Pebrero 10, 2024
Handumanan ni Santa Escolastica, Birhen
Mga Pagbasa alang Karong Adlawa
Pagbasa alang sa Sabado sa Ikalimang Semana sa Ordinaryong Panahon
Paminaw sa Iningles
“Natandog sa kaluoy ang Akong kasingkasing alang niining panon sa katawhan, kay tulo na ka adlaw silang nag-uban Kanako ug wala na silay makaon. Kon papaulion Ko sila nga gigutom, mangatumba sila sa dalan, ug ang uban kanila gikan pa sa layo kaayo.” Mark 8:2–3
Ang pangunang misyon ni Jesus mao ang espirituhanong misyon. Mianhi Siya aron gawason kita gikan sa mga sangpotanan sa sala aron makasulod kita sa mga himaya sa Langit hangtod sa kahangtoran. Ang Iyang kinabuhi, kamatayon ug pagkabanhaw naglaglag sa kamatayon mismo ug nag-abli sa dalan aron maluwas ang tanan nga modangop Kaniya. Apan hingpit kaayo ang gugma ni Jesus alang sa katawhan nga gitagad usab Niya ang ilang pisikal nga mga panginahanglan.
Una sa tanan, pamalandongi ang unang mga pulong niining pahayag sa atong Ginoo sa ibabaw: “Natandog sa kaluoy ang Akong kasingkasing alang niining panon sa katawhan…” Ang diosnong gugma ni Jesus nalambigit pag-ayo sa Iyang pagkatawo. Gihigugma Niya ang tibuok nga tawo, lawas ug kalag. Niining asoy sa Ebanghelyo, tulo na ka adlaw nga nag-uban Kaniya ang katawhan ug gigutom na sila, apan wala silay gipakitang timailhan nga mobiya sila. Nahingangha kaayo sila sa atong Ginoo nga dili na sila gustong mobiya. Gipunting ni Jesus nga grabe na ang ilang kagutom. Kon papaulion Niya sila, nabalaka Siya nga sila “mangatumba sa dalan.” Busa, kining mga kahimtanga mao ang hinungdan sa Iyang milagro.
Usa sa mga leksiyon nga atong makat-onan niining asoya mao ang mahitungod sa atong mga prayoridad sa kinabuhi. Kasagaran, may kalagmitan nga mabaliskad ang atong mga prayoridad. Siyempre, mahinungdanon ang pagtagana sa mga kinahanglanon sa kinabuhi. Nagkinahanglan kita og pagkaon, puy-anan, sinina ug uban pa. Kinahanglan natong atimanon ang atong mga pamilya ug tagan-an ang ilang sukaranang mga panginahanglan. Apan sagad kaayo natong unahon kining sukaranang mga kinahanglanon sa kinabuhi kay sa atong espirituhanong panginahanglan sa paghigugma ug pag-alagad kang Cristo, nga daw magkasupak kining duha. Apan dili kana mao ang tinuod.
Niining Ebanghelyo, gipili sa katawhan nga nag-uban kang Jesus nga unahon ang ilang pagtuo. Gipili nila nga magpabilin uban kang Jesus bisan tuod wala silay makaon. Tingali adunay mga tawo nga mibiya usa o duha ka adlaw sa sayo pa, nga nakahukom nga mas angay unahon ang panginahanglan og pagkaon. Apan kadtong lagmit mibuhat niini wala makadawat sa talagsaong gasa niining milagro diin ang tibuok panon sa katawhan napakaon hangtod nga nabusog gayod silang tanan. Siyempre, dili gusto sa atong Ginoo nga magpasagad kita sa atong mga responsibilidad, ilabina kon may katungdanan kita sa pag-atiman sa uban. Apan kini nga asoy nagtudlo gayod kanato nga ang atong espirituhanong panginahanglan nga amumahon sa Pulong sa Dios kinahanglan mao kanunay ang atong labing dakong kabalak-an. Kon unahon nato si Cristo, ang tanang ubang panginahanglan matubag sumala sa Iyang probidensiya.
Pamalandongi karon ang imong kaugalingong mga prayoridad sa kinabuhi. Unsay mas mahinungdanon alang kanimo? Ang sunod nimong lamian nga pagkaon? O ang imong kinabuhi sa pagtuo? Bisan tuod dili kinahanglan nga magkasupak kining duha, mahinungdanon nga unahon kanunay sa kinabuhi ang imong gugma sa Dios. Pamalandongi kining dakong panon sa katawhan nga nagpabilin uban kang Jesus sulod sa tulo ka adlaw didto sa kamingawan nga walay pagkaon, ug sulayi paghanduraw ang imong kaugalingon nga kauban nila. Pilia usab ang ilang gipili nga magpabilin uban kang Jesus, aron ang imong gugma sa Dios mahimong pangunang sentro sa imong kinabuhi.
Akong Ginoo nga nagtagana sa tanan, nasayod Ka sa matag panginahanglan nako ug nagpakabana Ka sa matag bahin sa akong kinabuhi. Tabangi ako nga mosalig Kanimo sa hingpit aron kanunay nakong unahon sa akong kinabuhi ang akong gugma Kanimo. Nagtuo gayod ako nga kon Ikaw ug ang Imong kabubut-on magpabiling labing mahinungdanon sa akong kinabuhi, matagana ra usab ang tanang ubang gikinahanglan sa kinabuhi. Hesus, misalig ako Kanimo.
Duha ka adlaw-adlaw nga debosyonal alang sa Kwaresma:
40 Days in the Desert
&
40 Days at the Foot of the Cross
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – Santa Escolastica, Birhen—Handumanan
Mga Kapilian sa mga Basahon sa Misa
