Pebrero 17, 2023
Biyernes sa Ikaunom nga Semana sa Kasagarang Panahon
Mga Pagbasa Karong Adlawa
Pito ka Santos nga Magtutukod sa Orden sa mga Servita—Opsiyonal nga Handumanan
Paminaw sa Iningles
“Unsay kapuslanan sa tawo kon maangkon niya ang tibuok kalibotan apan mawad-an siya sa iyang kinabuhi?” Marcos 8:36
Kining mubo ug diretsong pangutana angay gayod nga palandongon pag-ayo. Sa Ebanghelyo ni Marcos, kining mga pulonga kabahin sa pagtudlo ni Jesus bahin sa mga gikinahanglan aron mahimong Iyang tinun-an. Ug gisulti kini human si Jesus misugod sa dayag nga pagtudlo nga Siya mismo mag-antos ug mamatay isip Kristo.
Palandonga ang pangutana sa ibabaw, sugod sa unang bahin niini. “Unsay kapuslanan sa tawo kon maangkon niya ang tibuok kalibotan…” Gusto ba nimong maangkon ang tibuok kalibotan? Alang sa kadaghanan, madanihon kaayo ang maong posibilidad. Ang “pag-angkon sa tibuok kalibotan” mao ang pag-angkon sa tanang ikatanyag niini. Hunahunaa nga gitanyagan ka og walay kinutobang bahandi niining kalibotana. Unsa kaha kon makadaog ka sa kinadak-ang jackpot nga gitanyag sukad sa bisan unsang loterya, ug labaw pa niana? Unsa kaha kon makapanag-iya ka og maanindot nga mga mansiyon sa nagkalainlaing dapit sa kalibotan, kaugalingong pribadong jet, tanang modernong kaharuhay, labing mahal nga mga sakyanan, ug kagawasan sa pagbuhat sa bisan unsa nimong gusto sa tibuok nimong kinabuhi? Madanihon ba kini? Oo gayod, kon sa panggawas lamang tan-awon. Apan malimbongon usab kaayo kini nga pagdani, kay kining tanan dili makadugang sa imong kalipay o katagbawan kay sa anaa na kanimo karon.
Sayon usab tubagon ang ikaduhang bahin niini nga pangutana. Gusto ba nimong mawad-an sa imong kinabuhi? Siyempre dili. Busa naghatag si Jesus og duha ka magkasukwahi nga pahayag sulod sa usa ka hugpong sa mga pulong. Kadaghanan sa mga tawo gusto nga maangkon ang tibuok kalibotan apan dili gayod gusto nga mawad-an sa ilang kinabuhi. Gigamit ni Jesus kining pagtandi sa magkasukwahi aron sultihan kita sa tin-aw kaayo nga paagi nga dili nato matinguha ang usa nga dili usab pilion ang lain. Sa laing pagkasulti, kon ang tinguha sa imong kasingkasing mao ang mga bahandi niining kalibotana, nan mawad-an ka gayod sa imong kaugalingong kinabuhi sumala sa gidak-on sa imong pagtugyan nianang tinguhaa. Sa kasukwahi, kon pilion nimo ang kaluwasan sa imong kalag, kinahanglan nimong biyaan ang tinguha alang sa mga bahandi ug mga pagdani niining kalibotana. Dili nimo mahimong tinguhaon ug pilion ang duha.
Bisan pa niana, tingali adunay talagsaon kaayong kalag nga daghag kabtangan niining kalibotana apan wala gayoy pagkagapos niini. Nagkinabuhi siya nga hingpit nga gawasnon gikan sa pagkagapos sa mga butang niining kalibotana, nakakaplag sa tinuod nga katagbawan diha lamang sa Dios ug sa Iyang balaang kabubut-on, ug wala magtagad kon unsang materyal nga mga butang ang iyang gipanag-iya. Siyempre, lisod kaayo makab-ot ang maong kahimtang sa kasingkasing kon daghan na ang natigom nga bahandi.
Sa laing bahin, adunay mga tawo niining kalibotana nga diyutay ra kaayog kabtangan. Kabos gayod sila sa literal nga kahulogan sa pulong. Apan gigugol nila ang ilang mga adlaw sa pagdamgo og bahandi ug sa pagkaibog sa tanan nga wala kanila. Ikasubo, kining kabos nga kalag sa pagkatinuod sama ra ka gapos sa materyal nga mga butang sa tawo nga naghimo sa bahandi nga tumong ug sentro sa iyang kinabuhi. Ug kana nga pagkagapos sa kasingkasing makapahinabo og dakong espirituhanong kadaot.
Pamalandongi karon kining pangutana ni Jesus: “Unsay kapuslanan sa tawo kon maangkon niya ang tibuok kalibotan apan mawad-an siya sa iyang kinabuhi?” Himoa kining pangutana nga tinubdan sa pag-ampo, pagpamalandong ug pagsusi sa kaugalingon. Paningkamoti nga magmatinud-anon bahin sa imong mga tinguha. Kon imong mamatikdan nga daghan kang panahon nga gigahin sa paghanduraw sa mga bahandi, hatagi gayod og pagtagad kining pangutanaha. Ang kinabuhi sa tibuok niyang kahingpitan dili gayod makab-ot pinaagi nianang mga tinguhaa o sa ilang katumanan. Ang Dios ug ang Dios lamang ang makahatag og hingpit nga katagbawan. Pangitaa ang Dios labaw sa tanan, ug imong makaplagan nga walay bisan unsang ikatanyag kining kalibotana nga makatupong sa mga bahandi sa Gingharian sa Dios.
Ginoo, Ikaw ug Ikaw lamang ang tinubdan sa katagbawan sa kinabuhi. Palihog putlia ang akong mga tinguha aron sa kataposan Ikaw lamang ug ang Imong balaang kabubut-on ang akong tinguhaon. Gawsa ako gikan sa tanang pagpanglimbong ug bakak nga mga pagdani sa kinabuhi aron diha lamang Kanimo ako makakaplag og katagbawan. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Kwaresma
Santos sa Adlaw – Pito ka Santos nga Magtutukod sa Ordeng Servita
Mga Kapilian sa mga Basahon sa Misa
Gipasiugda nga hulagway sa ibabaw: Adlaw sa Paghukom, pinaagi sa flickr
