ಗುರುವಾರ, ಮಾರ್ಚ್ 25, 2021
ದೇವರು ಗಬ್ರಿಯೇಲ್ ದೂತನನ್ನು ಗಲಿಲೇಯದ ನಜರೇತ್ ಎಂಬ ಊರಿನಲ್ಲಿದ್ದ ಒಬ್ಬ ಕನ್ಯೆಯ ಬಳಿಗೆ ಕಳುಹಿಸಿದರು. ಆಕೆಗೆ ದಾವೀದನ ವಂಶದ ಯೋಸೇಫನೆಂಬ ಪುರುಷನೊಡನೆ ನಿಶ್ಚಿತಾರ್ಥವಾಗಿತ್ತು. ಆ ಕನ್ಯೆಯ ಹೆಸರು ಮರಿಯಳು. ದೂತನು ಆಕೆಯ ಬಳಿಗೆ ಬಂದು, “ಅನುಗ್ರಹಪೂರ್ಣೆಯೇ, ನಿಮಗೆ ವಂದನೆ! ಪ್ರಭು ನಿಮ್ಮೊಂದಿಗಿದ್ದಾರೆ” ಎಂದನು. ಲೂಕ 1:26–28
ಪರಮಪವಿತ್ರ ತ್ರಿತ್ವದ ಸನ್ನಿಧಿಯಲ್ಲಿ ನಿಲ್ಲುವ ಮಹಿಮಾಮಯ ಪ್ರಧಾನದೂತ ಗಬ್ರಿಯೇಲರು ನಿಮ್ಮ ಬಳಿಗೆ ಬಂದು, ನೀವು “ಅನುಗ್ರಹಪೂರ್ಣರು” ಮತ್ತು “ಕರ್ತನು ನಿಮ್ಮೊಂದಿಗಿದ್ದಾರೆ” ಎಂದು ಸಾರಿದರೆ ಹೇಗಿರುತ್ತದೆಂದು ಊಹಿಸಿಕೊಳ್ಳಿ. ಅದು ಎಂಥ ವರ್ಣಿಸಲಾಗದ, ವಿಸ್ಮಯಭರಿತ ಅನುಭವವಾಗಿರುತ್ತದೆ! ಆದರೆ ಹದಿಹರೆಯದ ಈ ಬಾಲಕಿಯಾದ ಪೂಜ್ಯ ಕನ್ಯಾಮರಿಯಳಿಗೆ ನಿಜವಾಗಿಯೂ ಸಂಭವಿಸಿದ್ದು ಇದೇ.
ದೇವರು ಆಕೆಯ ಪವಿತ್ರ ಗರ್ಭದಲ್ಲಿ ಮಾನವ ಶರೀರವನ್ನು ಧರಿಸಿದ ಕ್ಷಣವನ್ನು ಗುರುತಿಸುವ ಈ ಅದ್ಭುತ ಘಟನೆಯನ್ನು ನಾವು ಇಂದು ಆಚರಿಸುತ್ತೇವೆ. ಇಂದಿನಿಂದ ಕ್ರಿಸ್ಮಸ್‌ಗೆ ಒಂಬತ್ತು ತಿಂಗಳುಗಳಿವೆ ಎಂಬುದನ್ನು ಗಮನಿಸಿ. ಬರಲಿರುವ ಈ ಒಂಬತ್ತು ತಿಂಗಳುಗಳಲ್ಲಿ ಮರಿಯಳೊಂದಿಗೆ ನಡೆದು, ಆಕೆಯ ದೈವಿಕ ಪುತ್ರನ ಜನನದ ಆನಂದದಲ್ಲಿ ನಾವೂ ಪಾಲ್ಗೊಳ್ಳುವಂತೆ ಆಹ್ವಾನಿಸಲು ಧರ್ಮಸಭೆ ಇಂದು ಈ ಮಹೋತ್ಸವವನ್ನು ನಮಗೆ ನೀಡುತ್ತದೆ.
ಈ ಮಹಿಮಾಮಯ ಮಹೋತ್ಸವದ ಕುರಿತು ಬಹಳಷ್ಟು ಹೇಳಬಹುದು. ಮಾತೆ ಮರಿಯಳನ್ನೂ ಆಕೆಯ ಅಮಲೋದ್ಭವವನ್ನೂ ನಾವು ಧ್ಯಾನಿಸಬಹುದು. ಪ್ರಧಾನದೂತರು ನುಡಿದ ಮಾತುಗಳನ್ನೇ ಧ್ಯಾನಿಸಬಹುದು. ಆಕೆಯ ಗರ್ಭಧಾರಣೆಯ ಸುತ್ತಲಿನ ರಹಸ್ಯವನ್ನೂ ಈ ಕೊಡುಗೆಯನ್ನು ಸಾಕಾರಗೊಳಿಸಲು ದೇವರು ಆರಿಸಿಕೊಂಡ ಮಾರ್ಗವನ್ನೂ ಧ್ಯಾನಿಸಬಹುದು. ಇನ್ನೂ ಎಷ್ಟೋ ವಿಷಯಗಳನ್ನು ನಾವು ಧ್ಯಾನಿಸಬಹುದು. ಈ ಎಲ್ಲ ಅಂಶಗಳೂ ಆಳವಾದ ಧ್ಯಾನಕ್ಕೂ ಪ್ರಾರ್ಥನೆಗೂ ಯೋಗ್ಯವಾಗಿದ್ದರೂ, ದೇವದೂತರ ಸಂದೇಶಕ್ಕೆ ಈ ಯುವತಿ ನೀಡಿದ ಪ್ರತಿಕ್ರಿಯೆಯ ಮೇಲೆ ಗಮನಹರಿಸೋಣ.
ಮೊದಲಿಗೆ, ಪ್ರಧಾನದೂತರು ನುಡಿದ ಈ ಮಾತುಗಳಿಂದ ಮರಿಯಳು “ಬಹಳವಾಗಿ ಕಳವಳಗೊಂಡಳು” ಮತ್ತು ಅವುಗಳನ್ನು “ಮನನಮಾಡಿದಳು” ಎಂದು ನಾವು ಓದುತ್ತೇವೆ. ಪ್ರಧಾನದೂತರು ಪ್ರಕಟಿಸುತ್ತಿದ್ದ ವಿಷಯದ ಸಂಪೂರ್ಣ ಅರಿವು ಮರಿಯಳಿಗೆ ಇರಲಿಲ್ಲ ಎಂಬುದನ್ನು ಆಕೆಯ ಕಳವಳವು ತೋರಿಸುತ್ತದೆ. ಆದರೆ ಆಕೆ ಆ ಮಾತುಗಳನ್ನು ಮನನಮಾಡಿದಳು ಎಂಬುದು, ಇನ್ನಷ್ಟು ಪೂರ್ಣವಾಗಿ ಅರ್ಥಮಾಡಿಕೊಳ್ಳಲು ಆಕೆ ಮುಕ್ತಳಾಗಿದ್ದಳು ಎಂಬುದನ್ನೂ ತೋರಿಸುತ್ತದೆ. ಅನಂತರ, “ನನಗೆ ಪುರುಷನೊಂದಿಗೆ ಸಂಬಂಧವಿಲ್ಲವಲ್ಲ, ಇದು ಹೇಗೆ ಸಾಧ್ಯ?” ಎಂದು ಕೇಳುವ ಮೂಲಕ ಆಕೆ ಇನ್ನಷ್ಟು ಆಳವಾದ ಅರಿವಿನ ವರವನ್ನು ಕೋರುತ್ತಾಳೆ. ಈ ಪ್ರತಿಕ್ರಿಯೆಯಲ್ಲಿ ಮೊದಲು ವಿಶ್ವಾಸದಿಂದ ಒಪ್ಪಿಕೊಳ್ಳುವ ಸಮ್ಮತಿಯಿದೆ; ಅದರ ಬಳಿಕ ಈ ಪ್ರಕಟನೆಯನ್ನು ಇನ್ನಷ್ಟು ಆಳವಾಗಿ ಅರ್ಥಮಾಡಿಕೊಳ್ಳುವ ಕೋರಿಕೆಯಿದೆ. ನಾವು ಸಂಪೂರ್ಣವಾಗಿ ಅರ್ಥಮಾಡಿಕೊಳ್ಳದಿರುವುದನ್ನು ಒಪ್ಪಿಕೊಳ್ಳುವ ಸಾಮರ್ಥ್ಯವೇ ವಿಶ್ವಾಸ. ಆದರೆ ನಿಜವಾದ ವಿಶ್ವಾಸವು ಸದಾ ಇನ್ನಷ್ಟು ಆಳವಾದ ತಿಳಿವಳಿಕೆಯನ್ನು ಅರಸುತ್ತದೆ—ಮರಿಯಳು ಮಾಡಿದ್ದೂ ಇದನ್ನೇ.
ಪ್ರಧಾನದೂತರಿಂದ ಇನ್ನಷ್ಟು ಪ್ರಕಟನೆಯನ್ನು ಪಡೆದ ಬಳಿಕ, ಮರಿಯಳು ತನಗೆ ಪ್ರಕಟಿಸಲಾದುದನ್ನು ಸಂಪೂರ್ಣವಾಗಿ ಸ್ವೀಕರಿಸುತ್ತಾಳೆ. ಆ ಸಮಯದಲ್ಲಿ ತಾನು ತಿಳಿಯಬೇಕಾಗಿದ್ದುದೆಲ್ಲವೂ ತನಗೆ ಹೇಳಲಾಗಿದೆ ಎಂದು ಆಕೆ ಭರವಸೆಯಿಡುತ್ತಾಳೆ. ಅನಂತರ ಆಕೆ ನೀಡಿದ ಸಮ್ಮತಿಯೇ ಆಕೆಯ “ಆಗಲಿ” ಎಂಬ ನುಡಿಯಾಗಿ ಪ್ರಸಿದ್ಧವಾಗಿದೆ. ಆಕೆ ಹೇಳುತ್ತಾಳೆ: “ಇಗೋ, ನಾನು ಕರ್ತನ ದಾಸಿ. ನಿಮ್ಮ ಮಾತಿನಂತೆ ನನಗೆ ಆಗಲಿ.” ಮರಿಯಳ ಈ ಆಗಲಿ ಎಂಬ ನುಡಿಯು ದೇವರ ಚಿತ್ತಕ್ಕೆ ಆಕೆ ತನ್ನನ್ನು ಒಪ್ಪಿಸಿಕೊಡುವ ಪರಿಪೂರ್ಣ ಪ್ರಾರ್ಥನೆಯಾಗಿದೆ. ದೇವರ ಚಿತ್ತಕ್ಕೆ ನಾವೆಲ್ಲರೂ ಹೇಗೆ ಪ್ರತಿಕ್ರಿಯಿಸಬೇಕೆಂಬುದಕ್ಕೂ ಇದು ಪರಿಪೂರ್ಣ ಮಾದರಿಯಾಗಿದೆ. ನಾವು ಆತನ ಚಿತ್ತದ ನಿಜವಾದ ಸೇವಕರೆಂದು ನಮ್ಮನ್ನು ಕಾಣಬೇಕು. ನಮ್ಮ ಚಿತ್ತಗಳನ್ನು ಆತನ ಚಿತ್ತದೊಂದಿಗೆ ಸಂಪೂರ್ಣವಾಗಿ ಒಂದಾಗಿಸಿ, ದೇವರು ನಮ್ಮಿಂದ ಕೇಳುವ ಎಲ್ಲವನ್ನೂ ನಾವು ಪೂರ್ಣವಾಗಿ ಸ್ವೀಕರಿಸಬೇಕು.
ನಮ್ಮ ಪೂಜ್ಯ ಮಾತೆಯ ಈ ಮಾತುಗಳನ್ನು ಇಂದು ಧ್ಯಾನಿಸಿ: “ಇಗೋ, ನಾನು ಕರ್ತನ ದಾಸಿ. ನಿಮ್ಮ ಮಾತಿನಂತೆ ನನಗೆ ಆಗಲಿ.” ಇದನ್ನು ನಿಮ್ಮ ಪ್ರಾರ್ಥನೆಯಾಗಿಯೂ ಮಾಡಿಕೊಳ್ಳಲು ದೇವರು ನಿಮ್ಮನ್ನು ಹೇಗೆ ಕೇಳುತ್ತಿದ್ದಾರೆ? ತಮ್ಮ ಪರಮಪವಿತ್ರ ಚಿತ್ತವನ್ನು ನೆರವೇರಿಸುವ ಸೇವೆಗೆ ದೇವರು ನಿಮ್ಮನ್ನು ಹೇಗೆ ಕರೆಯುತ್ತಿದ್ದಾರೆ? ದೇವರು ನಿಮ್ಮಿಂದ ಕೇಳುವ ಪ್ರತಿಯೊಂದಕ್ಕೂ, ಎಲ್ಲದಕ್ಕೂ ಸಂಪೂರ್ಣ ಸಮ್ಮತಿ ನೀಡಲು ನೀವು ಸಿದ್ಧರಿದ್ದೀರಾ? ನಮ್ಮ ಪೂಜ್ಯ ಮಾತೆಯ ಈ ಆಗಲಿ ಎಂಬ ನುಡಿಯನ್ನು ಪ್ರಾರ್ಥನಾಪೂರ್ವಕವಾಗಿ ಧ್ಯಾನಿಸುವಾಗ, ಆಕೆಯ ಪ್ರತಿಕ್ರಿಯೆಯೊಂದಿಗೆ ನಿಮ್ಮ ಪ್ರತಿಕ್ರಿಯೆಯನ್ನೂ ಒಂದಾಗಿಸಲು ಪ್ರಯತ್ನಿಸಿ. ಆಗ ನೀವೂ ಪರಾತ್ಪರ ದೇವರ ಸೇವಕರಾಗುವಿರಿ.
ಸ್ವರ್ಗದಲ್ಲಿರುವ ಪಿತನೇ, ಪೂಜ್ಯ ಕನ್ಯಾಮರಿಯಳ ಗರ್ಭದಲ್ಲಿ ಮಾನವಾವತಾರ ತಾಳಲು ನೀವು ನಿಮ್ಮ ಪುತ್ರನನ್ನು ಕಳುಹಿಸಿದಿರಿ. ನಿಮ್ಮ ಮಹಿಮಾಮಯ ಪ್ರಧಾನದೂತ ಗಬ್ರಿಯೇಲರು ಈ ಶುಭವಾರ್ತೆಯನ್ನು ತಂದರು. ನಿಮ್ಮ ಪುತ್ರನನ್ನು ಲೋಕಕ್ಕೆ ತರುವ ನಿಮ್ಮ ದೈವಿಕ ಕಾರ್ಯದಲ್ಲಿ ಪಾಲ್ಗೊಳ್ಳಲು ನೀವು ನನ್ನನ್ನು ಆಹ್ವಾನಿಸುವಾಗ, ನೀವು ನನಗೆ ಕಳುಹಿಸುವ ಸಂದೇಶಗಳಿಗೆ ನಾನು ಸದಾ ಗಮನಕೊಡುವಂತಾಗಲಿ. ಪ್ರಿಯ ಕರ್ತನೇ, ನಿಮ್ಮ ಪರಮಪವಿತ್ರ ಚಿತ್ತವನ್ನು ನೆರವೇರಿಸುವ ಸೇವೆಗಾಗಿ ಇಂದು ನಾನು “ಹೌದು” ಎನ್ನುತ್ತೇನೆ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.
ಶಿಲುಬೆಯ ಬುಡದಲ್ಲಿ 40 ದಿನಗಳು – ಮೂವತ್ತಾರನೇ ಧ್ಯಾನ – “ಪಿತನೇ, ನನ್ನ ಆತ್ಮವನ್ನು ನಿನ್ನ ಕೈಗಳಿಗೆ ಒಪ್ಪಿಸುತ್ತೇನೆ”
ತಪಸ್ಸುಕಾಲಕ್ಕಾಗಿ ಪವಿತ್ರ ಗ್ರಂಥದ ಧ್ಯಾನಗಳು
ಹೆಚ್ಚಿನ ಓದು – ಕರ್ತನ ಮಂಗಳವಾರ್ತೆ
ಮೇಲೆ ನೀಡಿರುವ ಮುಖ್ಯ ಚಿತ್ರ: ಮಂಗಳವಾರ್ತೆ ರಚನೆ: ಬೆನ್ವೆನುತೊ ತೀಸಿ
