Pebrero 8, 2023
Miyerkules sa Ikalimang Semana sa Ordinaryong Panahon
Mga Pagbasa Karong Adlawa
San Jeronimo Emiliani, Magtutukod—Opsiyonal nga Handumanan
Santa Josefina Bakhita, Birhen—Opsiyonal nga Handumanan
Paminaw sa Iningles
Gitawag pag-usab ni Jesus ang panon sa katawhan ug miingon kanila, “Paminaw kamong tanan kanako, ug sabta kini. Walay bisan unsa nga mosulod sa tawo gikan sa gawas nga makahugaw kaniya; apan ang mga butang nga mogula gikan sa sulod mao ang makahugaw kaniya.” Mark 7:14–15
Unsay anaa sa imong sulod? Unsay anaa sa imong kasingkasing? Ang Ebanghelyo karong adlawa gitapos sa usa ka lista sa mga bisyo nga, makapasubo man, nagagikan sa sulod: “dautang mga hunahuna, pagkawalay kaputli, pagpangawat, pagpatay, pagpanapaw, kahakog, pagkadaotan, pagpanglimbong, pagpatuyang sa kaulag, kasina, pagpasipala, pagkamapahitas-on, kabuang.” Siyempre, walay usa niining mga bisyoha nga tilinguhaon kon tan-awon nga walay pagpihig. Makaluod gayod kining tanan. Apan sa kasagaran, kini maoy mga sala nga kanunayng giatubang sa mga tawo, sa gamay o dakong sukod.
Tagda, pananglitan, ang kahakog. Kon masabtan kini sa tin-aw, walay gustong mailhan nga hakog. Makauulaw kini nga kinaiya. Apan kon ang kahakog dili ilhon nga kahakog, sayon rang mahulog sa lit-ag sa pagkinabuhi niini. Ang tawo nga hakog nagtinguha ug sobra ka daghan niini o niana. Mas daghang kuwarta, mas maayong balay, mas nindot nga sakyanan, mas maluho nga mga bakasyon, ug uban pa. Busa, kon ang usa ka tawo naggawi nga hakog, ang kahakog dili makita nga dili tilinguhaon. Masabtan lamang ang tinuod nga kinaiya sa kahakog kon tan-awon kini nga walay pagpihig.
Niining Ebanghelyo, pinaagi sa paghingalan niining taas nga lista sa mga bisyo, gipakita ni Jesus kanato ang usa ka talagsaong buhat sa kalooy. Iya kitang pukawon ug tawgon sa paghunong kadiyot ug pagtan-aw sa sala sumala sa tinuod niini nga kinaiya. Giklaro usab ni Jesus nga kon magkinabuhi ka sa usa o labaw pa niining mga bisyo, mahugawan ka. Mahimo kang hakog, bakakon, bangis, tabian, madumtanon, mapahitas-on, ug uban pa. Sa walay pagpihig nga pagtan-aw, walay tawo nga gusto niini.
Asa niadtong listaha sa mga bisyo ang labing lisod nimong pakigbisogan? Unsa ang imong makita sulod sa imong kaugalingong kasingkasing? Pagmatinud-anon sa imong kaugalingon atubangan sa Dios. Gitinguha ni Jesus nga ang imong kasingkasing mahimong putli ug balaan, gawasnon gikan niini ug sa tanang kahugawan. Apan kon dili nimo matan-aw ang imong kaugalingong kasingkasing sa matinud-anong paagi, malisod ang pagsalikway sa sala nga imong gipakigbisogan.
Pamalandongi, karong adlawa, kining lista sa mga sala nga gihisgotan sa atong Ginoo. Tagda ang matag usa ug tugoti ang imong kaugalingon nga makita ang matag sala sumala sa tinuod niini nga kinaiya. Tugoti ang imong kaugalingon nga dumtan kining mga salaa uban sa balaang kasuko, ug dayon ipunting ang imong pagtagad ngadto sa sala nga labing lisod nimong pakigbisogan. Hibaloi nga samtang tinuyo nimong giila ug gisalikway kanang salaa, ang atong Ginoo magsugod sa paglig-on kanimo ug pagputli sa imong kasingkasing aron mahigawas ka gikan nianang kahugawan ug, hinuon, mahimong matahom nga anak sa Dios nga maoy katuyoan sa Iyang paglalang kanimo.
Akong maloloy-ong Ginoo, tabangi ako nga makita ang sala sumala sa tinuod niini nga kinaiya. Ilabina, tabangi ako nga makita ang akong kaugalingong sala—kanang sala sulod sa akong kasingkasing nga makahugaw kanako isip Imong hinigugmang anak. Samtang makita ko ang akong sala, hatagi ako sa grasya nga akong gikinahanglan aron isalikway kini ug modangop Kanimo sa tibuok kong kasingkasing, aron mahimo akong bag-ong binuhat diha sa Imong grasya ug kalooy. Jesus, misalig ako Kanimo!
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos sa Adlaw –
Santa Josephine Bakhita, Birhen
Mga Kapilian sa mga Basahon sa Misa
Pangunang hulagway sa ibabaw: Si Kristo nga Nagsangyaw ni Rembrandt, pinaagi sa Wikimedia Commons
