Oktubre 24, 2022
Lunes sa Ikakatloan nga Semana sa Kasagarang Panahon
Mga Pagbasa Karong Adlawa
San Antonio Maria Claret, Obispo—Opsyonal nga Handumanan
Paminaw sa Iningles
Nagtudlo si Jesus sa usa ka sinagoga sa adlaw nga igpapahulay. Didto may usa ka babaye nga sulod sa napulog walo ka tuig nabaldado tungod sa usa ka espiritu; nagduko siya ug dili gayod makatindog ug tul-id. Sa pagkakita ni Jesus kaniya, gitawag Niya siya ug giingnan, “Babaye, gawasnon ka na sa imong balatian.” Gipandong Niya ang Iyang mga kamot kaniya, ug dihadiha mitindog siya ug tul-id ug mihimaya sa Dios. Lucas 13:10-13
Ang matag milagro ni Jesus tinuod gayod nga usa ka buhat sa gugma alang sa tawo nga giayo. Niining sugilana, kining babayhana nag-antos sulod sa napulog walo ka tuig, ug gipakita ni Jesus ang Iyang kalooy kaniya pinaagi sa pag-ayo kaniya. Ug bisan tuod kini klarong usa ka buhat sa gugma nga direktang gitumong kaniya, daghan pa gayod kitag makat-onan gikan niining sugilana.
Usa ka mensahe nga atong makuha gikan niining sugilana mao nga si Jesus mismo ang nag-una sa pag-ayo. Bisan tuod ang ubang mga milagro gihimo agig tubag sa hangyo ug pag-ampo sa tawo nga giayo, kining milagroha nahitabo tungod lamang sa kaayo ug kalooy ni Jesus. Mopatim-aw nga wala mangayo og kaayohan kining babayhana, apan sa pagkakita ni Jesus kaniya, naluoy Siya kaniya ug giayo siya.
Ingon usab niini kanato: nasayod si Jesus sa atong gikinahanglan sa dili pa kita mangayo Kaniya. Ang atong katungdanan mao ang pagpabiling matinud-anon Kaniya sa tanang panahon ug ang pagkahibalo nga diha sa atong pagkamatinud-anon, ihatag Niya kanato ang atong gikinahanglan bisan sa dili pa kita mangayo.
Ang ikaduhang mensahe naggikan sa kamatuoran nga kining babayhana “mitindog ug tul-id” sa dihang naayo siya. Kini usa ka simbolikong hulagway sa gibuhat sa grasya kanato. Kon mosulod ang Dios sa atong kinabuhi, makahimo kita sa pagtindog ug tul-id, matod pa. Makalakaw kita uban sa bag-ong pagsalig ug dignidad. Atong madiskobrehan kon kinsa kita ug magkinabuhi nga gawasnon diha sa Iyang grasya.
Pamalandongi karon kining duha ka kamatuoran. Nasayod ang Dios sa tanan nimong panginahanglan ug tubagon Niya kini sa panahon nga labing maayo alang kanimo. Usab, kon itugyan Niya kanimo ang Iyang grasya, kini makapahimo kanimo sa pagkinabuhi nga adunay hingpit nga pagsalig isip Iyang anak nga lalaki o babaye.
Ginoo sa tanang grasya, gitugyan ko ang akong kaugalingon Kanimo ug nagsalig ako sa Imong madagayaong kalooy. Nagsalig ako nga tabangan Mo ako sa pagsubay sa Imong mga dalan matag adlaw sa akong kinabuhi uban sa hingpit nga pagsalig. Jesus, nagsalig ako Kanimo.
Nobena kang San Judas
Alang sa mga Sitwasyon ug mga Kasong Daw Wala nay Paglaom
Iampo sa bisan unsang panahon sa tuig, ilabina sa Oktubre 19–27
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Antonio Maria Claret, Obispo
Mga Kapilian sa mga Basahon sa Misa
