Nobyembre 15, 2023
Miyerkules sa Ikakatloan ug Duha nga Semana sa Kasagarang Panahon
Mga Pagbasa alang sa Karon
San Alberto Magno, Obispo ug Doktor sa Simbahan—Opsiyonal nga Handumanan
Paminaw sa Iningles
Si Jesus mitubag, “Dili ba napulo man ang nangahinlo? Hain man ang laing siyam? Wala bay mibalik aron magpasalamat sa Diyos gawas niining langyaw?” Unya miingon Siya kaniya, “Tindog ug lakaw; ang imong pagtuo nakaluwas kanimo.” Lucas 17:17–19
Kini nga tubag sa atong Ginoo gitumong sa usa ka sanlahon nga mibalik kang Jesus aron magpasalamat Kaniya. Napulo ka sanlahon ang miduol kang Jesus, mibarog sa layo, ug misinggit, “Jesus, Magtutudlo! Kaloy-i kami!” Ug tungod niana, giayo silang tanan ni Jesus. Apan ang kinauyokan niining pagpang-ayo dili kaayo ang pagkaayo mismo kondili ang pagpasalamat nga gipahayag sa usa lamang sa napulo.
Giasoy kanato niining Ebanghelyo nga kining usa ka sanlahon mihimo og lima ka butang aron ipahayag ang iyang lalom nga pagpasalamat. Mibalik siya, mihimaya sa Diyos, mihimo niini sa makusog nga tingog, mihapa sa tiilan ni Jesus, ug nagpasalamat Kaniya. Pagkaanindot nga pagpamatuod alang kanatong tanan!
Sa susamang paagi, sagad balewalaon sa mga anak ang mahigugmaong pag-atiman sa ilang mga ginikanan. Mao nga daghang maayong ginikanan kanunayng magpahinumdom sa ilang mga anak sa pag-ingon og “salamat.” Sa atong relasyon sa Diyos, sayon usab kaayo alang kanato nga balewalaon ang makaluwas nga mga buhat sa Diyos. Sayon kaayo natong isipon ang tanang grasya nga atong nadawat ingong usa ka butang nga angay natong madawat, imbes ingong usa ka gasa sa walay kinutobang kalooy. Kon mahitabo kini, mas mahisama kita sa laing siyam nga wala makapahayag sa hustong paagi sa ilang pagpasalamat kang Jesus.
Una sa tanan, kinahanglang timan-an nga dili kita magpahayag og pagpasalamat sa Diyos tungod kay gikinahanglan Niya kining mga pagdayeg. Dili Siya magsalig sa atong pagpasalamat aron mapamatud-an ang Iyang kaugalingong bili. Tataw kini. Ang Diyos mao ang Diyos, ug wala gayod Siya magkinahanglan sa atong pagdayeg. Apan mahinungdanon gayod ang paghatag og kinasingkasing nga pagdayeg ug himaya sa Diyos. Mahinungdanon kini kay gikinahanglan nato kining hiyas sa pagkamapasalamaton aron matag adlaw mapahinumdoman kita nga ang tanan natong nadawat gikan sa Diyos usa ka gasa nga wala nato maangkon tungod sa atong kaugalingong merito. Dili nato maangkon ang Iyang gugma ug grasya pinaagi sa atong kaugalingong mga paningkamot. Dili kita angayan niini. Apan gipili gihapon Niya ang paghatag niini tungod sa Iyang kalooy. Ug ang bugtong angay nga tubag sa kalooy mao ang pagpasalamat. Lalom nga pagpasalamat.
Mahinungdanon gayod ang pagkamapasalamaton tungod kay kini mao ang kamatuoran. Kinahanglan kanunay kitang mobalik sa atong Ginoo human kita Niya hatagi og grasya. Kinahanglan himayaon nato Siya uban sa dakong kainit sa pagbati, nga manawag Kaniya sa kinasingkasing gayod. Kinahanglan nga sa tinuod nga buhat ug sa atong kinasuloran, mohapa kita sa Iyang atubangan, diha sa Iyang tiilan, ug magpasalamat Kaniya, balikbalik ug walay puas. Ang pagbuhat niini kanunayng makatabang kanato sa paghinumdom sa kamatuoran nga ang tanan natong nabatonan ug ang tanan natong pagkatawo usa ka gasa gikan sa Diyos. Usa ka gasa sa grasya nga wala nato maangkon pinaagi sa atong merito ug dili kita angayan nga makadawat.
Pamalandongi karong adlawa ang kalalom sa pagkamapasalamaton diha sa imong kasingkasing. Kanunay ka bang molihok nga daw usa ka pinatuyang ug hakog nga bata, o kanunay ka bang makamatikod sa kaayo sa Diyos? Kon kulang ka sa bisan unsang paagi niining kahingpitan sa pagkamapasalamaton, pamalandongi kining usa ka sanlahon. Ang iyang pagpasalamat, nga gipahayag sa tibuok kainit sa iyang pagbati, mao ang labing mahinungdanong bahin niining sugilana. Sa kataposan, mas daghan pa ang grasya nga iyang nadawat kay sa laing siyam tungod kay ang iyang pagkaayo misangpot sa pagtuo; ug kadto nga pagtuo ang nakaluwas dili lamang sa iyang lawas kondili usab sa iyang kalag. Paningkamoti nga maluwas ang imong kalag pinaagi sa pagsundog sa pagtuo niining balaan ug naayong sanlahon.
Akong maluluy-ong Ginoo, Imong gibubo kanako ang Imong kalooy sa hilabihang kadagaya. Kon wala Ka, Jesus, wala akoy bisan unsa; apan kon anaa Ka, madawat ko ang tanan. Hinaot kanunay nakong mailhan ug masabtan ang akong panginahanglan sa Imong grasya. Ug samtang gidawat ko kini isip gasa, hinaot motubag ako uban sa kinahiladman nga pagpasalamat, ug sa ingon, maluwas ang akong kalag pinaagi sa pagtuo. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Kasagarang Panahon
Santos sa Adlaw – San Alberto Magno, Obispo ug Doktor sa Simbahan
Mga Kapilian sa mga Basahon sa Misa
