Hulyo 18, 2023
Martes sa Ikanapulog-limang Semana sa Ordinaryong Panahon
Mga Pagbasa alang sa Karon
San Camillus de Lellis, Pari—Opsiyonal nga Paghandom sa USA
(Gisaulog sa Hulyo 14 gawas sa Estados Unidos)
Paminaw sa Iningles
“Alaut ka, Corazin! Alaut ka, Betsaida! Kay kon ang gamhanang mga buhat nga gihimo diha kaninyo gihimo pa sa Tiro ug Sidon, dugay na unta silang naghinulsol uban sa sako ug abo. Apan sultihan Ko kamo, mas gaan pa ang dangatan sa Tiro ug Sidon sa adlaw sa paghukom kay kaninyo.” Mateo 11:21–22
Ang Corazin ug Betsaida mga lungsod sa mga Judio nga kanunayng giduaw ni Jesus aron magsangyaw ug maghimo og daghang “gamhanang mga buhat.” Nahimutang kini sa amihanan lamang sa Cafarnaum, ang lungsod diin Siya nagpuyo. Ang Tiro ug Sidon mga paganong siyudad sa daplin sa dagat, sa amihanan-sidlakan sa Corazin ug Betsaida, sa gitawag karon og Lebanon, ug nailhan tungod sa imoral nga pagkinabuhi sa ilang mga lumulupyo. Bisan tuod wala maggahin si Jesus og daghang panahon niadtong mga siyudara, giduaw Niya kini usahay. Sa unang natala nga pagduaw ni Jesus didto, hinumdomi ang Iyang pakigkita sa babayeng Sirofenisa nga nangamuyo Kaniya nga ayohon ang iyang anak nga babaye (Mateo 15:21–28). Ang hitabo sa Ebanghelyo nga gikutlo sa ibabaw nahitabo sa wala pa mohimo si Jesus nianang panaw.
Nganong hilabihan man ka estrikto si Jesus ngadto sa mga lungsod diin Siya naggahin og dakong bahin sa Iyang panahon? Nganong gibadlong man Niya ang Corazin, Betsaida ug Cafarnaum? Aron matubag kini, mahinungdanong hinumdoman nga gigahin ni Jesus ang kadaghanan sa Iyang panahon sa pagsangyaw ngadto sa “nangawala nga mga karnero sa panimalay ni Israel.” Sa ato pa, ang Iyang nag-unang misyon sa panahon sa Iyang publikong ministeryo mao ang pagpaambit sa Ebanghelyo ngadto sa mga kaliwat ni Abraham nga gitugyanan sa Balaod ni Moises, sa mga pagtulon-an sa mga propeta ug sa mga ritwal sa liturhiya. Tungod niini, dili lamang hingpit ang pagsangyaw ni Jesus ngadto niining mga tawhana, kondili naghimo usab Siya og sunodsunod nga mga milagro. Ug bisan tuod daghan ang mituo Kaniya ug nahimong Iyang mga tinun-an, daghan usab ang walay pagtagad o hingpit gayong midumili sa pagtuo Kaniya.
Karon, ang Corazin, Betsaida ug Cafarnaum mahimong tan-awon ingong mga simbolo sa mga Katolikong natawo ug nagdako diha sa pagtuo ug gihatagan og maayong pagporma sa ilang mga ginikanan ug sa uban. Daghang ginikanan kansang mga anak nahisalaag gikan sa pagtuo ang naghunahuna kon unsay ilang nasayop. Apan ang tinuod mao nga bisan si Jesus Mismo gisalikway, bisan pa sa Iyang hingpit nga pagsangyaw, hingpit nga gugma ug dili ikalimod nga mga milagro. Ug mao usab kini ang nahitabo karon. Daghan ang, bisan gipadako diha sa balaang pagtuo nga gihatag kanato ni Kristo Mismo, nagsalikway nianang pagtuoha ug nagpakabuta-bungol sa Ebanghelyo ug sa Simbahan.
Ang pagbadlong ni Jesus niadtong mga lungsora angayng molanog karon sa hunahuna niadtong nagsalikway sa Diyos bisan pa sa daghang kaayohan nga ilang nadawat pinaagi sa maayong pagpadako kanila. Siyempre, kana nga pagsalikway dili kanunay hingpit ug bug-os. Mas sagad, kini anam-anam nga pagsalikway. Una, makita kini sa dili pagtambong sa Misa. Dayon, ang pagkompromiso sa moral nga mga prinsipyo. Sunod, ang kakulang sa pagtuo. Ug sa kataposan, motungha ang kalibog, pagduhaduha ug hingpit nga pagkawala sa pagtuo.
Kon nagsugod ka na sa dalan sa pagkahimong mas dagaang sa imong pagtuo, ang pagbadlong ni Jesus niining mga lungsora angay nimong sabton nga gitumong usab kanimo uban sa gugma. “Ang matag usa nga gihatagan ug daghan, daghan usab ang pangayoon gikan kaniya…” (Lucas 28:48). Busa, daghan ang gipaabot gikan niadtong natudloan pag-ayo sa pagtuo. Ug kon dili nato matuman ang gipangayo sa Dios kanato tungod sa Iyang gugma, usa ka balaang pagbadlong gayod ang atong gikinahanglan.
Pamalandongi karon kon ang pagbadlong ni Jesus niining mga lungsod gitumong usab ba kanimo. Gipanalanginan ka ba ug maayong pag-umol sa pagtuo? Kon mao, gibuhat ba nimo ang tanan nimong mahimo aron maamuma kana nga pagtuo ug motubo ang imong gugma sa Dios? O gipasagdan ba nimo nga mohinay ang imong pagtuo, mobugnaw, ug magsugod sa pagkalaya ug pagkamatay? Kon daghan ang gihatag kanimo, gipadako ka sa pagtuo, ug nakadawat ka sa grasya nga adunay maayong mga panig-ingnan sa imong kinabuhi, hibaloi nga daghan ang gipaabot sa Dios gikan kanimo. Tubaga kanang halangdong tawag nga gihatag kanimo ug sanonga ang Dios sa tibuok nimong kasingkasing.
Akong Jesus nga puno sa kadasig, Imong gibubo ang tibuok Mong kasingkasing ug kalag pinaagi sa Imong pagsangyaw ngadto sa katawhan sa Israel. Bisan tuod daghan ang midawat Kanimo, daghan usab ang misalikway Kanimo. Nagpasalamat ako Kanimo sa pribilehiyo nga gihatag kanako nga makadungog sa Imong balaang Pulong nga gisangyaw kanako. Tabangi ako nga mosanong Kanimo sa tibuok kong kasingkasing aron mahiapil ako niadtong maminaw ug motuo. Jesus, ako misalig Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Camillus de Lellis, Pari—Opsiyonal nga Paghandom sa USA
(Gisaulog sa Hulyo 14 gawas sa Estados Unidos)
Mga Kapilian sa mga Basahon sa Misa
Gipasiugda nga hulagway sa ibabaw: Adlaw sa Paghukom pinaagi sa flickr
