Nobyembre 19, 2022
Sabado sa Ikakatloan ug Tulo nga Semana sa Kasagarang Panahon
Mga Pagbasa Karong Adlawa
Paminaw sa Iningles
Midool ang pipila ka mga Saduseo, nga naglimod nga adunay pagkabanhaw, ug nangutana kang Jesus, nga nag-ingon, “Magtutudlo, gisulat ni Moises alang kanamo, Kon ang igsoon sa usa ka tawo mamatay ug magbilin ug asawa apan walay anak, kinahanglan pangasaw-on sa iyang igsoon ang biyuda aron makapaliwat alang sa iyang igsoon. Karon, dihay pito ka managsoon…” Lucas 20:27-29a
Ug mipadayon ang mga Saduseo sa pagpresentar kang Jesus ug usa ka lisod nga kahimtang aron mabitik Siya. Ilang gisaysay ang sugilanon sa pito ka managsoon nga tagsa-tagsang nangamatay nga walay anak. Sa matag kamatayon sa usa, ang sunod nga igsoon mangasawa sa asawa sa unang igsoon. Mao kini ang ilang pangutana: “Karon, sa pagkabanhaw, kang kinsa man nga asawa kadtong babayhana?” Gipangutana nila kini aron malimbongan si Jesus kay, sumala sa giingon sa teksto sa ibabaw, ang mga Saduseo naglimod sa pagkabanhaw sa mga patay.
Siyempre, gitubag sila ni Jesus ug gipatin-aw nga ang kaminyoon alang niining panahona ug dili sa panahon sa Pagkabanhaw. Ang Iyang tubag nagpakyas sa ilang pagsulay sa pagbitik Kaniya, ug ang mga eskriba, nga nagtuo sa pagkabanhaw sa mga patay, midayeg sa Iyang tubag.
Usa sa gipadayag kanato niini nga sugilanon mao nga ang Kamatuoran hingpit ug dili mabuntog. Kanunayng modaog ang Kamatuoran! Pinaagi sa pagsulti sa tinuod, gibutyag ni Jesus ang kabuangan sa mga Saduseo. Gipakita Niya nga walay limbong sa tawo nga makapaluya sa Kamatuoran.
Importante kini nga leksiyon nga angay natong makat-onan kay magamit kini sa tanang bahin sa kinabuhi. Tingali dili pareho sa mga Saduseo ang atong pangutana, apan halos walay pagduhaduha nga sa atong pagpadayon sa kinabuhi, makaatubang kita ug lisod nga mga pangutana. Tingali dili nato tuyo nga bitikon o hagiton si Jesus pinaagi sa atong mga pangutana, apan dili gayod malikayan nga aduna kitay ingon niini nga mga pangutana.
Kini nga sugilanon sa Ebanghelyo angayng mopasalig kanato nga bisan unsa pa ang atong gikalibgan, adunay tubag. Bisan unsa pa ang dili nato masabtan, kon pangitaon nato ang Kamatuoran, makaplagan nato ang Kamatuoran.
Pamalandongi karon kon unsa ang labing naghagit kanimo sa imong panaw sa pagtuo. Tingali usa kini ka pangutana bahin sa kinabuhi human sa kamatayon, o sa pag-antos, o sa paglalang. Tingali usa kini ka butang nga lawom kaayong personal. O tingali niining bag-o, wala ka makagahin ug igong panahon aron makapamalandong ug mga pangutana alang sa atong Ginoo. Bisan unsa pa man kini, pangitaa ang Kamatuoran sa tanang butang ug pangayoa sa atong Ginoo ang kaalam aron matag adlaw mas molalom ka sa pagtuo.
Ginoo, tinuod gayod nga nangandoy akong mahibaloan ang tanan nga Imong gipadayag. Nangandoy akong masabtan kadtong mga butang nga labing makalibog ug mahagiton sa kinabuhi. Tabangi ako matag adlaw sa pagpalalom sa akong pagtuo Kanimo ug sa akong pagsabot sa Imong Kamatuoran. Jesus, nagsalig ako Kanimo.
Nobena kang Kristo nga Hari
Sa naandang paagi, siyam ka adlaw sa dili pa ang Dakong Kasaulogan ni Kristo nga Hari
Ang nobena ampoan matag adlaw gikan sa Nobyembre 11–19
Tan-awa ang among mga kapanguhaan alang sa Adbiyento!
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
