Januari 27, 2023
Ijumaa ya Juma la Tatu la Kipindi cha Kawaida
Masomo ya Leo
Mtakatifu Angela Merici, Bikira—Kumbukumbu ya Hiari
Sikiliza kwa Kiingereza
Yesu akawaambia makutano: “Ufalme wa Mungu uko hivi: ni kama mtu anayepanda mbegu ardhini, akalala na kuamka usiku na mchana, nayo mbegu ikaota na kukua bila yeye kujua jinsi inavyotokea. Marko 4:26–27
Ni jambo zuri kutafakari jinsi Neno la Mungu linavyobadilisha maisha ya watu. Kifungu hiki kifupi hapo juu kinafananisha kushirikisha wengine Neno la Mungu na kupanda mbegu. Mpanzi huenda na kutawanya mbegu ardhini, kisha hutazama jinsi mbegu hiyo inavyokua na kuwa mmea unaozaa matunda. Maneno yenye fumbo yanasema: “bila yeye kujua jinsi inavyotokea.”
Ndivyo ilivyo kwa Neno la Mungu. Mtu mwingine anapolipokea Neno hilo, tunabarikiwa kwa kuweza kukaa pembeni na kutazama Neno hilo likitia mizizi na kubadilisha maisha yake. Bila shaka, wakati mwingine tunaweza kupanda Neno lakini lisitie mizizi. Hii hutokana ama na ugumu wa moyo wa mtu huyo au na namna tunavyopanda. Lakini mbegu ya Neno la Mungu inapotia mizizi, tunapaswa kustaajabia kwa kicho jinsi Mungu anavyotenda ndani ya nafsi hiyo.
Fikiria hali hii katika maisha yako mwenyewe. Uliipokeaje kwa mara ya kwanza mbegu njema ya Neno la Mungu? Labda ilikuwa kupitia mahubiri, rekolekseni, kusoma Maandiko Matakatifu, kitabu au ushuhuda wa mtu mwingine. Fikiria jinsi ulivyolipokea Neno la Mungu kwa mara ya kwanza katika maisha yako na athari lilizokuwa nazo kwako.
Neno la Mungu likishatia mizizi katika nafsi, ni desturi takatifu “kuamka usiku na mchana” ili kuitazama mbegu hii inapokua. Hasa, tunapaswa kujiruhusu kustaajabia namna ya fumbo ambayo maisha yanabadilishwa, yawe maisha yako mwenyewe au ya mtu mwingine. Inatia moyo kuitazama nafsi ya mtu inapoanza kung’oa dhambi, kujitahidi kupata fadhila, kujenga maisha ya sala na kukua katika upendo wa Mungu.
Ikiwa unaona ni vigumu kuhusianisha jambo hili na maisha yako, basi huenda ni wakati wa kuiruhusu mbegu hiyo ya Neno la Mungu kuanguka taratibu na kufika ndani kabisa ya udongo wenye rutuba wa nafsi yako mwenyewe, au wa kutafuta kwa sala njia ambazo Mungu anataka kukutumia kuipanda mbegu hiyo katika moyo wa mtu mwingine. Kufanya jambo hili la pili kunahitaji moyo ulio wazi sana kwa utendaji wa Roho Mtakatifu. Kunahitaji tumruhusu Mungu atuongoze kwa uvuvio Wake ili tujue jinsi tunavyoweza kushirikiana na kazi ya mkono Wake katika uinjilishaji.
Tafakari leo juu ya “fumbo” la nafsi inayopitia mchakato huu wa mabadiliko na ukuaji wa kiroho. Ikiwa unaona ni vigumu kupata mfano kama huo wa kuutafakari, basi yaangalie maisha ya watakatifu. Watakatifu ni miongoni mwa mashahidi wakuu wa wale walioliruhusu Neno la Mungu kupenya ndani kabisa ya maisha yao, hata wakawa viumbe vipya, waliobadilishwa na neema ya Mungu. Tafakari ushuhuda huu wa kuleta mabadiliko, na unapotafakari, jiruhusu kuvutwa katika shukrani na mshangao.
Bwana wangu unayeleta mabadiliko, nakushukuru kwa namna ulivyopanda mbegu ya Neno Lako takatifu katika maisha yangu mwenyewe. Nakushukuru kwa namna ulivyonibadilisha, ulivyoniweka huru kutoka dhambini na kuniweka katika njia ya utakatifu. Unitumie, Bwana mpendwa, kupanda mbegu hiyo katika maisha ya wengine, na unijaze mshangao na kicho ninaposhuhudia mkono Wako wenye huruma ukitenda kazi. Yesu, nakutumainia.
Novena ya Siku 9 kwa Ajili ya Uhai
Januari 19–27
Siku ya tisa: Januari 27
Tafakari juu ya Huruma ya Mungu
Mtakatifu wa Siku – Mtakatifu Angela Merici, Bikira
Machaguo ya Masomo ya Misa Takatifu
Picha iliyoangaziwa hapo juu: Mpanzi, na Jean-François Millet, kupitia Wikimedia Commons
