Lunes, Nobyembre 13, 2023
Handumanan ni Santa Frances Xavier Cabrini, Birhen
Mga Pagbasa Karong Adlawa
Mga Pagbasa sa Lunes sa Ika-32 nga Semana sa Ordinaryong Panahon
Paminaw sa Iningles
View Video Reflection
Miingon si Jesus sa iyang mga tinun-an, “Dili gayod malikayan nga moabot ang mga butang nga makapahinungod sa pagpakasala, apan alaot ang tawo nga pinaagi kaniya mahitabo kini. Mas maayo pa alang kaniya nga sab-itan ang iyang liog ug bato sa galingan ug itambog siya sa dagat kay sa makapahinungod siya sa pagpakasala sa usa niining mga gagmay.” Lucas 17:1–2
Tin-aw kaayo ang hulagway sa pagsab-it ug bato sa galingan sa imong liog ug pagtambog kanimo sa dagat. Gigamit ni Jesus ang mga pulong nga kusog kaayong makapukaw sa hunahuna ug pagbati. Ang bato sa galingan maoy usa ka dakong lingin nga bato nga adunay buslot sa tunga. Kon isab-it kini sa liog sa usa ka tawo ug itambog siya sa dagat, dayag nga mounlod siya ngadto sa ilalom ug mamatay. Busa, klarong gipahayag ni Jesus nga kining makalilisang nga dangatan mas maayo pa gayod kay sa dangatan niadtong makapahinungod sa “usa niining mga gagmay sa pagpakasala.”
Una sa tanan, kinahanglan klarohon nga walay bisan kinsa nga makapapili gayod kanato sa pagpakasala. Ang sala mao ang atong kaugalingong gawasnong pagpili, ug kita, ug kita lamang, ang manubag sa atong kaugalingong sala. Usa sa mga butang nga gipunting ni Jesus dinhi mao nga bisan pa nga ang matag tawo kinahanglang manubag sa iyang kaugalingong mga buhat ug mga sala, kinahanglan usab kitang manubag sa mga paagi diin kita mahimong maninintal sa uban. Kitang tanan mga makasasala. Busa, pinaagi sa atong sala, kitang tanan makatintal usab sa uban sa pagpakasala. Usahay matintal nato ang mga tawo sa pagpakasala pinaagi sa pagpukaw sa ilang kasuko. Sa ubang higayon, matintal nato ang uban sa pagpakasala pinaagi sa pagpakitag daotang panig-ingnan. Sa laing bahin, aduna usab kitay katakos sa “pagtintal” sa mga tawo ngadto sa birtud. O, sa mas tukmang pagkasulti, sa pagdasig ug pag-aghat kanila.
Human niana, gipasabot ni Jesus nga kadtong mahimong maninintal sa uban, ilabina sa “mga gagmay,” mag-atubang ug mga sangpotanan nga mas bug-at pa kay sa kamatayon nga dili pa unta angay moabot. Ang mga gagmay nga gihisgotan ni Jesus angay sabton nga mao kadtong huyang sa pagtuo, daling masakitan, ilabinang walay lig-ong panalipod nianang taknaa sa ilang kinabuhi, ug daling maimpluwensiyahan sa uban. Mahimong bata kini, o mahimong usa ka tawo nga karon nag-ungaw sa pagkawalay paglaom, kalibog, kasuko, o bisan unsang bug-at nga sala. Kon makasugat ka ug mga tawo nga sama niini, giunsa nimo sila pagtratar? Lawom ang kalooy sa kasingkasing ni Jesus alang niining mga tawhana, ug gusto Niya nga maangkon usab nato ang samang kalawom sa kalooy. Apan usahay mapakyas kita. Mahimong mapasagdan nato ang atong katungdanan sa pagduol ug pagtabang kanila. Bisan kining pagpasagad mahimong usa ka paagi sa pagpahinungod sa “usa niining mga gagmay sa pagpakasala.” Siyempre, mas grabe pa gayod kon tinuyo nato silang samokon, hukman sa mapintas nga paagi, pukawon ang ilang kasuko, danihon pinaagi sa atong pagtintal ngadto sa sala nga bunga sa kahuyang ug sa pagpangitag bakak nga paghupay, ug uban pa. Ang yanong kamatuoran mao nga gihigugma ni Jesus ang mga huyang, ang daling madaot, ug ang mga makasasala, ug gusto Niya nga higugmaon nato sila uban sa Iyang kasingkasing. Kon mapakyas kita sa pagbuhat niini, panubagon kita ni Jesus sa ilang dugang nga pagkalayo gikan sa grasya.
Pamalandongi karon ang tawo o mga tawo sa imong kinabuhi nga niining panahona daw ilabinang huyang, makasasala, naglibog, ug nahisalaag. Kinsa ang nakigbisog sa kasuko, sa pagkaadik, o sa usa ka makasasalang paagi sa pagkinabuhi? Pamalandongi ang imong pagtagad kanila. Mahukmanon ka ba, mapanghimarauton, mapanamastamason, ug uban pa? Gitintal ba nimo sila nga mas mahulog pa sa mga sala nga ilang nahimo tungod sa ilang kahuyang, ug sa ingon gitultolan sila ngadto sa dugang pang sala? O, kon makasugat ka og usa ka tawo nga hilabihang nakigbisog, moduol ka ba kaniya uban sa kinahiladman nga pagbati og kaluoy ug kalooy, magpasaylo sa bisan unsang paagi nga nakasala siya batok kanimo, ug maningkamot lamang nga anaa alang kaniya sa iyang panginahanglan, bisan unsa pa kini kalisod alang kanimo? Itugyan ang imong kaugalingon sa usa ka lawom nga gugma alang sa tanang “mga gagmay” sa Diyos ug paningkamoti ang pag-alagad kanila uban sa kasingkasing ni Kristo aron sa umaabot nga adlaw magmalipayon sila uban kanimo hangtod sa kahangtoran didto sa Langit.
Labing maluluy-on kong Ginoo, gihigugma Mo ang mga makasasala ug hilabihan Mong gitinguha nga modangop sila Kanimo sa ilang panginahanglan. Palihog, hatagi ako sa Imong maluluy-ong kasingkasing aron gawasnon akong makahigugma kanila sama sa Imong paghigugma kanila. Hinaot nga dili gayod ako mahimong instrumento sa pagtintal kanila nga mosamot pa ang ilang pagpalayo Kanimo, kondili mahimong instrumento sa Imong walay pagkapakyas nga kaluoy. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – Santa Frances Xavier Cabrini, Birhen
Mga Kapilian sa mga Basahon sa Misa
_-_James_Tissot_-_overall.jpg){kind=link}