Hulyo 5, 2024
Biyernes sa Ikanapulog-tulong Semana sa Ordinaryong Panahon
Mga Pagbasa alang Karong Adlawa
San Antonio Zaccaria, Pari—Opsiyonal nga Handumanan
Santa Isabel sa Portugal—Opsiyonal nga Handumanan
(Gisaulog sa Hulyo 4 gawas sa USA)
Paminaw sa Iningles
“Ang mga himsog wala magkinahanglan og mananambal, apan ang mga masakiton nagkinahanglan. Lakaw ug sabta ang kahulogan sa mga pulong, Kalooy ang Akong gitinguha, dili halad. Wala Ako moanhi aron tawgon ang mga matarong kondili ang mga makasasala.” Mateo 9:12–13
Ihulagway ba nimo ang imong kaugalingon nga “himsog” o “masakiton?” Kauban ka ba sa mga “matarong” o sa mga “makasasala?” Pag-amping sa imong pagtubag niini nga pangutana. Siyempre, ang garbo nga kauban sa atong tawhanong kinaiya nga nahulog sa sala kasagarang motintal kanato sa pag-angkon nga kita “himsog” ug “matarong.” Apan ang pagpaubos mopadayag sa kamatuoran nga kita kauban sa mga “masakiton” ug mga “makasasala.”
Kini nga pahayag ni Jesus maoy tubag sa mga Pariseo nga nakamatikod nga si Jesus nakigsalo sa balay ni Mateo, ang maniningil og buhis, nga bag-o pa Niyang gitawag sa pagsunod Kaniya. Tinuod gayod nga gibiyaan ni Mateo ang tanan ug misunod kang Jesus, ug dayon nag-andam siyag panihapon alang kang Jesus sa iyang balay. Nianang panihapona, adunay “daghang maniningil og buhis ug mga makasasala” nga miabot ug nakigsalo kang Jesus ug sa Iyang mga tinun-an, nga maoy hinungdan nga gibiaybiay silang tanan sa mga Pariseo.
Importante kaayo nga atong paminawon ang tubag ni Jesus. Sa Iyang pagpahayag nga mianhi Siya dili alang sa mga himsog ug matarong kondili alang sa mga masakiton ug makasasala, gisultihan kita Niya og duha ka importanteng butang. Una, gipahibalo kita niini nga kitang tanan masakiton sa espiritu ug makasasala. Ikaduha, gipahibalo kita niini nga kon dili kita mapaubsanong makaangkon niini, ug tungod sa atong garbo moangkon hinuon nga kita himsog ug matarong, nan sa pagkatinuod gisalikway nato si Jesus, ang Balaang Mananambal, gikan sa atong kinabuhi. Sa pagkatinuod, sama ra kitag nag-ingon, “Ginoo, wala ako magkinahanglan Kanimo.”
Makatabang usab ang pagmatngon nga si Jesus wala maulaw nga makit-an uban sa mga makasasala. Wala gayod Siya magpanuko ug, gani, tin-aw Niyang gipahayag nga sila ang hinungdan sa Iyang pag-anhi. Tungod niini, dili kita angay mahadlok o maulaw sa pag-angkon nga kita mga makasasala nga masakiton sa espiritu ug nagkinahanglan sa atong Ginoo. Ang paglimod niana nga kamatuoran mao ang paglimod sa tinuod nga kahimtang ug sa mismong tinubdan sa padayon nga pag-ayo nga atong gikinahanglan gayod sa kinabuhi. Kini usa ka paglimod nga kita nagkinahanglan kang Cristo Jesus Mismo.
Nagkinahanglan ka ba sa atong Ginoo? Nagkinahanglan ka ba og paghinlo sa imong sulod, pag-ayo, ug kapasayloan matag adlaw? Kon lisod alang kanimo ang pagtubag og kinasingkasing nga “Oo” niana nga pangutana, tingali mas nakigbisog ka sa garbo sa mga Pariseo kay sa imong nahibaloan. Bisan unsa pa ka balaan ang imong pagkahimong tawo, bisan unsa pa kalalom ang imong pag-ampo ug bisan unsa pa ka dako ang imong gugma sa isigkatawo, kanunay ka gihapong magkinahanglan sa pag-ayo ug kapasayloan sa Balaang Mananambal matag adlaw.
Pamalandongi karong adlawa ang imong panginahanglan sa kapasayloan sa imong kinabuhi karon. Unsang sala ang labing lisod nimong buntogon? Makapainteres nga kon mas motubo ang usa ka tawo sa pagkabalaan, mas tin-aw niyang makita ang iyang adlaw-adlaw nga mga sala ug ang iyang panginahanglan sa kapasayloan ug pag-ayo. Kon naglisod ka niini, paggahin og panahon sa pagsusi sa imong konsensiya. Pangitag mga paagi aron mahimo kini nga mas bug-os ug matinud-anon. Kon buhaton nimo kini, makasiguro ka nga ang atong Ginoo, ang Balaang Mananambal, matinguha gayod sa pagpakigsalo kanimo karong adlawa ug sa kanunay.
Akong mapasayloong Ginoo, Ikaw ang Diyosnong Mananambal nga mianhi aron mopasaylo ug moayo sa tanan namong mga balatian. Kuhaa ang akong garbo ug pagpakamatarong sa kaugalingon aron mapuno ako sa pagpaubos ug tin-aw nga makita ang sala sa akong kinabuhi. Sa akong pagkakita sa akong sala, tabangi ako sa pagdangop Kanimo ug sa pagsalig sa Imong madagayaong kalooy. Mianhi Ka alang sa mga makasasala, minahal kong Ginoo, ug usa ako niadtong mga makasasala nga nagkinahanglan Kanimo. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos sa Adlaw –
San Antonio Zaccaria, Pari—Opsiyonal nga Handumanan
Santa Isabel sa Portugal—Opsiyonal nga Handumanan
(Gisaulog sa Hulyo 4 gawas sa USA)
Mga Kapilian sa mga Basahon sa Misa
_-_James_Tissot.jpg){kind=link}