Pag-atubang sa Daotan

Enero 10, 2023
Martes sa Unang Semana sa Ordinaryong Panahon
Mga Pagbasa Karong Adlawa

Paminaw sa Iningles

Didto sa ilang sinagoga adunay usa ka tawo nga gisudlan sa mahugaw nga espiritu; misinggit siya, “Unsay imong labot kanamo, Jesus nga taga-Nazaret? Mianhi ka ba aron sa paglaglag kanamo? Nasayod ako kon kinsa ka—ang Balaan sa Diyos!” Gibadlong siya ni Jesus ug giingnan, “Hilom! Gawas kaniya!” Marcos 1:23–25

Daghang higayon sa Balaang Kasulatan nga direktang giatubang ni Jesus ang mga demonyo. Sa matag higayon, Iyang gibadlong sila ug gigamit ang Iyang awtoridad ibabaw kanila. Ang teksto sa ibabaw naghulagway sa usa niini nga mga hitabo.

Ang kamatuoran nga ang yawa balikbalik nga nagpakita sa iyang kaugalingon diha sa mga Ebanghelyo nagsulti kanato nga ang Daotan tinuod ug kinahanglang atubangon sa hustong paagi. Ug ang hustong paagi sa pag-atubang sa Daotan ug sa iyang mga kaubang demonyo mao ang pagbadlong kanila pinaagi sa awtoridad ni Kristo Jesus mismo, sa malinawon apan dili maduha-duhaon ug may awtoridad nga paagi.

Talagsa ra kaayo nga ang Daotan hingpit nga magpadayag sa iyang kaugalingon kanato sama sa iyang gibuhat ngadto kang Jesus sa teksto sa ibabaw. Ang demonyo direktang nagsulti pinaagi niining tawhana, nga nagpakita nga ang tawo hingpit nga gigamhan niini. Ug bisan tuod dili nato kanunay makita kining matang sa pagpadayag, wala kini magpasabot nga mikunhod ang kalihokan sa Daotan karon. Hinuon, nagpakita kini nga ang awtoridad ni Kristo wala magamit sa mga Kristohanong magtutuo kutob sa gikinahanglan aron mabuntog ang Daotan. Hinuon, kanunay kitang mokulo sa kahadlok atubangan sa daotan ug mapakyas sa pagbarog nga lig-on uban kang Kristo, nga puno sa pagsalig ug gugma.

Nganong nagpadayag man kining demonyoha sa iyang kaugalingon sa ingon ka klarong paagi? Tungod kay kining demonyoha direktang giatubang sa awtoridad ni Jesus. Kasagaran, mas gusto sa yawa nga magpabiling tinago ug malimbongon, nga magpakaaron-ingnon nga anghel sa kahayag aron dili klarong mailhan ang iyang daotang mga pamaagi. Ang mga tawo nga iyang gigamhan kasagaran wala gani masayod kon unsa na kadako ang impluwensiya sa Daotan kanila. Apan kon ang Daotan atubangon sa putli nga presensiya ni Kristo, sa Kamatuoran sa Ebanghelyo nga nagpalingkawas kanato, ug sa awtoridad ni Jesus, kining pag-atubanga sagad mopugos sa Daotan sa pagtubag pinaagi sa pagpadayag sa iyang pagkadaotan.

Pamalandongi karong adlawa ang kamatuoran nga ang Daotan kanunayng naglihok sa atong palibot. Hunahunaa ang mga tawo ug mga kahimtang sa imong kinabuhi diin ang putli ug balaan nga Kamatuoran sa Diyos giatake ug gisalikway. Niining mga kahimtanga, labaw sa bisan unsang uban, gusto ni Jesus nga ihatag kanimo ang Iyang balaang awtoridad aron atubangon ang daotan, badlongon kini, ug gamiton ang maong awtoridad ibabaw niini. Mahimo kini ilabina pinaagi sa pag-ampo ug sa lawom nga pagsalig sa gahom sa Diyos. Ayaw kahadlok sa pagtugot nga gamiton ka sa Diyos aron atubangon ang kalihokan sa Daotan niining kalibotana.

Ginoo, hatagi ako og kaisog ug kaalam sa dihang atubangon ko ang kalihokan sa Daotan niining kalibotana. Hatagi ako og kaalam aron mailhan ko ang iyang pagpanghilabot ug hatagi ako og kaisog aron atubangon ug badlongon siya pinaagi sa Imong gugma ug awtoridad. Hinaot nga ang Imong awtoridad buhi diha sa akong kinabuhi, Ginoong Jesus, ug hinaot nga matag adlaw mahimo akong mas maayong galamiton sa pag-abot sa Imong Gingharian samtang akong giatubang ang daotan nga ania niining kalibotana. Jesus, ako misalig Kanimo.