Nobyembre 19, 2024
Martes sa Ika-33 nga Semana sa Ordinaryong Panahon
Mga Pagbasa Karong Adlawa
Randers Museum of Art, Publikong dominyo, pinaagi sa Wikimedia Commons
Bidyo Paminaw sa Iningles
Niadtong panahona, miabot si Jesus sa Jerico ug buot Niyang moagi sa lungsod. Didto may usa ka tawo nga ginganlag Zaqueo, usa ka pangulo sa mga maniningil og buhis ug adunahan usab. Nagtinguha siya nga makakita kon kinsa si Jesus; apan dili niya Siya makita tungod sa panon sa katawhan, kay mubo man siya. Busa midagan siya sa unahan ug mikatkat sa usa ka kahoy nga sikomoro aron makita si Jesus, nga hapit nang moagi didto. Lucas 19:1–3
Sa makausa pa, ang atong Ginoo miduol sa usa ka tawo nga midangop Kaniya nga mapaubsanon ug nanginahanglan. Si Zaqueo usa ka adunahang tawo kon materyal nga mga butang ang hisgotan. Apan sa iyang kinasuloran, kabos siya ug nanginahanglan. Ug kining espirituwal nga kakabos nga iyang nasinati mao ang nagtukmod kaniya sa pagpangita kang Jesus uban sa dakong determinasyon.
Tingali wala gayod damha ni Zaqueo niadtong adlawa nga si Jesus motanyag nga moadto sa iyang balay. Klaro nga misaka siya sa kahoy aron masud-ong si Jesus tungod kay dako ang iyang tinguha nga mailhan ang atong Ginoo. Sanglit adunahan siya sa materyal nga mga butang, klaro nga ang komportableng pagpuyo lamang dili na igo aron matagbaw siya sa kinabuhi. Adunay kulang, ug dili niya ikalimod nga nasayod siyang anaa kang Jesus ang tubag. Busa gibuhat ni Zaqueo ang tingali giisip sa uban nga talagsaon. Misaka siya sa kahoy aron makita si Jesus.
Nganong mihunong man si Jesus, mihangad kang Zaqueo, ug mipakanaog kaniya, nga nag-ingon nga mopabilin Siya sa balay ni Zaqueo? Tungod kay nabati ni Jesus ang panginahanglan sa sulod sa kasingkasing ni Zaqueo. Ang mga kasingkasing nga kabos, nanginahanglan, ug bukas makadani gayod kang Jesus. Dili gayod Niya palabyon ang higayon sa pagduol sa mapaubsanong mga kalag nga sama niini.
Mitubag dayon si Zaqueo sa atong Ginoo pinaagi sa pagsaad nga iyang tul-iron ang mga sayop nga iyang nahimo kaniadto. Misaad siya nga ipanghatag ang katunga sa iyang kabtangan ug bayran sa upat ka pilo ang bisan kinsa nga iyang gikikilan. Nagpadayag kini sa pagkamatinud-anon sa kasingkasing ni Zaqueo.
Sa paglabay ni Jesus duol kanimo, unsa man ang Iyang mabati? Madani ba Siya sa imong kasingkasing? Madani ba Siya kanimo tungod sa pagkamapaubsanon ug pagbati sa panginahanglan diha sa imong kinasuloran? Sayon ra alang kanato nga magkinabuhi nga daw walay bisan unsang kulang o suliran sa atong kinabuhi. Mahimo kitang magpakaaron-ingnon nga lig-on ug malampuson. Apan panagsa ra moduol si Jesus sa kalag nga nagpakita nga gamay ra ang iyang panginahanglan. Kon buot natong madani si Jesus nga moduol kanato, kinahanglan natong ilhon ang kakabos sa atong kinasuloran, bisan pa kon adunahan kita sa materyal nga mga butang ug malampuson sa kalibotanong sukdanan. Ang matag usa kanato kinahanglan magpaubos sama kang Zaqueo pinaagi sa pag-ila nga si Jesus lamang ang tubag sa kinabuhi.
Pamalandongi karon ang kamatuoran nga ikaw ug ikaw lamang ang adunay katakos sa pagdani kang Jesus nga moduol kanimo. Mahimo nimo kini pinaagi sa pagsusi sa imong panginahanglan Kaniya. Ayaw kini itago. Saka sa mahulagwayong kahoy diin makapangita ka kang Jesus ug, labaw sa tanan, diin makita ni Jesus ang imong dayag nga tinguha alang Kaniya. Samtang imong ipahayag ang imong panginahanglan Kaniya, hibaloi nga ang Iyang dili matarog nga gugma ug kalooy magtukmod Kaniya sa pagduol kanimo ug pagpabilin uban kanimo sa puloy-anan sa imong kalag. Ug sa dihang buhaton Niya kini, pag-andam ug pagbaton og kaandam sa pagbiya sa tanan nga nakababag kaniadto sa imong pagtagbo kang Kristo.
Ginoo kong matinagdanon, kanunay Kang nahibalo sa matag kasingkasing nga nangandoy Kanimo. Dili gayod Nimo ibaliwala ang mga nagtinguha nga maanaa Ka sa ilang kinabuhi. Palihog tabangi ako nga mailhan ang akong kaugalingong mga panginahanglan ug mga pakigbisog sa kinasuloran, ug nga makita Ka isip bugtong tinubdan sa katagbawan sa kinabuhi. Itugyan ko ang akong kaugalingon sa pagpangita Kanimo, minahal kong Ginoo. Ug sa Imong pagduol kanako, mosaad ako nga biyaan ang tanang nakapahilayo kanako gikan Kanimo kaniadto. Jesus, ako misalig Kanimo.
Nobena kang Kristo nga Hari
Sa tradisyon, siyam ka adlaw sa dili pa ang Solemnidad ni Kristo nga Hari
Nobena nga iampo matag adlaw sa Nobyembre 15–23, 2024
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
