Lunes, Hunyo 6, 2022
Handumanan sa Mahal nga Birhen Maria, Inahan sa Simbahan
Lunes human sa Pentekostes
Paminaw sa Iningles
Sa dihang nakita ni Jesus ang iyang inahan ug ang tinun-an nga iyang gihigugma nga nagbarog didto, miingon siya sa iyang inahan, “Babaye, ania ang imong anak.” Unya miingon siya sa tinun-an, “Ania ang imong inahan.” Ug sukad niadtong taknaa gidala siya sa tinun-an ngadto sa iyang panimalay. Juan 19:26-27
Niadtong Marso 3, 2018, gipahibalo ni Papa Francisco nga usa ka bag-ong handumanan ang saulogon sa Lunes human sa Domingo sa Pentekostes, nga ginganlag “Ang Mahal nga Birhen Maria, Inahan sa Simbahan.” Sukad niadto, kini nga handumanan gidugang sa Kinatibuk-ang Kalendaryong Romano ug saulogon sa tibuok Simbahan.
Sa pagtukod niining handumanana, si Kardinal Robert Sarah, Prefekto sa Kongregasyon alang sa Balaang Pagsimba, miingon:
Kini nga pagsaulog motabang kanato sa paghinumdom nga ang pagtubo sa Kristohanong kinabuhi kinahanglang nakagamot sa Misteryo sa Krus, sa paghalad ni Cristo sa iyang kaugalingon diha sa Eukaristikong Bangkete ug sa Inahan sa Manunubos ug Inahan sa mga Tinubos, ang Birhen nga naghalad sa iyang kaugalingon ngadto sa Dios.
“Nakagamot” sa Krus, sa Eukaristiya, ug sa Mahal nga Birhen Maria nga mao ang “Inahan sa Manunubos” ug ang “Inahan sa mga Tinubos.” Pagkanindot nga mga pagsabot ug makadasig nga mga pulong gikan niining balaang Kardinal sa Simbahan.
Ang Ebanghelyo nga gipili alang niining handumanana nagpakita kanato sa balaang hulagway sa Mahal nga Inahan nga nagbarog atubangan sa Krus sa iyang Anak. Samtang nagbarog siya didto, nadungog niya si Jesus nga miingon, “Giuhaw ako.” Gihatagan Siya ug bino pinaagi sa usa ka espongha ug unya mipahayag, “Natuman na.” Ang Mahal nga Inahan ni Jesus, ang Inahan sa Manunubos, nagbarog isip saksi samtang ang Krus sa iyang Anak nahimong tinubdan sa katubsanan sa kalibotan. Sa Iyang pag-inom niadtong kataposang bino, gihingpit Niya ang pagtukod sa Bag-o ug Walay Kataposang Panihapon sa Paskuwa, ang Balaang Eukaristiya.
Dugang pa, sa wala pa mabugto ang ginhawa ni Jesus, gipahayag Niya ngadto sa Iyang inahan nga siya mao na ang “Inahan sa mga Tinubos,” nga sa ato pa, ang inahan sa matag sakop sa Simbahan. Kining paghatag ni Jesus sa Iyang inahan ngadto sa Simbahan gipadayag sa Iyang pag-ingon, “Ania ang imong anak…Ania ang imong inahan.”
Samtang atong gisaulog kining bag-o ug matahom nga handumanan sa tibuok Simbahan, pamalandongi ang imong relasyon sa Krus, sa Eukaristiya ug sa imong langitnong inahan. Kon andam kang mobarog tapad sa Krus, motutok niini uban sa atong Mahal nga Inahan, ug mosaksi sa pagbubo ni Jesus sa Iyang bililhong dugo alang sa kaluwasan sa kalibotan, nan gihatagan ka usab sa pribilehiyo nga makadungog Kaniya nga moingon kanimo, “Ania ang imong inahan.” Pabiling duol sa imong langitnong inahan. Pangayoa ang iyang inahanong pag-atiman ug panalipod ug tugoti nga ang iyang mga pag-ampo magpaduol kanimo sa iyang Anak matag adlaw.
Minahal kaayong Inahan Maria, Inahan sa Dios, akong inahan, ug Inahan sa Simbahan, iampo ako ug ang tanan mong mga anak nga nanginahanglan pag-ayo sa kalooy sa imong Anak nga gibubo gikan sa Krus alang sa katubsanan sa kalibotan. Hinaot nga ang tanan mong mga anak mas masuod pa gayod kanimo ug sa imong Anak, samtang among gitutokan ang himaya sa Krus, ug samtang among gidawat ang Labing Balaang Eukaristiya. Inahan Maria, iampo mo kami. Jesus, misalig ako Kanimo!
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Norberto, Obispo—Opsiyonal nga Handumanan
Dili saulogon isip liturhikanhong handumanan karong tuiga kay natunong kini sa Handumanan sa Mahal nga Birhen Maria, Inahan sa Simbahan
Dugang nga Basahon – Bulahang Birhen Maria, Inahan sa Simbahan
Mga Kapilian sa mga Basahon sa Misa
Pangunang hulagway sa ibabaw: Stiftskirche sa Hechingen ni Fidel Schabet
Sugod sa Hunyo 7, 2022, mosulod kita sa Panahon sulod sa Tuig:
Panahon sulod sa Tuig: Mga Semana 1–17
Amazon – Google Play – iTunes
