Pebrero 18, 2023
Sabado sa Ikaunom nga Semana sa Kasagarang Panahon
Mga Pagbasa Karong Adlawa
Paminaw sa Iningles
Gidala ni Jesus sila si Pedro, Santiago, ug Juan ngadto sa usa ka hataas nga bukid, nga sila-sila lamang. Ug nausab ang Iyang dagway sa ilang atubangan, ug ang Iyang mga bisti nahimong masulaw kaayo nga puti, nga walay manglalaba sa yuta nga makapaputi sa ingon niana. Marcos 9:2–3
Ang mensahe sa Pagkausab sa Dagway kinahanglan mahimong mensahe nga makapukaw sa kinahiladman nga paglaom sa matag usa kanato sa tibuok natong kinabuhi. Pinaagi niini nga hitabo, gipadayag ang himaya sa Dios, gipamatud-an ang mga pagtulon-an ni Moises ug sa mga propeta, ug gipahayag sa Amahan ang bugtong mensahe nga kinahanglan natong masabtan: “Kini ang akong pinalanggang Anak. Paminawa ninyo Siya.” Kon masabtan nato kining kamatuorana ug sundon kining sugoa, makaambit kita sa kahangtoran sa mga himayang gipadayag sa Pagkausab sa Dagway.
Sa pagsugod, palandonga nga kining pagpadayag, diin gibutyag ang himaya nga natabonan sa tawhanong unod ni Jesus, nakapuno kang Pedro ug sa ubang mga tinun-an sa balaang kahingangha. Gusto ni Pedro nga magpabilin sa bukid uban sa iyang Ginoo nga nausab ang dagway hangtod sa kahangtoran. Itandi kini sa iyang pagpili sa paglayas sa dihang gidakop si Jesus ug sa iyang sunod nga paglimod nga nakaila gani siya kang Jesus. Sa dihang nakita niya nga nagsugod na ang sakripisyo ni Jesus, milayas siya ug mitago. Apan dinhi, sa dihang nakita niya ang himaya ni Jesus, gusto niyang magpabilin uban Kaniya hangtod sa kahangtoran.
Ang unang leksiyon nga atong makuha niining tekstoha mao nga mas sayon dawaton ang himaya kay sa sakripisyo. Mas sayon pilion ang makahatag og kahupayan kay sa moresulta sa kahadlok ug kalibog. Ug bisan tuod masabtan kini kon tan-awon gikan sa kahimtang sa katawhan nga nahulog sa sala, usa gayod kini ka butang nga kinahanglan natong paningkamotang matul-id sa atong espirituhanong kinabuhi, sama sa gihimo ni Pedro sa ulahi sa iyang kinabuhi.
Usa sa mga hinungdan nga gihatag ang Pagkausab sa Dagway niining mga tinun-an mao ang pagtabang kanila sa umaabot, sa dihang dapiton sila sa Amahan sa pagdawat sa kinabuhi sa pagsakripisyo. Sa ulahi, maatubang nila ang ilang kaugalingong mga krus, ug kinahanglan silang mohukom kon dawaton ba nila kadtong mga krusa tungod sa gugma. Mao gayod kini ang kahulogan sa sakripisyo: ang pagdawat sa pag-antos tungod sa gugma. Usa sa makatabang sa usa ka tawo sa pagpili sa mahigugmaong pagsakripisyo mao ang pagkahibalo kon unsay bunga nianang sakripisyoha. Mao kana ang gihatag sa Pagkausab sa Dagway. Tungod kay nakita nila ang himaya ni Jesus sa Iyang pagkausab sa dagway, sa ulahi nasabtan ni Pedro, Santiago, ug Juan sa ilang mga hunahuna ug kasingkasing nga ang sakripisyong gitagna ni Jesus mosangpot gayod sa walay kataposang himaya.
Bisan tuod lagmit wala pa nimo makita sa imong kaugalingong mga mata ang himaya ni Jesus sa Iyang pagkausab sa dagway, daghan ang nakadawat og espirituhanong mga kahupayan sa nagkalainlaing mga higayon sa kinabuhi. Kon mahitabo kini, gusto nato nga magpabilin kini. Apan talagsa ra kining magpadayon. Hinuon, gipasilip lamang sa Dios kanato ang Iyang himaya aron mahawiran nato kana nga handumanan ug magamit sa mga panahong labing gikinahanglan nato kini. Ug moabot kadtong mga panahona samtang mamati ug motuman kita sa tingog sa Amahan. “Kini ang akong pinalanggang Anak. Paminawa ninyo Siya.”
Palandonga karong adlawa nga si Jesus nga anaa karon sa himaya mao ra gihapon si Jesus nga naglakaw dinhi sa yuta. Siya mao ra gihapong Jesus kansang mga pagtulon-an nahisulat sa Balaang Kasulatan. Mao ra gihapong Jesus nga nag-antos sa inhustisya. Ug mao ra gihapong Jesus nga madaogong nabanhaw. Ang atong kinabuhi puno sa daghang kasinatian, sama usab sa kinabuhi ni Jesus. Busa, ang bugtong paagi aron mahiusa ang matag kasinatian nato sa kinabuhi mao ang pagsunod sa sugo sa Amahan. “Paminawa ninyo Siya.” Paminawa ang tingog sa Manluluwas. Sunda Siya paingon sa bukid sa kahupayan. Pagpabilin uban Kaniya sa matag pag-antos ug krus. Ug paminawa ang tanan Niyang gitudlo. Kon buhaton nimo kini, moabot gayod ang adlaw nga dapiton ka sa pagpabilin uban Kaniya sa himaya hangtod sa kahangtoran.
Ginoo nga nausab ang dagway, sama ni Pedro, nagtinguha usab ako nga magpabilin uban Kanimo hangtod sa kahangtoran. Ihatag kanako ang grasya nga akong gikinahanglan aron kanunay akong magpabilin uban Kanimo, bisan asa Mo ako dad-a. Hinaot magpabilin ako uban Kanimo sa matag sakripisyo nga gihangyo Kanimo nga akong ihalad, sa matag pag-antos nga akong giantos, ug sa matag kahupayan nga nagpanalangin sa akong kalag. Hinaot kanunay akong mamati Kanimo ug motuman sa Imong balaang Pulong. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Gipakitang hulagway sa ibabaw: Pagkausab sa Dagway sa Ginoo, gikan sa flickr
