Huwebes, Hunyo 29, 2023
Dakong Kasaulogan ni San Pedro ug San Pablo, mga Apostoles
Paminaw sa Iningles
“Ug busa sultihan ko ikaw: ikaw si Pedro, ug ibabaw niining batoha tukoron ko ang akong Simbahan, ug ang mga ganghaan sa dapit sa mga patay dili makabuntog niini. Ihatag ko kanimo ang mga yawi sa Gingharian sa langit. Bisan unsa ang imong gapuson dinhi sa yuta gapuson usab sa langit; ug bisan unsa ang imong hubaron dinhi sa yuta hubaron usab sa langit.” Mateo 16:17–19
Si San Pedro ug San Pablo sagad gitawag nga duha sa dagkong “Mga Haligi sa Simbahan.” Ang matag usa kanila adunay hilabihan ka mahinungdanong tahas sa pagtukod sa unang Simbahan. Ug bisan tuod ang tahas sa matag usa mahinungdanon ug sukaranan, lahi ang ilang mga tahas sama nga lahi usab sila isip mga tawo.
Si Pedro usa ka tawong may pamilya, usa ka mangingisda sa ilang dapit, walay pormal nga edukasyon ug ordinaryo ra kaayo. Sumala sa atong nahibaloan bahin kaniya sa wala pa siya tawga ni Jesus, walay bisan unsa nga nakapahimo kaniya nga talagsaong takos nga mahimong usa sa mga haligi sa bag-ong Simbahan nga tukoron sa Anak sa Dios. Gitawag lamang siya ni Jesus, ug mitubag siya. Misakay si Jesus sa sakayan ni Pedro, misugo kaniya nga itaktak ang mga pukot, ug nagpahinabo og hilabihan kadaghang kuha nga isda. Sa dihang nakita ni Pedro kining milagroha, miluhod siya sa tiilan ni Jesus ug miila nga siya “usa ka makasasala nga tawo” nga dili takos nga maanaa sa presensya ni Jesus (Tan-awa ang Lucas 5:8). Apan gisultihan ni Jesus si Pedro nga sukad niadto mangisda na siya og mga tawo. Diha-diha gibiyaan ni Pedro ang tanan ug misunod kang Jesus.
Gihulagway ni Pablo ang iyang kaugalingon nga “usa ka Judio, natawo sa Tarso sa Cilicia, apan nagdako niining siyudara ubos sa pagtudlo ni Gamaliel, gibansay sumala sa higpit nga pagtuman sa balaod sa atong mga katigulangan, ug mainiton sa pag-alagad sa Dios sama kaninyong tanan karong adlawa” (Mga Buhat 22:3). Si Pablo maayong pagkabansay sa labing higpit nga paghubad sa balaod sa mga Judio, nakasabot sa pilosopiya ug mainiton kaayo sa iyang pagkabatan-on. Hinumdomi usab nga sa wala pa siya makabig ngadto sa Kristiyanismo, “mapintas niyang gilutos ang simbahan sa Dios ug gisulayan paglaglag kini” (Galacia 1:13). Sa daghang paagi, si Pablo unta tan-awon nga mao ang labing dili damhong pilion nga mahimong haligi sa Simbahan, tungod kay hugot kaayo niya kining gisupak sa sinugdan. Gisuportahan pa gani niya ang pagpatay kang San Esteban, ang unang Kristohanong martir.
Bisan tuod alang sa daghan dili gayod damhon nga kining duha ka tawo mahimong mga magtutukod sa Kristohanong Simbahan, mao gayod kini ang ilang nahimo. Human sa iyang pagkakabig, si Pablo mipanaw sa lagyong mga dapit aron isangyaw ang Ebanghelyo, ug nagtukod og pipila ka bag-ong mga Simbahan sa tibuok Asia Minor ug Uropa. Sa ulahi, gidakop siya sa Jerusalem, gidala ngadto sa Roma aron husayon ug gipunggotan sa ulo. Kapin sa katunga sa mga basahon sa Bag-ong Tugon gipahinungod kang Pablo, ug ang katunga sa Mga Buhat sa mga Apostoles nag-asoy sa detalye sa mga panaw ni Pablo isip misyonaryo. Ilabinang nailhan si Pablo sa iyang misyonaryong kalihokan taliwala sa mga Hentil, kadtong dili mga Judio.
Tinuod nga talagsaon ang tahas ni Pedro. Giilisan ni Jesus ang iyang ngalan gikan sa “Simon” ngadto sa “Pedro.” Hinumdomi ang giingon ni Jesus, “Ug sultihan ko ikaw, ikaw si Pedro (Petros), ug ibabaw niining batoha (petra) tukoron ko ang akong simbahan…(Matthew 16:18). Ang “Pedro” sa Grego mao ang Petros, nga nagkahulogan og usa ka bato nga mabalhin. Apan, ang Gregong pulong nga petra nagkahulogan og usa ka tibuok ug lig-on nga bato nga nagpabilin sa iyang dapit, dili matarog, ug molungtad. Busa, gipili ni Jesus nga himoon si Pedro, kining usa ka bato, nga lig-ong patukoranan nga dili matarog, nga ibabaw niini tukoron ang Simbahan.
Ikaw usab gitawag sa atong Ginoo alang sa usa ka talagsaong misyon sulod sa Simbahan nga wala Niya itugyan sa lain. Sa imong kaugalingong paagi, gusto sa Diyos nga gamiton ka aron ipaabot ang Ebanghelyo ngadto sa piho nga mga tawo, sama sa Iyang gihimo pinaagi kang San Pablo. Ug sama kang San Pedro, gusto sa Diyos nga padayon nga tukoron ang Iyang Simbahan diha kanimo ug sa imong pagtuo.
Pamalandongi karon kining duha ka balaan ug talagsaong haligi sa atong Simbahan. Samtang namalandong ka, hunahunaa kon sa unsang paagi gusto sa Diyos nga gamiton ka aron ipadayon ang ilang misyon niining kalibotana. Bisan tuod sila San Pedro ug San Pablo lakip sa labing bantogan ug labing dakog impluwensiya nga mga Kristohanon sa atong kalibotan, kinahanglan nga magpadayon ang ilang misyon, ug ikaw usa sa mga instrumento nga gusto sa Diyos nga gamiton. Itugyan ang imong kaugalingon niining misyona aron ang pagsangyaw sa Ebanghelyo ug ang batong patukoranan sa atong Simbahan magpabiling lig-on sa atong panahon, sama kaniadto.
San Pedro, ikaw gipili sa talagsaong paagi aron mahimong batong patukoranan sa pagtuo nga ibabaw niini gitukod ang Simbahan. San Pablo, milakaw ka aron isangyaw kining pagtuoha sa halayo ug sa halapad nga dapit, ug nagtukod og daghang bag-ong katilingban sa pagtuo. Palihog gamita ako, minahal nga Ginoo, aron ipadayon ang misyon sa Imong Simbahan, aron ang pagtuo lig-ong makagamot sa hunahuna ug kasingkasing sa tanan Mong katawhan sa tibuok kalibotan. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Pedro ug San Pablo
Mga Kapilian sa mga Basahon sa Misa
Pangunang hulagway sa ibabaw: San Pedro ug San Pablo Ni Jusepe de Ribera, gikan sa Wikimedia Commons
