Nobyembre 7, 2022
Lunes sa Katloan ug Duha ka Semana sa Kasagarang Panahon
Mga Pagbasa Karong Adlawa
Paminaw sa Iningles
“Pagbantay kamo! Kon makasala ang imong igsoon, badlonga siya; ug kon maghinulsol siya, pasayloa siya. Ug kon makasala siya kanimo pito ka beses sa usa ka adlaw ug mobalik kanimo pito ka beses nga moingon, ‘Nagbasol ako,’ kinahanglan mo siyang pasayloon.” Lucas 17:3-4
Ang hingpit nga pagpasaylo mahimong lisod kaayo usahay. Ilabi na kon ang mao rang tawo makasala kanimo “pito ka beses sa usa ka adlaw,” sumala sa giingon ni Jesus.
Apan ang mga pulong ni Jesus angay natong isilsil sa atong kasingkasing. Wala Siya maghisgot og usa ka mithi nga dili makab-ot; hinuon, realistiko gayod Siya. Kinahanglan kitang mopasaylo, balikbalik ug sa makadaghang higayon. Dili kita angay magpanuko sa paghatag niini, ilabi na niadtong sinserong naghinulsol.
Usa sa unang mga butang nga angay natong matikdan niining teksto mao nga kon adunay makasala kanato, angay nato siyang badlongon. Ang pagbadlong dili angay buhaton aron makabalos; hinuon, kinahanglan kining buhaton aron dapiton siya sa paghinulsol. Mao lamang kini ang hinungdan sa pagbadlong sa uban. Kon mabati nato nga ang tawo nga nakasala kanato andam tingali nga magbag-o, kinahanglan nato siyang badlongon uban sa gugma. Ug kon dawaton niya kini ug mangayo sa atong pasaylo, kinahanglan nato siyang pasayloon.
Apan, sama sa nahisgotan, mahimong lisod gayod kini kon balikbalikon ang sala. Makapakapoy kini ug makapaluya sa kadasig. Ug kon balikbalikon ang usa ka sala, dali rang magduhaduha kon tinuod ba gayod ang pagbasol sa nangayo og pasaylo.
Apan dili kana ang angay natong kabalak-an. Ang atong bugtong tagdon mao ang pagpaminaw niining mga pulonga, “Nagbasol ako.” Mao kini ang sugo ni Jesus. Kon adunay mosulti niining mga pulonga, kinahanglan kitang mopasaylo ug buhaton kini dayon.
Gipadayag usab kanato niining teksto sa Kasulatan ang kamahinungdanon sa pagpahayag sa atong pagbasol ngadto sa mga tawo nga atong napasakitan. Peligroso ang basta na lang maghunahuna nga pasayloon kita sa uban. Dako ang gahom sa aktuwal nga pagsulti ngadto sa uban, “Palihog pasayloa ako, nagbasol ako sa akong sala.” Bisan tuod lisod tingali isulti kining mga pulonga, mga pulong kini nga makahatag og dakong kaayohan.
Pamalandongi karon ang buhat sa pagpangayo og pasaylo ug sa pagpasaylo sa uban. Kitang tanan gihatagan og daghang kahigayonan matag adlaw sa pagpasaylo ug pagpangayo og pasaylo. Ayaw pagpanuko sa pagbuhat niini, ug mapasalamaton ka nga gibuhat mo kini.
Ginoo, tinuod gayod akong nagbasol sa daghang sala nga akong nabuhat batok Kanimo. Palihog pasayloa ako. Kon magmagahi ako sa akong kasingkasing, palihog badlonga ako uban sa gugma. Kon kinahanglan kong mangayo og pasaylo sa uban, palihog hatagi ako sa kaisog sa pagbuhat niini. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Bag-o alang sa Adbiyento ug Pasko!
Mga Pamalandong sa Adbiyento ug Pasko
