Hulyo 30, 2023
Ikanapulog-pitong Domingo sa Ordinaryong Panahon (Tuig A)
Mga Pagbasa alang sa Karong Adlawa
Paminaw sa Iningles
“Usab, ang gingharian sa langit sama sa usa ka pukot nga gitaktak sa dagat ug nakakuha og tanang matang sa isda. Sa dihang napuno na kini, gibira nila kini ngadto sa baybayon ug nanglingkod aron ibutang sa mga sudlanan ang maayong mga isda. Ang dili maayo ilang gilabay. Mao usab kini sa kataposan sa panahon. Mogula ang mga anghel ug ilain ang mga daotan gikan sa mga matarong ug itambog sila sa nagdilaab nga hudno, diin adunay paghilak ug pagkagot sa mga ngipon.” Mateo 13:47–50
Kini nga sambingay mao ang ikatulo sa tulo ka sambingay nga gisaysay ni Jesus nga sunodsunod. Ang una nagtandi sa Gingharian sa Langit sa usa ka “bahandi nga gilubong sa uma.” Sa dihang makaplagan kini sa usa ka tawo, iyang ibaligya ang tanan niyang kabtangan aron mapalit kadtong uma. Ang ikaduhang sambingay nagtandi sa Gingharian sa Langit sa usa ka magpapatigayon nga nangitag matahom nga mga perlas. “Sa dihang makakaplag siya og usa ka perlas nga bililhon kaayo, molakaw siya ug ibaligya ang tanan niyang kabtangan ug paliton kini.” Niining duha ka sambingay, dakong kalipay ang pagkakaplag sa Gingharian sa Langit. Ang tawo nga nakakaplag sa bahandi o sa perlas malipayon kaayo nga andam siyang ibaylo ang tanan niyang kabtangan aron maangkon kini.
Apan lahi kaayo ang ikatulo niining tulo ka sambingay. Dinhi, ang Gingharian sa Langit gitandi sa usa ka pukot nga nagtigom sa tanang tawo sa kataposan sa panahon ug naglain kanila, sa mga maayo gikan sa mga daotan. Unya gitapos ang sambingay sa usa ka makahahadlok nga hulagway. Ang mga daotan itambog “sa nagdilaab nga hudno, diin adunay paghilak ug pagkagot sa mga ngipon.”
Sa kataposan, alang niadtong mosulod sa mga himaya sa Langit, adunay walay kataposang kalipay. Ug kinahanglang masabtan kining kamatuoran aron madani kita ngadto niadtong mga bahandi sa grasya. Ang pagpaabot sa maong gasa angay magdasig kanato sa makugihong pagpangita sa daghang grasya nga buot ihatag sa atong Ginoo kanato. Apan usahay nagkinahanglan kita og dugang nga pag-aghat. Dali ra kitang makontento sa atong kahimtang sa pagkinabuhi sa pagtuo ug sa atong pagpangita sa kabubut-on sa Dios. Tungod niini, gilakip ni Jesus ang ikatulong sambingay, nga naglatid sa mga sangpotanan nga antoson sa uban sa kataposan sa panahon. Bisan tuod dili kini malipayong hunahuna, balaan kini nga hunahuna tungod kay nagpadayag kini sa kataposang hustisya ug paghukom sa Dios sa kataposan sa panahon.
Nagtuo ka ba sa Hustisya sa Dios? Nagtuo ka ba nga ipahamtang Niya ang kataposang paghukom niadtong nagsalikway sa Iyang balaang kabubut-on niining kinabuhia? Nagtuo ka ba nga tinuod ang Impiyerno ug nga posible nga maadto didto ang bisan kinsa kanato? Kon lisod dawaton kining hunahuna, angay tingali nga pamalandongan pa gayod uban sa pag-ampo kining ikatulong sambingay. Tinuod ang hustisya ug ang paghukom. Kon dili pa hingpit ang atong kadasig sa kinabuhi sa makugihong pagpangita sa himaya sa Gingharian sa Langit, labing menos kinahanglan natong matinud-anong atubangon ang kamatuoran sa mga sangpotanan nga nagpaabot.
Pamalandongi karon ang himaya, katahom ug kahalangdon sa Dios. Paningkamoti nga ipunting ang imong mga mata sa pagtuo ngadto sa Bahandi sa Gingharian sa Langit. Tugoti kining mainampuong pagpamalandong nga modasig kanimo sa paghimo sa pag-angkon sa Gingharian sa Langit nga imong bugtong misyon sa kinabuhi. Apan kon naglisod ka sa pagkakaplag niining kalipaya, ayaw pagpanuko sa pagpamalandong sa posibleng mga sangpotanan. Gihisgotan sa Ginoo kining mga sangpotanan sa hustisya ug paghukom sa Dios alang sa atong kaayohan, aron dili kini mahimong atong dangatan.
Akong matarong nga Maghuhukom, Imong nakita ang tanang butang ug nahibalo Ka sa tanang butang. Hingpit Mong nailhan ang akong kasingkasing. Palihog hinloi ako gikan sa matag sala ug sa tanang pagkakontento sa akong kahimtang sa kinabuhi. Pun-a ako sa balaang kadasig alang sa Imong Gingharian. Hinaot nga ang kalipay sa pagkakaplag Kanimo hingpit nga magdasig kanako sa pagpabiling makugihon sa akong panaw paingon sa Langit. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Pedro Crisologo, Obispo ug Doktor sa Simbahan
Dili saulogon isip liturhikanhong handumanan karong tuiga kay natunong kini sa Domingo
Mga Kapilian sa mga Basahon sa Misa
Pangunang hulagway sa ibabaw: Ang Kataposang Paghukom ni Michelangelo, pinaagi sa Wikimedia Commons
.jpg){kind=link}