Enero 19, 2024
Biyernes sa Ikaduhang Semana sa Panahon sa Tuig
Mga Pagbasa alang sa Karong Adlawa
Paminaw sa Iningles
Nagtudlo Siya og Napulog Duha, nga Iya usab ginganlag mga Apostoles, aron sila makauban Niya ug aron Iya silang ipadala sa pagsangyaw ug hatagan og gahom sa paghingilin sa mga demonyo. Marcos 3:14–15
Ang Napulog Duha ka Apostoles unang gitawag ni Jesus ug dayon gipadala aron magsangyaw uban sa awtoridad. Ang awtoridad nga gihatag kanila gituyo alang sa paghingilin sa mga demonyo. Apan giunsa man nila kini pagbuhat? Makapainteres nga matikdan nga ang awtoridad nga gihatag kanila batok sa mga demonyo adunay kalabotan, sa usa ka bahin, sa ilang sugo sa pagsangyaw. Ug bisan tuod adunay pipila ka mga hitabo nga nahisulat sa Kasulatan diin ang mga Apostoles direktang naghingilin sa mga demonyo pinaagi sa pagsugo, angay usab sabton nga ang pagsangyaw sa Ebanghelyo uban sa awtoridad ni Kristo adunay direktang epekto sa paghingilin sa mga demonyo.
Ang mga demonyo mao ang mga anghel nga nangahulog sa sala. Apan bisan niining ilang kahimtang, nagpabilin kanila ang ilang kinaiyanhong mga gahom, sama sa gahom sa pag-impluwensiya ug pagsilsil og mga hunahuna. Naningkamot silang makigkomunikar kanato aron limbongan kita ug ipahilayo kang Kristo. Siyempre, ang maayong mga anghel naggamit usab niining samang kinaiyanhong gahom alang sa atong kaayohan. Pananglitan, ang atong mga anghel nga magbalantay kanunayng naningkamot sa pagpahibalo kanato sa mga kamatuoran sa Dios ug sa Iyang grasya. Tinuod ang panagsangka tali sa maayo ug dautang mga anghel, ug isip mga Kristohanon kinahanglan kitang mahibalo niining kamatuorana.
Usa sa labing maayong mga paagi sa pag-atubang kang satanas ug sa iyang mga demonyo mao ang pagpaminaw sa Kamatuoran ug pagsangyaw niini uban sa awtoridad ni Kristo. Bisan tuod ang mga Apostoles gihatagan og pinasahing awtoridad alang sa ilang pagsangyaw, ang matag Kristohanon, pinaagi sa iyang Bunyag ug Kumpirma, gitugyanan sa mensahe sa Ebanghelyo aron isangyaw sa nagkalainlaing mga paagi. Ug uban nianang awtoridara, kinahanglan kitang kanunayng maningkamot sa pagpatunhay sa Gingharian sa Dios. Ang pagbuhat niini adunay direktang epekto sa pagkunhod sa gingharian ni satanas.
Pamalandongi karong adlawa ang imong katungdanan sa pagpaambit sa Ebanghelyo ngadto sa uban. Usahay mahimo kini pinaagi sa dayag nga pagpaambit sa mensahe ni Jesu-Kristo, ug sa ubang mga higayon mas mapaambit ang mensahe pinaagi sa atong mga buhat ug hiyas. Apan ang matag Kristohanon gitugyanan niining misyon ug kinahanglan makakat-on sa pagtuman niini uban sa tinuod nga awtoridad, nga nasayod nga sa paggamit nianang awtoridara gikan kang Kristo, molapad ang Gingharian sa Dios ug mabuntog ang kalihokan sa dautan.
Akong Ginoong makagagahom sa tanan, nagpasalamat ako Kanimo sa grasya nga Imong gihatag kanako aron isangyaw ang kamatuoran sa Imong mensahe sa kaluwasan ngadto sa akong mahimamat matag adlaw. Tabangi ako sa pagtuman sa akong misyon sa pagsangyaw pinaagi sa pulong ug sa buhat, ug sa pagbuhat niini uban sa malumo apan gamhanang awtoridad nga Imong gihatag kanako. Gitugyan ko ang akong kaugalingon sa pag-alagad Kanimo, minahal nga Ginoo. Buhata kanako ang Imong kabubut-on. Jesus, nagsalig ako Kanimo.
Nobena nga 9 ka Adlaw alang sa Kinabuhi
Enero 19–27
Unang adlaw: Enero 19
Bag-o alang sa Kwaresma 2024!
40 ka Adlaw sa Kamingawan:
Usa ka Panaw sa Kwaresma uban sa Atong Ginoo
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
