Septiyembre 17, 2022
Sabado sa Ika-24 nga Semana sa Ordinaryong Panahon
Mga Pagbasa Karong Adlawa
San Robert Bellarmine, Obispo ug Doktor—Opsiyonal nga Paghandum
Santa Hildegard of Bingen, Birhen ug Doktor sa Simbahan—Opsiyonal nga Paghandum
Paminaw sa Iningles
“Ang anaa sa daplin sa dalan mao kadtong nakadungog, apan moabot ang Yawa ug kuhaon ang pulong gikan sa ilang mga kasingkasing aron dili sila motuo ug maluwas.” Luke 8:12
Kining pamilyar nga sugilanon naghulagway sa upat ka posibleng paagi sa atong pagpamati sa Pulong sa Diyos. Ang uban sama sa dalan nga kanunayng tunobtunoban, ang uban sama sa yutang batoon, ang uban sama sa yutang katunokan, ug ang uban sama sa tabunok nga yuta.
Sa matag usa niining mga hulagway, adunay posibilidad nga motubo ang Pulong sa Diyos. Ang tabunok nga yuta naghulagway sa pagdawat sa Pulong ug sa pagpamunga niini. Ang binhi taliwala sa mga tunok naghulagway sa Pulong nga mitubo apan ang bunga natuok sa adlaw-adlaw nga mga kabalaka ug mga tentasyon. Ang binhi nga gipugas sa yutang batoon naghulagway sa Pulong nga mitubo, apan sa kataposan namatay sa dihang naglisod ang kinabuhi. Apan ang unang hulagway, ang binhi nga nahulog sa dalan, mao ang labing dili maayo sa tanan. Niining kahimtanga, ang binhi wala gani motubo. Gahi kaayo ang yuta nga dili kini makalusot. Ang dalan mismo walay ikahatag nga sustansiya ug, sumala sa gipadayag sa teksto sa ibabaw, gikawat sa Yawa ang Pulong sa dili pa kini motubo.
Makapasubo nga kining “dalan” nagkayamot ug pagkaylap sa atong panahon karon. Sa pagkatinuod, daghan ang naglisod sa tinuod nga pagpaminaw. Mahimong makadungog kita, apan ang pagkadungog dili pareho sa tinuod nga pagpaminaw. Kasagaran daghan kitag buluhaton, mga dapit nga adtoon, ug mga butang nga nagkuha sa atong pagtagad. Tungod niini, daghang tawo ang maglisod sa tinuod nga pagdawat sa Pulong sa Diyos diha sa ilang mga kasingkasing diin kini motubo.
Pamalandongi karong adlawa ang daghang paagi nga mahimong moabot ang Yawa ug mokawat sa Pulong sa Diyos gikan kanimo. Mahimong yano lamang kini sama sa paghimo kanimong puliki kaayo nga mabalda ka ug dili na nimo kini matuhop. O basin gitugotan nimo ang walay hunong nga kasaba sa kalibotan sa pagsupak sa imong nadungog sa dili pa kini motuhop diha kanimo. Bisan unsa pa ang kahimtang, hinungdanon nga maningkamot ka sa paghimo, bisan man lang, sa unang lakang sa pagpaminaw ug pagsabot. Sa dihang mahimo na nimo kining unang lakang, mahimo ka nang maningkamot sa pagtangtang sa mga “bato” ug “tunok” gikan sa yuta sa imong kalag.
Ginoo kong nagpadayag, tabangi ako nga makadungog sa Imong Pulong, maminaw niini, makasabot niini ug motuo niini. Tabangi ang akong kasingkasing nga sa kataposan mahimong tabunok nga yuta nga Imong sudlan aron mamunga kinig daghang maayong bunga. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos sa Adlaw –
San Robert Bellarmine, Obispo ug Doktor
Santa Hildegard sa Bingen, Birhen ug Doktor sa Simbahan
Mga Kapilian sa mga Basahon sa Misa
Gipasiugda nga Hulagway: Ang Magpupugas ni James Tissot, pinaagi sa Wikimedia Commons
