Agosto 18, 2022
Huwebes sa Ikakawhaang Semana sa Ordinaryong Panahon
Mga Pagbasa Karong Adlawa
Paminaw sa Iningles
“Nangadto sa kadalanan ang mga sulugoon ug gitigom nila ang tanan nilang nakit-an, daotan ug maayo, ug napuno sa mga dinapit ang tigomanan. Apan sa pagsulod sa hari aron makigkita sa mga dinapit, nakita niya didto ang usa ka tawo nga wala magsul-ob og bisti alang sa kasal. Miingon siya kaniya, ‘Higala, giunsa man nimo pagsulod dinhi nga wala ka magbisti alang sa kasal?’ Apan wala gayod siya makatubag. Unya miingon ang hari sa iyang mga alagad, ‘Gaposa ang iyang mga kamot ug tiil, ug ilabay siya sa kangitngit sa gawas, diin adunay pagminatay ug pagkagot sa mga ngipon.’ Daghan ang gidapit, apan diyutay ra ang gipili.” Mateo 22:10-14
Mahimong makapakurat kini sa sinugdan. Niining sambingaya, daghan ang gidapit sa hari ngadto sa kombira sa kasal sa iyang anak nga lalaki. Daghan ang mibalibad sa pagdapit. Busa iyang gipadala ang iyang mga sulugoon aron tigomon ang bisan kinsa nga buot motambong, ug napuno ang tigomanan. Apan sa pagsulod sa hari, dihay usa nga wala magbisti alang sa kasal, ug makita nato sa teksto sa ibabaw kon unsay nahitabo kaniya.
Sa makausa pa, sa unang pagbasa mahimong makapakurat kini. Angay ba gayod nga gaposon ang mga kamot ug tiil niining tawhana ug ilabay siya sa kangitngit sa gawas diin adunay pagminatay ug pagkagot sa mga ngipon, tungod lamang kay wala siya magsul-ob sa hustong bisti? Siyempre dili.
Aron masabtan kining sambingaya, kinahanglan natong masabtan ang gisimbolohan sa bisti alang sa kasal. Kining bistia nagsimbolo sa usa nga nagsul-ob kang Kristo ug, sa piho gayod, sa usa nga tungod niini napuno sa gugma. Adunay usa ka makapainteres kaayong leksiyon nga atong makat-onan niining tekstoha.
Una, ang pagtambong niining tawhana sa kombira sa kasal nagpasabot nga mitubag siya sa pagdapit. Timailhan kini sa pagtuo. Busa, kining tawhana nagsimbolo gayod sa usa nga adunay pagtuo. Ikaduha, ang iyang pagkawalay bisti alang sa kasal nagpasabot nga siya adunay pagtuo ug nagtuo sa tanan nga gisulti sa Diyos, apan wala niya tugoti nga kining pagtuoha motuhop sa iyang kasingkasing ug kalag hangtod nga mamunga kini og tinuod nga pagkakabig ug, busa, tinuod nga gugma. Ang kakulang sa gugma niining batan-ong lalaki mao ang hinungdan sa iyang pagkahinukman sa silot.
Ang makapainteres nga punto mao nga posible kitang adunay pagtuo apan kulang sa gugma. Ang pagtuo mao ang pagtoo sa gipadayag sa Diyos kanato. Apan bisan ang mga demonyo nagtuo usab! Ang gugma nagkinahanglan nga atong dawaton sa kinahiladman kanang kamatuorana ug tugotan kini nga magbag-o sa atong kinabuhi. Importante kining masabtan kay usahay makigbisog usab kita niining samang kahimtang. Usahay makita nato nga nagtuo kita sa lebel sa pagtuo, apan wala nato kini kinabuhii. Gikinahanglan ang duha alang sa kinabuhi nga adunay tinuod nga pagkabalaan.
Pamalandongi karon ang imong pagtuo sa tanan nga gisulti sa Diyos, ug ang gugma nga gilaom nga mamunga niini sa imong kinabuhi. Ang pagka-Kristohanon nagpasabot nga tugotan nimo ang imong pagtuo nga motuhop gikan sa imong hunahuna ngadto sa imong kasingkasing ug kabubut-on.
Ginoo sa tanang gugma, hinaot nga makabaton ako og lawom nga pagtuo Kanimo ug sa tanan nga Imong gisulti. Hinaot nga kanang pagtuoha motuhop sa akong kasingkasing ug mamunga og gugma alang Kanimo ug sa uban. Hesus, misalig ako Kanimo.
Nobena kang Santa Monica
Agosto 18–26
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Mga Pista Karong Adlawa
Mga Kapilian sa mga Basahon sa Misa
Advertisement
