingali ang tawo nga maayo og unang impresyon usa lamang ka maayong “politiko” nga kahibalo modani sa uban. Apan ang maayong pagpakita mahimong malimbongon.
Ang mahinungdanong punto dinhi, sumala sa gisulti ni Jesus, mao nga kinahanglan kitang maningkamot nga dili magmahukmanon sa bisan unsang paagi. Dili gayod nato katungod ang paghukom. Ang Dios mao ang maghuhukom sa maayo ug sa daotan. Siyempre, angay natong tan-awon ang maayong mga buhat ug magmapasalamaton kon makita nato kini, ug gani dayegon ang kaayo nga atong makita. Ug siyempre, angay natong matikdan ang dili maayong pamatasan, maghatag og pagtul-id kon gikinahanglan, ug buhaton kini uban sa gugma. Apan lahi kaayo ang paghukom sa mga buhat kay sa paghukom sa tawo. Dili nato angay hukman ang tawo, sama nga dili usab kita gustong hukman o kondenahon sa uban. Dili nato gusto nga magtuo ang uban nga nahibalo sila sa sulod sa atong kasingkasing ug sa atong mga tuyo.
Tingali usa ka mahinungdanong leksiyon nga atong makuha niining pahayag ni Jesus mao nga ang kalibotan nagkinahanglan og mas daghang tawo nga dili mahukmanon ug dili mokondenar sa uban. Nagkinahanglan kita og mas daghang tawo nga kahibalo mahimong tinuod nga mga higala ug mohigugma nga walay kondisyon. Ug gusto sa Dios nga mahimo kang usa kanila.
Pamalandongi karong adlawa kon unsa ka kasagarang mohukom sa uban, ug pamalandongi kon unsa ka kamaayo sa paghatag sa matang sa panaghigalaay nga gikinahanglan sa mga tawo sa imong palibot. Sa kataposan, kon maghatag ka niining matang sa panaghigalaay, lagmit panalanginan ka usab og mga tawo nga motanyag kanimo sa samang matang sa panaghigalaay! Ug pinaagi niini, kamong duha mapanalanginan!
Ginoo, hatagi ako og kasingkasing nga dili mahukmanon. Tabangi ako sa paghigugma ug pagdawat sa matag tawo nga akong mahimamat uban sa balaang gugma. Tabangi ako nga makabaton sa gugma nga akong gikinahanglan aron matul-id ang ilang sayop nga mga buhat uban sa kalumo ug kalig-on, apan makakita usab lapas sa makita sa gawas ug makaila sa tawo nga Imong gibuhat. Sa baylo, hatagi ako sa tinuod nga gugma ug panaghigalaay sa uban aron makasalig ako ug makatagamtam sa gugma nga gusto Nimong maangkon ko. Jesus, misalig ako Kanimo.
40 ka Adlaw sa Tiilan sa Krus:
Usa ka Pagtan-aw sa Gugma Gikan sa Kasingkasing sa Atong Bulahang Inahan
Ikapulong Pamalandong – Ang Espada sa Kasubo
(Lun. sa Ikaduhang Semana sa Kwaresma)
Nobena kang San Jose
Marso 10–18
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Kapanguhaan alang sa Kwaresma
Mga Pamalandong sa Balaang Kasulatan alang sa Kwaresma
Mga Santos/Kasaulogan Karong Adlawa
Mga Kapilian sa mga Basahon sa Misa
