Agosto 16, 2022
Martes sa Ika-kawhaan nga Semana sa Kasagarang Panahon
Mga Pagbasa Karong Adlawa
Santo Esteban sa Hungariya—Opsiyonal nga Handumanan
Paminaw sa Iningles
“Apan daghan sa mga nauna ang maulahi, ug ang mga naulahi mauna.” Mateo 19:30
Kining mubo nga pahayag, nga nahimutang sa kataposan sa Ebanghelyo karong adlawa, daghan og gipadayag. Gipadayag niini ang panagsumpaki tali sa kalibotanong kalamposan ug sa walay kataposang kalamposan. Kasagaran kaayo, nangita kita sa kalibotanong kalamposan apan wala nato pangitaa ang mga bahandi nga molungtad hangtod sa kahangtoran.
Sugdan nato sa “daghan sa mga nauna.” Kinsa kining mga tawhana? Aron masabtan kini, kinahanglan natong masabtan ang kalainan tali sa “kalibotan” ug sa “Gingharian sa Diyos.” Dinhi, ang kalibotan nagpasabot sa pagkapopular nga pulos kakawangan sulod sa bisan unsang kultura. Ang kalamposan, dungog, kawang nga himaya, ug uban pang susama niini maoy kauban sa kalibotanong pagkapopular ug kalamposan. Ang daotan mao ang agalon niining kalibotana ug kanunay siyang maningkamot sa pagbayaw niadtong nag-alagad sa iyang dili balaang kabubut-on. Apan tungod niini, daghan kanato ang madani ug maganoy niining matang sa pagkabantogan. Usa kini ka suliran, ilabina kon magsugod na kitag pagsukod sa atong pagkatawo pinasikad sa mga opinyon sa uban.
Ang “daghan sa mga nauna” mao kadtong gibayaw sa kalibotan isip mga bantog nga hulagway ug mga sumbanan niining matang sa kalamposan nga gidayeg sa kadaghanan. Usa kini ka kinatibuk-ang pahayag nga dili gayod magamit sa matag piho nga kahimtang ug tawo. Apan angayng ilhon kining kinatibuk-ang kahilig. Ug sumala niining teksto sa Kasulatan, kadtong maganoy niining matang sa kinabuhi mahimong “ulahi” sa Gingharian sa Langit.
Itandi kini niadtong mga “una” sa Gingharian sa Diyos. Kining balaang mga kalag mahimong pasidunggan o dili pasidunggan niining kalibotana. Mahimong adunay makakita sa ilang pagkamaayo ug mopasidungog kanila (sama sa pagpasidungog kang Santa Madre Teresa), apan kasagaran kaayo, sila tamayon ug isipon nga dili tilinguhaon sumala sa kalibotanong sukdanan.
Unsa man ang mas importante? Unsa gayod ang imong pilion alang sa tibuok kahangtoran? Mas gusto ba nimo nga maayo ang pagtan-aw sa uban kanimo niining kinabuhia, bisan pa kon nagpasabot kini sa pagkompromiso sa mga mithi ug sa kamatuoran? O gipunting ba nimo ang imong mga mata sa kamatuoran ug sa walay kataposang mga ganti?
Pamalandongi karong adlawa ang tumong sa pagtigom og bahandi sa Langit ug ang walay kataposang ganti nga gisaad niadtong nagkinabuhi nga matinumanon. Walay daotan kon maayo ang pagtan-aw sa uban kanimo niining kalibotana, apan dili gayod nimo tugotan nga ang maong tinguha maoy magbuot kanimo o makapahilayo sa imong panan-aw gikan sa mga butang nga walay kataposan. Pamalandongi kon unsa ka maayo nimo kini nabuhat ug paningkamoti nga ang mga ganti sa Langit mao lamang ang imong tumong.
Akong walay kataposang Ginoo, palihog tabangi ako sa pagpangita Kanimo ug sa Imong Gingharian labaw sa tanan. Hinaot nga ang pagpahimuot Kanimo ug ang pag-alagad sa Imong labing balaang kabubut-on mao lamang ang bugtong tinguha ko sa kinabuhi. Tabangi ako sa pagbiya sa dili maayong pagkabalaka bahin sa kalibotanong pagkabantogan ug pagkapopular, ug sa pagtagad lamang sa Imong pagtan-aw kanako. Gihatag ko Kanimo, minahal nga Ginoo, ang akong tibuok pagkatawo. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Esteban sa Hungariya
Mga Kapilian sa mga Basahon sa Misa
_-_James_Tissot_-_overall.jpg){kind=link}