Marso 2, 2023
Huwebes sa Unang Semana sa Kwaresma
Mga Pagbasa Karong Adlawa
Paminaw sa Iningles
“Kinsa kaninyo ang mohatag og bato sa iyang anak kon mangayo kini og pan, o og bitin kon mangayo kini og isda?” Matthew 7:9–10
Klaro nga kini usa ka pangutana ni Jesus nga dili na kinahanglan tubagon. Walay ginikanan nga mohatag og bato o bitin sa iyang anak kon mangayo kini og pagkaon. Apan mao gayod kana ang punto. Mipadayon si Jesus sa pag-ingon, “…unsa pa kaha ang inyong langitnong Amahan nga mohatag og maayong mga butang sa mga mangayo Kaniya.”
Kon mag-ampo ka uban sa lawom nga pagtuo, ihatag ba sa atong Ginoo ang bisan unsang imong pangayoon? Dili gayod. Tinuod nga miingon si Jesus, “Pangayo ug kamo hatagan; pangita ug kamo makakaplag; panuktok ug ang pultahan ablihan alang kaninyo.” Apan kining pahayag kinahanglang basahon pag-ayo diha sa tibuok konteksto sa pagtulon-an ni Jesus dinhi. Ang tinuod mao nga kon mangayo kita sa kinasingkasing ug uban sa pagtuo og “maayong mga butang,” nga nagpasabot sa mga butang nga buot ihatag kanato sa atong maayong Dios, dili Niya kita pakyason. Siyempre, wala kini magpasabot nga kon mangamuyo kita kang Jesus alang sa bisan unsa, ihatag dayon Niya kini kanato.
Unsa man kining “maayong mga butang” nga seguradong ihatag kanato sa atong Ginoo? Una sa tanan, mao ang pagpasaylo sa atong mga sala. Makasiguro gayod kita nga kon magpaubos kita sa atubangan sa atong maayong Dios, ilabina diha sa Sakramento sa Pakig-uli, makadawat kita sa gasa sa pagpasaylo nga walay bayad nga gihatag ug makapausab sa atong kinabuhi.
Dugang sa pagpasaylo sa atong mga sala, daghan pa kitag ubang gikinahanglan sa kinabuhi, ug daghan pang ubang mga butang nga buot ihatag kanato sa atong maayong Dios. Pananglitan, kanunayng buot sa Dios nga hatagan kita sa kusog nga atong gikinahanglan aron mabuntog ang mga tentasyon sa kinabuhi. Kanunay Niyang buot itagana ang atong labing sukaranang mga panginahanglan. Kanunay Niyang buot kitang tabangan nga motubo sa matag hiyas. Ug sigurado gayod nga buot Niya kitang dad-on ngadto sa Langit. Mao kining mga butanga ang angay natong ilabinang iampo matag adlaw.
Apan komosta man ang ubang mga butang, sama sa bag-ong trabaho, dugang nga kuwarta, mas maayong balay, pagkadawat sa usa ka piho nga eskuylahan, pisikal nga kaayohan, ug uban pa? Angay kitang mag-ampo alang niini ug sa uban pang susamang mga butang sa kinabuhi, apan adunay usa ka kondisyon. Ang maong “kondisyon” mao nga mag-ampo kita nga matuman ang kabubut-on sa Dios. Dili ang atoa. Kinahanglan natong mapainubsanong ilhon nga dili nato makita ang kinatibuk-ang hulagway sa kinabuhi ug dili kita kanunay mahibalo kon unsay makahatag sa Dios sa labing dakong himaya sa tanang butang. Busa, basin mas maayo nga dili nimo makuha ang maong bag-ong trabaho, o dili ka madawat sa maong eskuylahan, o bisan pa nga dili mamaayo ang maong sakit. Apan makasiguro kita nga kanunayng ihatag sa Dios kanato ang labing maayo alang kanato ug ang makahimo kanato sa paghatag Kaniya sa labing dakong himaya sa kinabuhi. Ang pagpalansang sa atong Ginoo sa krus maoy hingpit nga pananglitan. Nag-ampo Siya nga kuhaon gikan Kaniya ang maong kopa, “apan dili ang Akong kabubut-on kondili ang Imoha ang matuman.” Ug, siyempre, nakita sa Amahan ang dakong dayong bili sa kamatayon sa Iyang Anak didto sa Krus ug gitubag ang Iyang pag-ampo sumala niini.
Pamalandongi karon kon giunsa nimo pag-ampo. Mag-ampo ka ba nga dili mamugos sa resulta nga imong gusto, kay nasayod ka nga ang atong Ginoo maoy labing nahibalo kon unsay maayo? Mapainubsanon ka bang moangkon nga ang Dios lamang ang nahibalo kon unsay tinuod nga maayo alang kanimo? Salig nga mao gayod kini ang tinuod ug pag-ampo uban sa hingpit nga pagsalig nga matuman ang kabubut-on sa Dios sa tanang butang, ug makasiguro ka nga tubagon Niya kana nga pag-ampo.
Minahal nga Ginoo nga walay kinutoban ang kaalam ug kahibalo, tabangi ako nga kanunayng mosalig sa Imong kaayo ug pag-atiman kanako. Tabangi ako nga modangop Kanimo matag adlaw sa akong panginahanglan ug mosalig nga tubagon Nimo ang akong pag-ampo sumala sa Imong hingpit nga kabubut-on. Gitugyan ko ang akong kinabuhi sa Imong mga kamot, minahal nga Ginoo. Buhata kanako ang Imong buot. Jesus, nagsalig ako Kanimo.
40 ka Adlaw sa Tiilan sa Krus:
Usa ka Pagtutok sa Gugma Gikan sa Kasingkasing sa Atong Bulahang Inahan
Pamalandong Unom – Paghinumdom sa Usa ka Paglukso sa Kalipay
(Huwebes sa Unang Semana sa Kwaresma)
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Kapanguhaan alang sa Kwaresma
Mga Pamalandong sa Balaang Kasulatan alang sa Kwaresma
Mga Santos/Kasaulogan Karong Adlawa
Mga Kapilian sa mga Basahon sa Misa
Gipasiugdang hulagway sa ibabaw: ni kalhh gikan sa Pixabay
