Nobyembre 12, 2024
Handumanan ni San Josaphat, Obispo ug Martir
Mga Pagbasa alang Karong Adlawa
Mga Pagbasa alang sa Martes sa Ika-32 nga Semana sa Ordinaryong Panahon
Hulagway gikan sa Flickr
Paminaw sa Iningles
Miingon si Jesus sa mga Apostoles: “Kinsa kaninyo ang moingon sa inyong sulugoon nga bag-o pa lang miabot gikan sa pagdaro o pagbantay sa mga karnero sa uma, ‘Dali, umari ug lingkod sa lamesa?’ Dili ba hinuon moingon man siya kaniya, ‘Pag-andam og akong makaon. Pagsul-ob sa imong apron ug alagari ako samtang mokaon ug moinom ako. Mahimo ka nang mokaon ug moinom kon mahuman na ako?’ Magpasalamat ba siya nianang sulugoona tungod kay gibuhat niini ang gisugo kaniya?” Luke 17:7–9
Sa kadaghanang kultura karon, ang pagbaton og sulugoon nga imong sugoon sa pag-atiman kanimo dili gayod giisip nga maayong kahimtang. Gigamit ni Jesus kining hulagwaya kay dali ra kining masabtan sa mga tawo nga Iyang gisultihan. Gigamit Niya kini aron tudloan sila sa pagpaubos, kay kon masabtan sa hustong paagi ang pananglitan, gipaila Niya ang matag usa kanila isip sulugoon, dili agalon. Ang Dios lamang ang Agalon.
Kon bahin sa atong pag-alagad sa Dios, walay kinutoban ang mga sugo nga ihatag sa Dios. Sa sinugdan, daw mapintas kini paminawon, apan dili, kay ang mga sugo nga gihatag sa Dios kanato nagagikan sa hingpit nga gugma. Gikinahanglan nato ang Iyang mga sugo. Gikinahanglan nato ang kahusay nga Iyang gihatag. Kinahanglan kitang mosunod Kaniya sa hingpit. Kinahanglan kitang maminaw sa tanan Niyang isulti kanato ug tumanon kini sa hingpit. Ang pagtan-aw sa Dios isip atong Agalon ug sa atong kaugalingon isip Iyang mga sulugoon daw mapintas lamang kon dili nato masabtan kon unsang matanga sa Agalon Siya.
Hinumdomi ang matahom nga mga pulong sa atong Mahal nga Inahan sa dihang gihatag kaniya ang sugo pinaagi kang Arkanghel Gabriel. Miingon kaniya ang anghel, “Ikaw manamkon sa imong sabakan ug manganak og usa ka lalaki, ug nganlan mo siya og Jesus.” Dili kini pangutana nga gisukna kaniya; usa kini ka sugo sa gugma. Wala magduhaduha si Maria ug wala siya mibalibad. Miingon siya, “Ania ako, ang sulugoong babaye sa Ginoo. Matuman unta kanako sumala sa imong pulong.”
Sa kataposan sa Ebanghelyo karon, mipadayon si Jesus sa pag-ingon, “Kon nabuhat na ninyo ang tanan nga gisugo kaninyo, ingna, ‘Mga sulugoon kami nga walay kapuslanan; gibuhat lamang namo ang among katungdanan.’” Sa daghang paagi, mao gayod kini ang gibuhat sa atong Mahal nga Inahan. Usa siya ka sulugoon nga mituman sa hingpit nga mga sugo sa Dios, ug nahibalo siya nga tungod sa iyang gugma sa Dios, katungdanan niya ang pagsunod sa Iyang kabubut-on.
Kon maghunahuna ka bahin sa imong pag-alagad sa kabubut-on sa Dios, nagtuo ka ba nga daw naghatag ka og pabor sa Dios? Giisip mo ba ang pagsunod sa mga sugo sa Dios nga usa ka buhat sa pagkamanggihatagon sa imong bahin, ug ang imong pagkooperar niining mga sugo labaw pa sa imong kinaiyanhong mga katungdanan? Hinaot nga dili. Hinaot nga nasabtan nimo nga ikaw, sama sa atong Mahal nga Inahan, usa ka sulugoon sa bugtong tinuod nga Agalon sa tanan. Hinaot usab nga makita nimo ang mga sugo sa Dios isip giya padulong sa usa ka kinabuhing hingpit nga natagbaw. Kon masabtan nato kon Kinsa ang Agalon, dili gayod kita magduhaduha sa pagkahimong sulugoon, o bisan gani ulipon. Dili kita magduhaduha sa gawasnong pagtugyan sa atong kaugalingon ngadto sa Iyang kabubut-on uban sa hingpit ug dili matarog nga pagkamasinugtanon. Ang Dios lamang ang nahibalo kon unsay labing maayo alang kanato, ug kinahanglan natong itugyan Kaniya ang hingpit nga pagdumala sa atong kinabuhi.
Pamalandongi karon ang hulagway sa usa ka agalon ug usa ka ulipon. Samtang nagbuhat ka niini, paningkamoti nga biyaan ang tanan nimong daan nang pagtan-aw niini nga naglakip sa kabangis, kapintas, pagdominar ug pagkontrol. Hinuon, paningkamoti nga makita ang hulagway sa usa ka balaang Agalon Kansang bugtong kabalaka mao ang kaayohan sa sulugoon. Paningkamoti nga makita ang usa ka Agalon nga hingpit nga nahigugma sa sulugoon. Pamalandongi ang imong kaugalingong panginahanglan sa ingon nga Agalon sa imong kinabuhi. Pag-ampo nga makahimo ka sa pagtugyan sa hingpit nga pagdumala ngadto sa Dios sa tanang butang, aron Iyang magiyahan ang imong kinabuhi padulong sa mahimayaong mga butang nga Iyang giandam alang kanimo.
Ginoo ug Agalon ko, gisugo Mo ako ug ang tanan Mong alagad nga tumanon ang Imong mga sugo sa hingpit nga gugma. Ang Imong kabubut-on lamang mao ang labing maayo alang sa among kinabuhi, ug ang Imong mga sugo naghatag og katagbawan ug katuyoan sa among kinabuhi. Hinaot nga, uban sa Imong Bulahang Inahan, kanunay kong tumanon ang Imong kabubut-on sa tanang butang, kay ako Imong alagad, minahal kong Ginoo. Hinaot nga malipayon kong buhaton ang akong katungdanan. Jesus, nagsalig ako Kanimo.
Santos sa Adlaw – San Josaphat, Obispo ug Martir
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Kapilian sa mga Basahon sa Misa
