ಜುಲೈ 13, 2021
ಸಾಮಾನ್ಯ ಕಾಲದ ಹದಿನೈದನೆಯ ವಾರದ ಮಂಗಳವಾರ
ಇಂದಿನ ವಾಚನಗಳು
“ಕೊರಜಿನ್, ನಿನಗೆ ಧಿಕ್ಕಾರ! ಬೆತ್ಸಾಯಿದ, ನಿನಗೆ ಧಿಕ್ಕಾರ! ನಿಮ್ಮ ಮಧ್ಯೆ ನಡೆದ ಮಹತ್ಕಾರ್ಯಗಳು ತೂರ್ ಮತ್ತು ಸಿದೋನ್ ಪಟ್ಟಣಗಳಲ್ಲಿ ನಡೆದಿದ್ದರೆ, ಅಲ್ಲಿನ ಜನರು ಬಹಳ ಹಿಂದೆಯೇ ಗೋಣಿತಟ್ಟು ಉಟ್ಟು, ಬೂದಿ ಹಚ್ಚಿಕೊಂಡು ಪಶ್ಚಾತ್ತಾಪಪಡುತ್ತಿದ್ದರು. ಆದರೆ ನಾನು ನಿಮಗೆ ಹೇಳುತ್ತೇನೆ: ನ್ಯಾಯತೀರ್ಪಿನ ದಿನದಂದು ನಿಮಗಿಂತ ತೂರ್ ಮತ್ತು ಸಿದೋನ್ ಪಟ್ಟಣಗಳ ಗತಿಯೇ ಹೆಚ್ಚು ಸಹನೀಯವಾಗಿರುವುದು.” ಮತ್ತಾಯ 11:21–22
ಕೊರಜಿನ್ ಮತ್ತು ಬೆತ್ಸಾಯಿದ ಯೆಹೂದ್ಯರ ಪಟ್ಟಣಗಳಾಗಿದ್ದವು. ಬೋಧಿಸಲು ಮತ್ತು ಅನೇಕ “ಮಹತ್ಕಾರ್ಯಗಳನ್ನು” ಮಾಡಲು ಯೇಸು ಆಗಾಗ್ಗೆ ಅಲ್ಲಿಗೆ ಭೇಟಿ ನೀಡುತ್ತಿದ್ದರು. ಅವು ಅವರು ವಾಸಿಸುತ್ತಿದ್ದ ಕಫೆರ್ನೌಮ್ ಪಟ್ಟಣದ ಸ್ವಲ್ಪ ಉತ್ತರಕ್ಕಿದ್ದವು. ತೂರ್ ಮತ್ತು ಸಿದೋನ್ ಅನ್ಯದೈವಾರಾಧಕರ ಕರಾವಳಿ ಪಟ್ಟಣಗಳಾಗಿದ್ದು, ಕೊರಜಿನ್ ಮತ್ತು ಬೆತ್ಸಾಯಿದಗಳ ಈಶಾನ್ಯಕ್ಕೆ, ಇಂದಿನ ಲೆಬನಾನ್ ದೇಶದಲ್ಲಿದ್ದವು. ಅವು ಅನೈತಿಕ ಜೀವನಕ್ಕೆ ಹೆಸರಾಗಿದ್ದ ಪಟ್ಟಣಗಳಾಗಿದ್ದವು. ಯೇಸು ಆ ಪಟ್ಟಣಗಳಲ್ಲಿ ಹೆಚ್ಚು ಸಮಯ ಕಳೆಯದಿದ್ದರೂ, ಕೆಲವೊಮ್ಮೆ ಅಲ್ಲಿಗೆ ಭೇಟಿ ನೀಡಿದ್ದರು. ಅಲ್ಲಿ ಅವರು ನೀಡಿದ ಮೊದಲ ದಾಖಲಿತ ಭೇಟಿಯಲ್ಲಿ, ತನ್ನ ಮಗಳನ್ನು ಗುಣಪಡಿಸುವಂತೆ ಅವರನ್ನು ಬೇಡಿಕೊಂಡ ಸಿರೊಫೊಯಿನೀಷ್ಯನ್ ಸ್ತ್ರೀಯೊಂದಿಗಿನ ಅವರ ಭೇಟಿಯನ್ನು ನೆನಪಿಸಿಕೊಳ್ಳಿ (ಮತ್ತಾಯ 15:21–28). ಮೇಲೆ ಉಲ್ಲೇಖಿಸಲಾದ ಸುವಾರ್ತೆಯ ಪ್ರಸಂಗವು ಯೇಸು ಆ ಪ್ರಯಾಣವನ್ನು ಕೈಗೊಳ್ಳುವುದಕ್ಕೆ ಮೊದಲು ನಡೆಯಿತು.
ತಾವು ಅಷ್ಟು ಹೆಚ್ಚು ಸಮಯ ಕಳೆದ ಪಟ್ಟಣಗಳ ಬಗ್ಗೆ ಯೇಸು ಏಕೆ ಅಷ್ಟು ಕಠಿಣವಾಗಿ ಮಾತನಾಡಿದರು? ಅವರು ಕೊರಜಿನ್, ಬೆತ್ಸಾಯಿದ ಮತ್ತು ಕಫೆರ್ನೌಮ್ ಪಟ್ಟಣಗಳನ್ನು ಏಕೆ ಗದರಿಸಿದರು? ಇದಕ್ಕೆ ಉತ್ತರ ಕಂಡುಕೊಳ್ಳಲು, ಯೇಸು ತಮ್ಮ ಹೆಚ್ಚಿನ ಸಮಯವನ್ನು “ಇಸ್ರಾಯೇಲ್ ಮನೆತನದ ಕಳೆದುಹೋದ ಕುರಿಗಳಿಗೆ” ಬೋಧಿಸುವುದರಲ್ಲಿ ಕಳೆದರು ಎಂಬುದನ್ನು ನೆನಪಿನಲ್ಲಿಡುವುದು ಮುಖ್ಯ. ಬೇರೆ ಮಾತಿನಲ್ಲಿ ಹೇಳುವುದಾದರೆ, ಅವರ ಸಾರ್ವಜನಿಕ ಸೇವೆಯ ಅವಧಿಯಲ್ಲಿ ಅವರ ಪ್ರಧಾನ ಧ್ಯೇಯವು ಅಬ್ರಹಾಮನ ವಂಶಸ್ಥರೂ, ಮೋಶೆಯ ಧರ್ಮಶಾಸ್ತ್ರ, ಪ್ರವಾದಿಗಳ ಬೋಧನೆಗಳು ಮತ್ತು ಆರಾಧನಾ ವಿಧಿಗಳನ್ನು ವಹಿಸಿಕೊಡಲಾಗಿದ್ದವರೂ ಆದ ಜನರೊಂದಿಗೆ ಸುವಾರ್ತೆಯನ್ನು ಹಂಚಿಕೊಳ್ಳುವುದಾಗಿತ್ತು. ಆ ಕಾರಣದಿಂದ ಯೇಸು ಈ ಜನರಿಗೆ ಪರಿಪೂರ್ಣವಾಗಿ ಬೋಧಿಸಿದ್ದು ಮಾತ್ರವಲ್ಲದೆ, ಒಂದರ ಮೇಲೊಂದು ಅದ್ಭುತಗಳನ್ನೂ ಮಾಡಿದರು. ಅನೇಕರು ಅವರಲ್ಲಿ ವಿಶ್ವಾಸವಿಟ್ಟು ಅವರ ಶಿಷ್ಯರಾದರೂ, ಇನ್ನೂ ಅನೇಕರು ಉದಾಸೀನರಾಗಿದ್ದರು ಅಥವಾ ಅವರಲ್ಲಿ ವಿಶ್ವಾಸವಿಡಲು ಸಂಪೂರ್ಣವಾಗಿ ನಿರಾಕರಿಸಿದರು.
ಇಂದು ಕೊರಜಿನ್, ಬೆತ್ಸಾಯಿದ ಮತ್ತು ಕಫೆರ್ನೌಮ್ ಪಟ್ಟಣಗಳನ್ನು, ವಿಶ್ವಾಸದಲ್ಲಿ ಹುಟ್ಟಿ ಬೆಳೆದು, ತಮ್ಮ ತಂದೆತಾಯಿಗಳಿಂದ ಮತ್ತು ಇತರರಿಂದ ಉತ್ತಮ ತರಬೇತಿ ಪಡೆದ ಕತೋಲಿಕರ ಸಂಕೇತಗಳಾಗಿ ಕಾಣಬಹುದು. ತಮ್ಮ ಮಕ್ಕಳು ವಿಶ್ವಾಸದಿಂದ ದೂರ ಸರಿದಾಗ, ಅನೇಕ ತಂದೆತಾಯಿಗಳು ತಾವು ಏನು ತಪ್ಪು ಮಾಡಿದೆವು ಎಂದು ಯೋಚಿಸುತ್ತಾರೆ. ಆದರೆ ಸತ್ಯವೇನೆಂದರೆ, ಯೇಸುವಿನ ಪರಿಪೂರ್ಣ ಬೋಧನೆ, ಪರಿಪೂರ್ಣ ಪ್ರೀತಿ ಮತ್ತು ಅಲ್ಲಗಳೆಯಲಾಗದ ಅದ್ಭುತಗಳ ಹೊರತಾಗಿಯೂ ಸ್ವತಃ ಅವರನ್ನೇ ಜನರು ತಿರಸ್ಕರಿಸಿದರು. ಇಂದೂ ಅದೇ ಸಂಭವಿಸುತ್ತದೆ. ಸ್ವತಃ ಕ್ರಿಸ್ತನೇ ನಮಗೆ ನೀಡಿದ ಪವಿತ್ರ ವಿಶ್ವಾಸದಲ್ಲಿ ಬೆಳೆಸಲ್ಪಟ್ಟಿದ್ದರೂ, ಆ ವಿಶ್ವಾಸವನ್ನು ತಿರಸ್ಕರಿಸಿ, ಸುವಾರ್ತೆ ಮತ್ತು ಧರ್ಮಸಭೆಯ ಕಡೆಗೆ ಕಣ್ಣುಮುಚ್ಚಿಕೊಳ್ಳುವವರು ಅನೇಕರಿದ್ದಾರೆ.
ಉತ್ತಮವಾಗಿ ಬೆಳೆಸಲ್ಪಡುವ ವಿಷಯದಲ್ಲಿ ಇಷ್ಟೆಲ್ಲವನ್ನು ಪಡೆದಿದ್ದರೂ ದೇವರನ್ನು ತಿರಸ್ಕರಿಸಿರುವವರ ಮನಸ್ಸಿನಲ್ಲಿ, ಆ ಪಟ್ಟಣಗಳಿಗೆ ಯೇಸು ನೀಡಿದ ಗದರಿಕೆ ಇಂದು ಪ್ರತಿಧ್ವನಿಸಬೇಕು. ನಿಶ್ಚಯವಾಗಿಯೂ ಆ ತಿರಸ್ಕಾರವು ಯಾವಾಗಲೂ ನಿರಪೇಕ್ಷವೂ ಸಂಪೂರ್ಣವೂ ಆಗಿರುವುದಿಲ್ಲ. ಹೆಚ್ಚಾಗಿ ಅದು ಹಂತ ಹಂತವಾಗಿ ನಡೆಯುವ ತಿರಸ್ಕಾರವಾಗಿರುತ್ತದೆ. ಮೊದಲು ದಿವ್ಯಬಲಿಗೆ ಹೋಗದೆ ಇರುವ ರೂಪದಲ್ಲಿ ಈ ತಿರಸ್ಕಾರ ಕಾಣಿಸಿಕೊಳ್ಳುತ್ತದೆ. ನಂತರ ನೈತಿಕ ವಿಷಯಗಳಲ್ಲಿ ರಾಜಿ ಮಾಡಿಕೊಳ್ಳುವುದು ಬರುತ್ತದೆ. ಆಮೇಲೆ ವಿಶ್ವಾಸದ ಕೊರತೆ ಉಂಟಾಗುತ್ತದೆ. ಕೊನೆಗೆ ಗೊಂದಲ, ಸಂದೇಹ ಮತ್ತು ವಿಶ್ವಾಸದ ಸಂಪೂರ್ಣ ನಷ್ಟವು ನೆಲೆಯೂರುತ್ತವೆ.
ನಿಮ್ಮ ವಿಶ್ವಾಸದಲ್ಲಿ ಹೆಚ್ಚು ಹೆಚ್ಚು ಉತ್ಸಾಹಹೀನರಾಗುವ ಹಾದಿಯಲ್ಲಿ ನೀವು ನಡೆಯಲು ಆರಂಭಿಸಿದ್ದರೆ, ಯೇಸು ಆ ಪಟ್ಟಣಗಳಿಗೆ ನೀಡಿದ ಗದರಿಕೆಯು ಪ್ರೀತಿಯಿಂದ ನಿಮಗೂ ನೀಡಲ್ಪಟ್ಟಿದೆ ಎಂದು ಅರ್ಥಮಾಡಿಕೊಳ್ಳಬೇಕು. “ಯಾರಿಗೆ ಬಹಳವಾಗಿ ಕೊಡಲಾಗಿದೆಯೋ, ಅವರಿಂದ ಬಹಳವಾಗಿ ಕೇಳಲಾಗುವುದು…” (ಲೂಕ 28:48). ಆದ್ದರಿಂದ, ವಿಶ್ವಾಸದ ಬಗ್ಗೆ ಉತ್ತಮವಾಗಿ ಕಲಿಸಲ್ಪಟ್ಟವರಿಂದ ಬಹಳಷ್ಟು ನಿರೀಕ್ಷಿಸಲಾಗುತ್ತದೆ. ಪ್ರೀತಿಯಿಂದ ದೇವರು ನಮ್ಮಿಂದ ಬಯಸುವುದಕ್ಕೆ ತಕ್ಕಂತೆ ನಾವು ಜೀವಿಸದೆ ಹೋದಾಗ, ನಮಗೆ ಬೇಕಾಗಿರುವುದು ಪವಿತ್ರವಾದ ಗದರಿಕೆಯೇ.
ಯೇಸು ಈ ಪಟ್ಟಣಗಳಿಗೆ ನೀಡುವ ಗದರಿಕೆಯು ನಿಮಗೂ ಅನ್ವಯಿಸುತ್ತದೆಯೇ ಎಂದು ಇಂದು ಚಿಂತಿಸಿ. ವಿಶ್ವಾಸದಲ್ಲಿ ಉತ್ತಮ ತರಬೇತಿ ಪಡೆಯುವ ಆಶೀರ್ವಾದ ನಿಮಗೆ ದೊರೆತಿದೆಯೇ? ಹಾಗಿದ್ದರೆ, ಆ ವಿಶ್ವಾಸವನ್ನು ಪೋಷಿಸಲು ಮತ್ತು ದೇವರ ಮೇಲಿನ ನಿಮ್ಮ ಪ್ರೀತಿಯಲ್ಲಿ ಬೆಳೆಯಲು ನಿಮ್ಮಿಂದ ಸಾಧ್ಯವಿರುವುದನ್ನೆಲ್ಲ ಮಾಡಿದ್ದೀರಾ? ಅಥವಾ ನಿಮ್ಮ ವಿಶ್ವಾಸವು ಮಂಕಾಗಲು, ಉತ್ಸಾಹಹೀನವಾಗಲು ಮತ್ತು ಬಾಡಿ ಸಾಯಲು ಆರಂಭಿಸುವಂತೆ ಬಿಟ್ಟಿದ್ದೀರಾ? ನಿಮಗೆ ಬಹಳಷ್ಟು ನೀಡಲಾಗಿದ್ದರೆ, ನೀವು ವಿಶ್ವಾಸದಲ್ಲಿ ಬೆಳೆಸಲ್ಪಟ್ಟಿದ್ದರೆ ಮತ್ತು ನಿಮ್ಮ ಜೀವನದಲ್ಲಿ ಉತ್ತಮ ಆದರ್ಶಗಳನ್ನು ಕಾಣುವ ಸೌಭಾಗ್ಯ ದೊರೆತಿದ್ದರೆ, ದೇವರು ನಿಮ್ಮಿಂದ ಬಹಳಷ್ಟನ್ನು ನಿರೀಕ್ಷಿಸುತ್ತಾರೆ ಎಂಬುದನ್ನು ತಿಳಿಯಿರಿ. ನಿಮಗೆ ನೀಡಲಾಗಿರುವ ಆ ಉನ್ನತ ಕರೆಗೆ ಓಗೊಡಿ ಮತ್ತು ಪೂರ್ಣ ಹೃದಯದಿಂದ ದೇವರಿಗೆ ಸ್ಪಂದಿಸಿ.
ಉತ್ಕಟ ಪ್ರೀತಿಯ ನನ್ನ ಯೇಸುವೇ, ಇಸ್ರಾಯೇಲ್ ಜನರಿಗೆ ಬೋಧಿಸುವುದರ ಮೂಲಕ ನೀವು ನಿಮ್ಮ ಹೃದಯಾಂತರಾಳವನ್ನೆಲ್ಲ ಧಾರೆಯೆರೆದಿರಿ. ಅನೇಕರು ನಿಮ್ಮನ್ನು ಸ್ವೀಕರಿಸಿದರೂ, ಇನ್ನೂ ಅನೇಕರು ನಿಮ್ಮನ್ನು ತಿರಸ್ಕರಿಸಿದರು. ನನಗೆ ಬೋಧಿಸಲಾಗುವ ನಿಮ್ಮ ಪವಿತ್ರ ವಾಕ್ಯವನ್ನು ಕೇಳುವ ಸೌಭಾಗ್ಯಕ್ಕಾಗಿ ನಿಮಗೆ ಕೃತಜ್ಞತೆ ಸಲ್ಲಿಸುತ್ತೇನೆ. ವಾಕ್ಯವನ್ನು ಆಲಿಸಿ ವಿಶ್ವಾಸವಿಡುವವರಲ್ಲಿ ನಾನೂ ಒಬ್ಬನಾಗಿ ಎಣಿಸಲ್ಪಡುವಂತೆ, ಪೂರ್ಣ ಹೃದಯದಿಂದ ನಿಮಗೆ ಸ್ಪಂದಿಸಲು ನನಗೆ ಸಹಾಯಮಾಡಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.
ಸಾಮಾನ್ಯ ಕಾಲಕ್ಕಾಗಿ ಪವಿತ್ರ ಗ್ರಂಥದ ಧ್ಯಾನಗಳು
ಇಂದಿನ ಸಂತರು – ಸಂತ ಹೆನ್ರಿ
ಮೇಲೆ ತೋರಿಸಿರುವ ಚಿತ್ರ: ನ್ಯಾಯತೀರ್ಪಿನ ದಿನ — flickr ಮೂಲಕ
