Hulyo 23, 2022
Sabado sa Ikanapulog-unom nga Semana sa Ordinaryong Panahon
Mga Pagbasa Karong Adlawa
Santa Brigida sa Sweden, Relihiyosa—Opsiyonal nga Handumanan
Paminaw sa Iningles
“Pasagdi silang motubo nga mag-uban hangtod sa ting-ani; unya sa ting-ani ingnon ko ang mga mag-aani, ‘Tigoma una ang mga sagbot ug bugkosa aron sunogon; apan hiposa ang trigo sa akong kamalig.’” Mateo 13:30
Ang kadaotan sa atong palibot angay nga tataw sa mga nagtan-aw pinaagi sa mga mata sa pagtuo. Igo lamang natong itandi ang tanan nga gipadayag sa atong Ginoo kanato pinaagi sa Kasulatan ug sa Simbahan ngadto sa nagkalainlaing mga mithi ug opinyon sa kalibotan. Kon buhaton nato kini, matingala kita sa dakong kalainan tali kanila.
Kon gamiton nato ang hulagway niini nga sambingay, mahisama kini sa mag-uuma nga mogawas aron susihon ang iyang tanom nga trigo. Samtang nagsusi siya, makita niya ang mga sagbot nga nagsagol sa trigo. Bisan tuod nakita niya nga nagtubo silang mag-uban, nahibalo usab siya nga dili niya maluka ang mga sagbot nga dili maapil ang trigo. Busa imbes nga mabalaka sa pagtubo sa mga sagbot, itumong niya ang iyang panan-aw sa ting-ani, sa dihang hiposon na ang trigo ug tigomon ug sunogon ang mga sagbot.
Mao usab kini ang angay sa atong kinabuhi. Dali kitang matintal sa pagkawalay-paglaom kon magtutok lamang kita sa kadaotan sa atong kalibotan. Dili nato kini angayng ibaliwala, apan dili usab kita angayng mabalaka pag-ayo niini. Mahimo lamang kini kon kita, sama sa mag-uuma, magpabiling nagtutok sa “ting-ani.” Ang dakong pag-ani nga atong gipaabot mao ang takna sa hustisya sa Diyos, sa dihang tul-iron Niya ang matag sayop ug ilain ang maayo gikan sa daotan. Mopatigbabaw ang hustisya sa kataposan bisan tuod dili pa kini dayag dinhi ug karon.
Pamalandongi karon kon sa unsang mga paagi nakaapekto kanimo ang mga kadaotan sa atong kalibotan. Tingali nakapaluya kanimo ang walay hunong nga pag-abot sa daotang balita sa midya. O tingali nakasinati ka og nagkalainlaing kadaotan gikan sa uban sa imong adlaw-adlaw nga kinabuhi. Bisan unsa pa man ang imong kahimtang, ayaw kakurat o kapandol sa pagtuo tungod sa mga pag-atake sa Daotan. Ipadayon ang pagtutok sa atong Ginoo ug salig sa hingpit sa Iyang umaabot nga balaang hustisya.
Ginoo sa tanang hustisya, misalig ako sa Imong saad nga magmatinud-anon sa tanang butang. Samtang akong makita ug masinati ang nagkalainlaing kadaotan niining kalibotana, tabangi ako nga dili gayod mahulog sa ilang lit-ag o madani kanila. Lingkawa ako gikan sa pagduhaduha ug pagkawalay-paglaom ug hatagi ako og hingpit nga paglaom sa Imong saad sa hustisya ug kaluoy. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw: Santa Bridget sa Sweden
Mga Kapilian sa mga Pagbasa sa Misa
Pangunang Hulagway: Museo Nacional Thyssen-Bornemisza, Madrid
