Hunyo 30, 2023
Biyernes sa Ikanapulog Duha nga Semana sa Ordinaryong Panahon
Mga Pagbasa Karong Adlawa
Unang mga Martir sa Simbahan sa Roma—Opsiyonal nga Paghandum
Paminaw sa Iningles
Sa pagkanaog ni Jesus gikan sa bukid, daghang mga tawo ang misunod Kaniya. Unya usa ka sanlahon ang miduol, miyukbo sa pagpasidungog Kaniya, ug miingon, “Ginoo, kon buot Nimo, mahimo Mo akong hinloan.” Mateo 8:1–4
Ang pagpasidungog sa usa ka tawo mao ang pagpadayag sa publiko sa pagtahod ug pagrespeto kaniya. Mao kini ang gibuhat niining sanlahon ngadto kang Jesus. Siya “miyukbo sa pagpasidungog Kaniya.” Apan wala lang kutob niini ang sanlahon. Gipahayag usab niya ang iyang lig-on nga pagtuo nga makahimo si Jesus sa pag-ayo kaniya kon buot Niya. Ug buot gayod kini ni Jesus. Gituy-od ni Jesus ang Iyang kamot aron paghikap sa sanlahon ug gipamulong ang mga pulong, “Buot Ko. Mahinlo ka.” Ug dihadiha, nahinlo ang sanlahon.
Ang unang angayng matikdan niining tekstoha mao nga “gihikap” ni Jesus ang sanlahon. Usa kini ka gidili nga buhat, kay ang mga sanlahon giisip nga mahugaw, ug ang paghikap kanila mahimong makapatakod sa ilang sakit. Apan gisupak ni Jesus ang naandang lagda ug gihikap ang maong tawo, nga nagpadayag kaniya sa iyang kinaiyanhong dignidad.
Makapainteres nga pamalandongon kining pangutanaha: Kinsa ang nagpakita og mas dakong pagpasidungog ngadto sa usa? Mas dako ba ang pagpasidungog nga gipakita sa sanlahon? O mas dako ang buhat sa paghikap ug paghinlo sa sanlahon? Bisan tuod dili nato kinahanglan itandi kining duha ka buhat, makatabang ang pagpamalandong sa lawom nga kamatuoran nga si Jesus nagpakita gayod og usa ka matang sa pagpasidungog ngadto niining mahugaw nga sanlahon.
Sama sa giingon sa ibabaw, ang pagpasidungog sa usa ka tawo mao ang pagpadayag sa publiko sa pagtahod ug pagrespeto kaniya. Sa walay duhaduha, mao gayod kini ang gibuhat ni Jesus. Dili lamang Niya gipasidunggan ang sanlahon pinaagi sa Iyang paghikap ug pag-ayo, kondili pinaagi usab niining buhata, gipadayag Niya sa publiko ang Iyang gugma ug pagrespeto alang niining tawhana.
Hinuon, talagsaon ang pagpasidungog nga angay natong ihatag sa Dios. Kini ang pagpasidungog pinaagi sa pagsimba. Kinahanglan kitang moyukbo sa Iyang atubangan, nga motugyan sa atong kinabuhi uban sa bug-os nga pagsalig ug pagtugyan sa kaugalingon. Kinahanglan nato Siyang pasidunggan isip Dios ug ipadayag ang atong gugma sumala niini. Apan, gawas sa pagpakita ni Jesus sa Iyang labing gamhanang gahom pinaagi niining milagroha, naghatag usab Siya kanato og panig-ingnan kon unsaon nato pagtagad ang uban. Ang matag tawo, tungod kay gibuhat siya sa dagway ug pagkasama sa Dios, takos sa atong kinatas-ang pagrespeto, ug takos siyang hatagan nianang pagrespetoha sa publiko. Kinahanglan kanunay kitang maningkamot sa pagpasidungog ug pagrespeto sa uban ug ipadayag kana aron makita sa uban. Ilabinang lisod kini kon ang tawo nga gitawag kitang motahod giisip sa uban nga “mahugaw.” Ang sanlahon usa lamang ka simbolo sa daghang matang sa mga tawo nga giisip sa kalibotan nga mahugaw ug dili takos. Ang mga kriminal, mga kabos, mga naglibog, mga makasasala, mga walay puy-anan, mga kaatbang sa politika ug ang matag ubang tawo sa atong kalibotan takos sa atong kinatas-ang pagrespeto ug pagtahod. Ang pagbuhat niini dili pagpakamatarong sa ilang sala; hinuon, molapas kini sa makita sa gawas ug motan-aw sa ilang kinaiyanhong dignidad.
Pamalandongi karon ang pagpasidungog nga gihimo niining sanlahon ngadto kang Jesus. Unya pamalandongi ang pagpasidungog nga gihatag ni Jesus niining sanlahon pinaagi sa pag-ila sa publiko sa iyang kinaiyanhong dignidad. Kinsa sa imong kinabuhi ang gihulagway niining sanlahon? Kinsa ang giisip nga “mahugaw” tungod sa kahimtang sa iyang kinabuhi, sa sala nga iyang gibuhat, o sa kaulaw nga gipahamtang kaniya sa katilingban? Kinsa ang gitawag ka sa Dios nga duolon ug hikapon uban sa gugma ug pagrespeto, aron makita sa uban? Pangitaa ang sanlahon sa imong kinabuhi ug ayaw kahadlok sa pagsundog niining balaang buhat sa pagpasidungog nga gipakita sa atong Ginoo.
Akong balaang Ginoo, takos Ka sa tanang pag-adorar, himaya ug pagpasidungog. Ikaw ug Ikaw lamang ang angay namong simbahon. Tabangi ako nga padayon nga makakaplag sa Imong tinagong presensya diha sa kinabuhi sa mga tawo sa akong palibot. Tabangi ako, ilabina, nga makita Ka diha sa mga sanlahon sa atong panahon. Hinaot nga ang akong gugma ug pagtahod kanila magagikan sa akong gugma Kanimo ug mahimong pagsundog sa Imong buhat sa gugma alang sa tanan. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santo sa Adlaw –Unang mga Martir sa Simbahan sa Roma
Mga Kapilian sa mga Basahon sa Misa
