Enero 11, 2023
Miyerkules sa Unang Semana sa Ordinaryong Panahon
Mga Pagbasa alang Karong Adlawa
Paminaw sa Iningles
Sa pagkagabii, human sa pagsalop sa adlaw, gidala nila ngadto Kaniya ang tanang mga masakiton ug ang mga gisudlan sa mga demonyo. Ang tibuok lungsod nagtigom sa may pultahan. Giayo Niya ang daghang nag-antos sa nagkalainlaing sakit, ug gipapahawa Niya ang daghang mga demonyo. Wala Niya sila tugoti sa pagsulti kay nakaila man sila Kaniya. Mark 1:32–34
Karong adlawa atong mabasa nga si Jesus sa makausa pa “nagpapahawa sa daghang mga demonyo…” Unya gidugangan kini sa maong teksto, “…wala Niya sila tugoti sa pagsulti kay nakaila man sila Kaniya.”
Nganong wala man tugoti ni Jesus kining mga demonyo sa pagsulti? Daghan sa unang mga Amahan sa Simbahan nagpatin-aw nga bisan tuod nasayod ang mga demonyo nga si Jesus mao ang gisaad nga Mesiyas, wala nila hingpit masabti kon unsay kahulogan niini ug kon unsaon Niya pagkab-ot ang Iyang kataposang kadaugan. Busa, dili gusto ni Jesus nga mosulti sila og mga kamatuoran nga katunga lamang bahin Kaniya, sama sa kanunayng ginabuhat sa daotan, ug sa ingon makapahisalaag sa katawhan. Mao nga kanunay gidid-an ni Jesus kining mga demonyo sa pagsulti bahin Kaniya sa atubangan sa kadaghanan.
Mahinungdanon nga masabtan nato nga ang tanang demonyohong espiritu wala makasabot sa tibuok kamatuoran nga ang kamatayon ni Jesus mao gayod ang molaglag sa kamatayon mismo ug maghatag og kagawasan sa tanang tawo. Tungod niini, atong makita nga kining mga puwersa sa daotan padayong naglaraw batok kang Jesus ug misulay sa pag-atake Kaniya sa tibuok Niyang kinabuhi. Ilang gisulsolan si Herodes sa dihang masuso pa si Jesus, nga maoy hinungdan nga napugos Siya sa pagdangop sa Ehipto. Si Satanas mismo mitintal kang Jesus sa wala pa magsugod ang Iyang dayag nga pagpangalagad, aron sulayan pagpasimang si Jesus gikan sa Iyang misyon. Daghang puwersa sa daotan ang padayong miatake kang Jesus sa tibuok Niyang dayag nga pagpangalagad, ilabina pinaagi sa walay hunong nga pagsupak sa mga pangulo sa relihiyon niadtong panahona. Ug mahimong hunahunaon nga sa sinugdan nagtuo tingali kining mga demonyo nga nakadaog sila sa gubat sa dihang nakab-ot nila ang ilang tumong nga ipalansang si Jesus sa krus.
Apan ang kamatuoran mao nga ang kaalam ni Jesus padayong nagpalingogngog niining mga demonyo, ug sa kataposan, pinaagi sa Iyang pagkabanhaw gikan sa mga patay, gihimo Niya ang ilang daotang buhat sa pagpalansang Kaniya sa krus nga usa ka hingpit nga kadaugan batok sa sala ug sa kamatayon mismo. Tinuod nga anaa si Satanas ug ang iyang mga demonyo, apan kon itandi sa kamatuoran ug kaalam sa Dios, kining mga puwersa sa daotan nagpakita sa ilang bug-os nga kabuang ug kahuyang. Sama kang Jesus, kinahanglan natong badlongon kining mga maninintal sa atong kinabuhi ug sugoon sila nga maghilom. Kasagaran kaayo, gitugotan nato ang ilang mga kamatuoran nga katunga lamang nga mopahisalaag ug molibog kanato.
Pamalandongi karong adlawa ang kamahinungdanon sa masaligong pagbadlong sa daotan ug sa daghang bakak nga iyang gitintal kita sa pagtuo. Badlonga siya pinaagi sa kamatuoran ug gahom ni Cristo ug ayaw tagda ang iyang gisulti.
Akong minahal ug makagagahom sa tanan nga Ginoo, modangop ako Kanimo ug Kanimo lamang isip tinubdan sa tanang Kamatuoran ug kahingpitan sa Kamatuoran. Hinaot nga ang Imong tingog lamang ang akong paminawon ug isalikway ko ang daghang pagpanglimbong sa daotan ug sa iyang mga demonyo. Sa Imong bililhong ngalan, Jesus, akong gibadlong si satanas ug ang tanang daotang espiritu, ang ilang mga bakak ug ang ilang mga tintasyon. Gipapahawa ko kining mga espiritu ngadto sa tiilan sa Imong Krus, minahal nga Ginoo, ug giablihan ko ang akong hunahuna ug kasingkasing alang lamang Kanimo. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
