Dili Masabtan

Enero 20, 2024
Sabado sa Ikaduhang Semana sa Ordinaryong Panahon
Mga Pagbasa Karong Adlawa

Paminaw sa Iningles

Misulod si Jesus sa balay uban sa Iyang mga tinun-an. Nagtigom na usab ang panon sa katawhan, busa dili na gani sila makakaon. Sa pagkadungog niini sa Iyang mga paryente, nangadto sila aron pugngan Siya, kay miingon sila, “Nabuang na Siya.” Marcos 3:20–21

Kon imong palandongon ang mga pag-antos ni Jesus, lagmit ang unang mosantop sa imong hunahuna mao ang paglansang Kaniya sa krus. Dayon, tingali mahunahuna nimo ang paglatos Kaniya samtang gigapos sa haligi, ang pagpas-an sa Krus ug ang ubang mga hitabo sukad sa pagdakop Kaniya hangtod sa Iyang kamatayon. Apan, daghan pang ubang tawhanong pag-antos ang giantos sa atong Ginoo alang sa atong kaayohan ug sa kaayohan sa tanan. Ang tudling sa Ebanghelyo sa ibabaw nagpakita kanato sa usa sa maong mga kasinatian.

Bisan tuod dili gayod nato gusto ang pisikal nga kasakit, adunay ubang mga pag-antos nga sama ra kalisod antoson, o mas lisod pa gani. Usa niini mao ang dili ka masabtan ug trataron sa imong kaugalingong pamilya nga morag nabuang ka. Sa kahimtang ni Jesus, daw daghan sa Iyang mga kabanay, gawas siyempre sa Iyang kaugalingong inahan, ang dayag kaayong nagsaway Kaniya. Tingali nasina sila Kaniya ug may gibating kasina, o tingali naulaw sila tungod sa dakong pagtagad sa mga tawo Kaniya. Bisan unsa pa ang hinungdan, klaro nga ang kaugalingong mga paryente ni Jesus misulay sa pagpugong Kaniya sa pag-alagad sa mga tawo nga nangandoy pag-ayo nga makauban Siya. Ang pipila sa Iyang mga kabanay mihimo og istorya nga si Jesus “nabuang na” ug naninguha sa paghunong sa Iyang pagkabantogan.

Ang kinabuhi sa pamilya angay unta nga mahimong usa ka katilingban sa gugma, apan alang sa uban nahimo kini nga tinubdan sa kasubo ug kasakit. Nganong gitugotan man ni Jesus nga maantos Niya kining matang sa pag-antos? Usa sa mga hinungdan mao aron makasabot Siya sa bisan unsa ug sa tanang pag-antos nga imong masinati tungod sa imong kaugalingong pamilya. Dugang pa, pinaagi sa Iyang pag-antus niini, gitubos usab Niya kining matang sa pag-antos, aron ang kasakit nga imong nasinati sa pamilya makaambit nianang pagtubos ug grasya. Busa, kon modangop ka sa Diyos pinaagi sa pag-ampo dala ang imong mga kalisdanan sa pamilya, mahupay ka sa pagkahibalo nga ang Ikaduhang Persona sa Labing Balaang Trinidad, si Jesus, ang Walay Kataposang Anak sa Diyos, nakasabot sa imong pag-antos gikan sa Iyang kaugalingong kasinatian isip tawo. Nahibalo Siya sa kasakit nga gibati sa daghang mga sakop sa pamilya kay nasinati Niya kini mismo. Ug mahimo Niyang tan-awon ang matag pag-antos sa pamilya uban sa labing dakong kalooy aron mahatagan ang matag tawo nga mangayo sa grasya nga ilang gikinahanglan, dili lamang aron makaantos nianang pag-antos kondili aron magamit usab kini alang sa kaayohan ug sa himaya sa Diyos.

Pamalandongi karon kon unsang kasakit sulod sa imong kaugalingong pamilya ang kinahanglan nimong itugyan ngadto sa Diyos. Dangop sa atong Ginoo nga hingpit nga nakasabot sa imong mga kalisdanan ug dapita ang Iyang gamhanan ug maluloy-ong presensya sa imong kinabuhi aron mabag-o Niya ang tanan nimong giantos ngadto sa Iyang grasya ug kalooy.

Akong maluloy-ong Ginoo, daghan Ka og giantos niining kalibotana, lakip ang pagsalikway ug pagbiaybiay sa mga sakop sa Imong kaugalingong pamilya. Gitanyag ko Kanimo ang akong kaugalingong pamilya ug ilabina ang kasakit nga among nasinati. Palihog, umari Ka ug tubosa ang tanang kalisdanan sa pamilya ug dad-a ang kaayohan ug paglaom kanako ug sa tanan nga labing nagkinahanglan niini. Jesus, nagsalig ako Kanimo.

Nobena sa 9 ka Adlaw alang sa Kinabuhi
Enero 19–27
Ikaduhang adlaw: Enero 20

Bag-o alang sa Kwaresma 2024!40 ka Adlaw sa Kamingawan:
Usa ka Panaw sa Kwaresma uban sa Atong Ginoo