Enero 27, 2023
Biyernes sa Ikatulong Semana sa Panahon Sulod sa Tuig
Mga Pagbasa Karong Adlawa
Santa Angela Merici, Birhen—Opsiyonal nga Handumanan
Paminaw sa Iningles
Miingon si Jesus ngadto sa katawhan: “Ingon niini ang Gingharian sa Diyos: sama kini sa usa ka tawo nga nagsabwag og binhi sa yuta. Matulog siya ug mobangon, gabii ug adlaw, ug ang binhi moturok ug motubo, apan wala siya mahibalo kon giunsa kini. Marcos 4:26–27
Matahom pamalandongon kon sa unsang paagi ang Pulong sa Diyos makausab sa kinabuhi sa mga tawo. Kining mubo nga teksto sa ibabaw nagtandi sa pagpaambit sa Pulong sa Diyos ngadto sa pagpugas og binhi. Ang magpupugas mogawas ug magsabwag og binhi sa yuta, ug dayon magtan-aw kon giunsa pagtubo sa maong binhi ngadto sa usa ka tanom nga mamunga. Ang misteryosong linya nag-ingon, “wala siya mahibalo kon giunsa kini.”
Ingon usab niini ang Pulong sa Diyos. Kon dawaton sa laing tawo ang maong Pulong, gipanalanginan kita nga makapabilin sa daplin ug makasaksi samtang ang maong Pulong mogamot ug magbag-o sa iyang kinabuhi. Siyempre, usahay isabwag nato ang Pulong apan dili kini mogamot. Mahitabo kini tungod sa kagahi sa kasingkasing sa laing tawo o tungod sa paagi sa atong pagpugas. Apan kon ang binhi sa Pulong sa Diyos mogamot gayod, angay kitang mapuno sa katingala ug pagtahod sa paagi sa paglihok sa Diyos diha nianang kalag.
Hunahunaa kining kamatuoran diha sa imong kaugalingong kinabuhi. Giunsa nimo unang pagdawat ang maayong binhi sa Pulong sa Diyos? Tingali pinaagi kini sa usa ka wali, usa ka rekoleksiyon, sa pagbasa sa Balaang Kasulatan, sa usa ka libro, o sa pagpamatuod sa laing tawo. Hunahunaa kon giunsa nimo unang pagdawat ang Pulong sa Diyos diha sa imong kinabuhi ug kon unsay epekto niini kanimo.
Sa dihang ang Pulong sa Diyos nakagamot na diha sa usa ka kalag, balaan nga buhat ang “pagbangon gabii ug adlaw” aron masud-ong kining binhi samtang motubo kini. Sa piho, kinahanglan natong tugotan ang atong kaugalingon nga mahingangha sa misteryosong paagi sa pagbag-o sa usa ka kinabuhi, sa imo mang kaugalingon o sa kinabuhi sa laing tawo. Makapadasig ang pagsud-ong sa kalag sa usa ka tawo samtang magsugod kini sa pag-ibot sa sala gikan sa mga gamot niini, sa pagpangita sa hiyas, sa pagtukod og kinabuhi sa pag-ampo, ug sa pagtubo diha sa gugma sa Diyos.
Kon malisdan ka sa pagsabot niini diha sa imong kaugalingong kasinatian, tingali panahon na nga tugotan nimo ang binhi sa Pulong sa Diyos nga hinayng mahulog ug molalom diha sa tabunok nga yuta sa imong kaugalingong kalag, o nga mangita ka pinaagi sa pag-ampo og mga paagi nga gusto sa Diyos nga gamiton ka sa pagpugas nianang binhi diha sa kasingkasing sa laing tawo. Ang pagbuhat niining ulahi nagkinahanglan og dakong pagkabukas sa paglihok sa Espiritu Santo. Nagkinahanglan kini nga tugotan nato ang Diyos nga modasig kanato aron mahibalo kita kon unsaon nato pagtinabangay uban sa Iyang kamot diha sa pag-ebanghelyo.
Pamalandongi karon ang “misteryo” sa usa ka kalag nga moagi niining proseso sa pagbag-o ug espirituhanong pagtubo. Kon malisdan ka sa pagpangita og ingon nianang pananglitan nga mapamalandongan, balika ang kinabuhi sa mga santos. Ang mga santos maoy pipila sa labing dakong mga saksi niadtong mitugot nga ang Pulong sa Diyos molalom diha sa ilang kinabuhi hangtod nahimo silang bag-ong mga binuhat, nga nabag-o pinaagi sa grasya sa Diyos. Pamalandongi kining pagpamatuod sa pagbag-o ug, samtang nagbuhat ka niini, tugoti ang imong kaugalingon nga madani ngadto sa pagpasalamat ug pagkahingangha.
Ginoo ko nga nagbag-o kanako, nagpasalamat ako Kanimo sa paagi nga Imong gipugas ang binhi sa Imong balaang Pulong diha sa akong kaugalingong kinabuhi. Nagpasalamat ako Kanimo sa paagi nga Imo akong giusab, gipahigawas gikan sa sala, ug gibutang sa dalan padulong sa pagkabalaan. Gamita ako, hinigugma kong Ginoo, aron ipugas ang maong binhi diha sa kinabuhi sa uban, ug pun-a ako sa katingala ug balaang pagtahod samtang akong masaksihan ang paglihok sa Imong maluluy-ong kamot. Jesus, nagsalig ako Kanimo.
9 ka Adlaw nga Nobena alang sa Kinabuhi
Enero 19–27
Ikasiyam nga adlaw: Enero 27
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – Santa Angela Merici, Birhen
Mga Kapilian sa mga Basahon sa Misa
Pangunang hulagway sa ibabaw: Ang Magpupugas ni Jean-François Millet, gikan sa Wikimedia Commons
