Abril 28, 2024
Ikalimang Domingo sa Pasko sa Pagkabanhaw (Tuig B)
Mga Pagbasa Karong Adlawa
Paminaw sa Iningles
Miingon si Jesus sa Iyang mga tinun-an: “Ako mao ang tinuod nga punoan sa ubas, ug ang Akong Amahan mao ang tig-atiman niini. Iyang tangtangon ang matag sanga Kanako nga dili mamunga, ug ang matag sanga nga mamunga Iyang pul-ongan aron mas daghan pa ang bunga niini. Napul-ongan na kamo tungod sa pulong nga Akong gisulti kaninyo.” Juan 15:1–3
Ang pagpul-ong sa punoan sa ubas usa ka mahinungdanong bahin sa pagtabang niini nga motubo ug makapamunga dili lamang og mas daghan kondili sa labing maayong bunga usab. Kon dili pul-ongan, sa ngadto-ngadto mokunhod ang bunga sa punoan sa ubas ug mous-os ang kalidad niini. Ang hustong pagpul-ong makatabang sa pagpadulong sa sustansiya sa punoan ngadto sa bag-ong mga putot nga labing mabungahon.
Ang pagtulon-an ni Jesus sa ibabaw naggamit sa hulagway sa pagpul-ong sa punoan sa ubas aron matabangan kita nga makasabot nga ang pagtuo kinahanglang mosangpot sa gugma. Una, miingon si Jesus nga Siya mao ang “tinuod nga punoan sa ubas.” Siya lamang ang tinubdan sa sustansiya nga atong gikinahanglan alang sa bag-ong kinabuhi sa grasya. Siya lamang ang dalan ngadto sa Langit ug sa kaluwasan. Ang pag-ila sa atong Ginoo ug ang lig-ong pagkahiusa Kaniya mao ang pagtuo. Ikaduha, miingon ang atong Ginoo nga Iyang tangtangon ang matag sanga nga dili mamunga. Kini nagpasabot nga ang pagtuo nga walay maayong bunga sa gugma patay ug sama sa sanga sa punoan sa ubas nga walay bunga. Ikatulo, kon makakita si Jesus og sanga nga naghatag og maayong bunga, dili Niya kini pasagdan lamang. Hinuon, Iya kining pul-ongan uban sa mahigugmaong pag-atiman aron “mas daghan pa ang bunga niini.”
Aron mapadapat kining mga pagtulon-an sa imong kaugalingong kinabuhi, sugdi pinaagi sa pagtan-aw sa imong pagtuo nga daw usa kini ka sanga nga lig-ong nakakabit sa punoan sa ubas. Nagtuo ka ba sa tanan nga gisulti sa Dios pinaagi sa Iyang balaang Pulong? Mapuslanon ang kanunay nga pagsusi sa imong konsensiya kalabot sa imong pagtuo. Sanglit ang pagtuo mao ang unang lakang sa espirituhanong kinabuhi, kinahanglang magpabilin kini nga lig-ong nakagamot sa Kamatuoran nga gipadayag sa Dios. Nagpasabot kini nga kinahanglan natong tun-an kanunay ang Pulong sa Dios sumala sa gipadayag niini pinaagi sa Balaang Kasulatan ug sa mga pagtulon-an sa katekesis sa Simbahan, ug mouyon sa maong mga pagtulon-an uban sa tibuok natong hunahuna.
Sunod, human nimo mapalig-on ang imong pagtuo sa tanan nga gisulti sa Dios pinaagi sa Balaang Kasulatan ug sa Simbahan, sulayi pagsusi ang imong gugma. Nakakita ka ba og konkretong mga buhat sa gugma sa imong kinabuhi nga naggikan sa imong pagtuo? Sa laing pagkasulti, mahimo kitang “mahigugma” sa daghang butang sa paagi nga gibase lamang sa emosyon. Apan ang gugma gibase sa pagtuo, dili sa atong gibati. Ang gugma mao ang bunga sa pagtuo. Unsang mga buhat sa gugma ang imong matudlo sa imong kinabuhi? Unsa ang imong nabati nga gitawag ka sa Dios nga buhaton sa paaging walay pagkamahakogon ug puno sa pagsakripisyo? Gibuhat ba nimo kini?
Sa kataposan, kon imong madiskobrehan ang mga paagi diin buhi ang gugma sulod kanimo, hibaloi nga didto ipunting sa Dios ang Iyang pagpul-ong. Ang pagpul-ong mahimong masakit. Magkinahanglan kini og pagsakripisyo, pailob atubangan sa pagsulay, pagbuntog sa pagkamahakogon, ug pagbuhat sa mga butang nga dili nimo gustong buhaton. Sa pagkatinuod, usahay tugotan pa gani sa Dios nga morag dili makapahimuot ang mga buhat sa gugma isip paagi sa pagpul-ong sa imong mga motibo ug paghimo niini nga mas putli, nga mas gibase sa pagtuo kay sa emosyon. Apan maayo kini.
Pamalandongi karon kining balaang hulagway nga gihatag ni Jesus. Usa kini ka leksiyon gikan sa kinaiyahan nga nagpadayag sa labaw sa kinaiyahan nga kinabuhi sa grasya nga naglihok. Ayaw pagpugong tungod sa pagpul-ong nga buot buhaton sa Dios. Dawata ang pag-antos uban sa gugma, tubaga ang inhustisya pinaagi sa pagpasaylo, ipakita ang kaluoy bisan kon dili nimo kini gustong buhaton, ug paningkamoti ang pag-alagad nga walay pagkamahakogon niadtong daw dili takos niini. Ang pagbuhat niini mopul-ong kanimo aron ang Dios makatukod sa Iyang Gingharian sa mahimayaong mga paagi pinaagi kanimo.
Jesus, labing mahimayaong Punoan sa Ubas, Ikaw ug Ikaw lamang ang tinubdan sa tanang sustansiya sa kinabuhi. Gikan Kanimo nagagikan ang tanang maayong butang. Tabangi ako nga makabaton og lig-ong pagtuo Kanimo ug sa tanan Nimong gipadayag, aron kining pagtuo moturok ug makahatag og dagayang maayong bunga alang sa mahimayaong pagtukod sa Imong Gingharian. Jesus, ako misalig Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pag-ampo sa Panahon sa Pasko sa Pagkabanhaw
Mga Pamalandong sa Balaang Kasulatan alang sa Panahon sa Pasko sa Pagkabanhaw
Mga Santos sa Adlaw –
San Pedro Chanel, Pari ug Martir
San Luis Grignion de Montfort, Pari
Dili saulogon isip liturhikal nga handumanan karong tuiga kay natunong kini sa Domingo
Mga Kapilian sa mga Basahon sa Misa
Gipiling hulagway sa ibabaw: Ang Kataposang Panihapon (mosaiko) Ni Howgill, pinaagi sa Adobe
