ಹಿಂಜರಿಕೆ

ಸೆಪ್ಟೆಂಬರ್ 28, 2022
ಸಾಮಾನ್ಯ ಕಾಲದ ಇಪ್ಪತ್ತಾರನೇ ವಾರದ ಬುಧವಾರ
ಇಂದಿನ ವಾಚನಗಳು

ಸಂತ ವೆನ್ಸೆಸ್ಲಾಸ್, ರಕ್ತಸಾಕ್ಷಿ—ಐಚ್ಛಿಕ ಸ್ಮರಣೆ

ಸಂತ ಲಾರೆನ್ಸ್ ರೂಯಿಜ್ ಮತ್ತು ಸಂಗಡಿಗರು, ರಕ್ತಸಾಕ್ಷಿಗಳು—ಐಚ್ಛಿಕ ಸ್ಮರಣೆ

ವೀಡಿಯೊ

ಮತ್ತೊಬ್ಬನು, “ಪ್ರಭುವೇ, ನಾನು ನಿಮ್ಮನ್ನು ಹಿಂಬಾಲಿಸುತ್ತೇನೆ. ಆದರೆ ಮೊದಲು ಮನೆಯಲ್ಲಿರುವ ನನ್ನ ಕುಟುಂಬದವರಿಗೆ ವಿದಾಯ ಹೇಳಲು ನನಗೆ ಅವಕಾಶ ಕೊಡಿ” ಎಂದನು. ಯೇಸು ಅವನಿಗೆ, “ನೇಗಿಲಿಗೆ ಕೈಹಾಕಿ ಹಿಂದೆ ಬಿಟ್ಟದ್ದನ್ನು ತಿರುಗಿ ನೋಡುವವನು ದೇವರ ರಾಜ್ಯಕ್ಕೆ ಯೋಗ್ಯನಲ್ಲ” ಎಂದು ಉತ್ತರಿಸಿದರು.  ಲೂಕ 9:61-62

ಯೇಸುವಿನ ಕರೆಯು ಸಂಪೂರ್ಣ ಸಮರ್ಪಣೆಯನ್ನು ಬೇಡುತ್ತದೆ.  ಅವರು ನಮ್ಮನ್ನು ಕರೆದಾಗ, ನಾವು ನಮ್ಮ ಚಿತ್ತವನ್ನು ಸಂಪೂರ್ಣವಾಗಿ ಸಮರ್ಪಿಸಿ, ಅತ್ಯಂತ ಉದಾರ ಮನಸ್ಸಿನಿಂದ ಸ್ಪಂದಿಸಬೇಕು. 

ಮೇಲಿನ ಪವಿತ್ರ ಗ್ರಂಥದ ವಾಕ್ಯದಲ್ಲಿ, ಆ ವ್ಯಕ್ತಿಯು ತಕ್ಷಣವೇ ಮತ್ತು ಸಂಪೂರ್ಣವಾಗಿ ಯೇಸುವನ್ನು ಹಿಂಬಾಲಿಸಬೇಕೆಂಬುದು ದೇವರ ಚಿತ್ತವಾಗಿತ್ತು.  ಆದರೆ ಆ ವ್ಯಕ್ತಿಯು ಮೊದಲು ಹೋಗಿ ತನ್ನ ಕುಟುಂಬದವರಿಗೆ ವಿದಾಯ ಹೇಳಬೇಕೆಂದು ಹೇಳುತ್ತಾ ಹಿಂಜರಿಯುತ್ತಾನೆ.  ಅದು ಸಮಂಜಸವಾದ ವಿನಂತಿಯಂತೆ ತೋರುತ್ತದೆ.  ಆದರೆ ತಕ್ಷಣವೇ ಮತ್ತು ಹಿಂಜರಿಕೆಯಿಲ್ಲದೆ ತಮ್ಮನ್ನು ಹಿಂಬಾಲಿಸಲು ಅವನಿಗೆ ಕರೆ ನೀಡಲಾಗಿದೆ ಎಂದು ಯೇಸು ಸ್ಪಷ್ಟಪಡಿಸುತ್ತಾರೆ.

ತನ್ನ ಕುಟುಂಬದವರಿಗೆ ವಿದಾಯ ಹೇಳಲು ಬಯಸುವುದರಲ್ಲಿ ಏನಾದರೂ ತಪ್ಪಿದೆ ಎಂದಲ್ಲ.  ಕುಟುಂಬದವರೂ ಬಹುಶಃ ಅದನ್ನೇ ನಿರೀಕ್ಷಿಸುತ್ತಾರೆ.  ಆದರೆ ಯೇಸು ನಮಗೆ ಒಂದು ವಿಷಯವನ್ನು ತೋರಿಸಲು ಈ ಅವಕಾಶವನ್ನು ಬಳಸಿಕೊಳ್ಳುತ್ತಾರೆ: ಅವರು ಕರೆದಾಗ, ಅವರು ಕರೆಯುವ ರೀತಿಯಲ್ಲಿ, ಮತ್ತು ಅವರು ಕರೆಯುತ್ತಾರೆ ಎಂಬ ಕಾರಣಕ್ಕಾಗಿಯೇ ಅವರ ಕರೆಗೆ ಸ್ಪಂದಿಸುವುದು ನಮ್ಮ ಮೊದಲ ಆದ್ಯತೆಯಾಗಿರಬೇಕು.  ಕ್ರಿಸ್ತನನ್ನು ಹಿಂಬಾಲಿಸುವ ಈ ಅದ್ಭುತವಾದ, ಅಷ್ಟೇ ಅಲ್ಲ ನಿಗೂಢವಾದ ಕರೆಗೆ ಹಿಂಜರಿಕೆಯಿಲ್ಲದೆ ಸ್ಪಂದಿಸಲು ನಾವು ಸಿದ್ಧರಾಗಿರಬೇಕು.

ಈ ಕಥೆಯಲ್ಲಿರುವ ವ್ಯಕ್ತಿಗಳಲ್ಲಿ ಒಬ್ಬನು ಭಿನ್ನವಾಗಿದ್ದಿದ್ದರೆ ಹೇಗಿರುತ್ತಿತ್ತು ಎಂದು ಕಲ್ಪಿಸಿಕೊಳ್ಳಿ.  ಅವರಲ್ಲಿ ಒಬ್ಬನು ಯೇಸುವಿನ ಬಳಿಗೆ ಬಂದು, “ಪ್ರಭುವೇ, ನಾನು ನಿಮ್ಮನ್ನು ಹಿಂಬಾಲಿಸುತ್ತೇನೆ. ಯಾವುದೇ ಷರತ್ತಿಲ್ಲದೆ ಈಗಲೇ ನಿಮ್ಮನ್ನು ಹಿಂಬಾಲಿಸಲು ನಾನು ಸಿದ್ಧನಾಗಿದ್ದೇನೆ ಮತ್ತು ಮನಸ್ಸುಳ್ಳವನಾಗಿದ್ದೇನೆ” ಎಂದು ಹೇಳಿದ್ದರೆ ಹೇಗಿರುತ್ತಿತ್ತು ಎಂದು ಕಲ್ಪಿಸಿಕೊಳ್ಳಿ.  ಅದೇ ಆದರ್ಶ.  ಹೌದು, ಈ ಆಲೋಚನೆಯು ನಿಜಕ್ಕೂ ಆಮೂಲಾಗ್ರವಾದದ್ದು.

ನಮ್ಮ ಸ್ವಂತ ಜೀವನದಲ್ಲಿ, ಅಕ್ಷರಶಃ ಎಲ್ಲವನ್ನೂ ತಕ್ಷಣವೇ ಬಿಟ್ಟು, ಯಾವುದಾದರೂ ಹೊಸ ಜೀವನ ವಿಧಾನದಲ್ಲಿ ಕ್ರಿಸ್ತನ ಸೇವೆಗೆ ಹೋಗಬೇಕೆಂಬ ಆಮೂಲಾಗ್ರ ಕರೆ ನಮಗೆ ಬಹುಶಃ ಬರುವುದಿಲ್ಲ.  ಆದರೆ ಮುಖ್ಯವಾದದ್ದು ನಮ್ಮ ಮನಃಸಿದ್ಧತೆ!  ನೀವು ಸಿದ್ಧರಿದ್ದೀರಾ?

ನೀವು ಸಿದ್ಧರಿದ್ದರೆ, ಯೇಸು ತಮ್ಮ ಧ್ಯೇಯಕಾರ್ಯವನ್ನು ನೆರವೇರಿಸಲು ಪ್ರತಿದಿನ ನಿಮ್ಮನ್ನು ಕರೆಯುತ್ತಿದ್ದಾರೆ ಎಂಬುದನ್ನು ಕಂಡುಕೊಳ್ಳಲು ಪ್ರಾರಂಭಿಸುವಿರಿ.  ನೀವು ಸಿದ್ಧರಿದ್ದರೆ, ಅವರ ಧ್ಯೇಯಕಾರ್ಯವು ಅಳತೆಗೆ ಮೀರಿದ ಮಹಿಮೆಯುಳ್ಳದ್ದೂ ಫಲಪ್ರದವೂ ಆಗಿದೆ ಎಂಬುದನ್ನು ಪ್ರತಿದಿನ ಕಾಣುವಿರಿ.  ಅಂತಿಮವಾಗಿ ಬೇಕಾಗಿರುವುದು ಇಷ್ಟೇ: ಹಿಂಜರಿಕೆಯಿಲ್ಲದೆ, ತಡಮಾಡದೆ ನೀವು “ಹೌದು” ಎಂದು ಹೇಳುವುದು.

ಯೇಸುವನ್ನು ಹಿಂಬಾಲಿಸಲು ನಿಮಗಿರುವ ಮನಃಸಿದ್ಧತೆಯ ಬಗ್ಗೆ ಇಂದು ಚಿಂತಿಸಿ.  ಪವಿತ್ರ ಗ್ರಂಥದ ಈ ಘಟನೆಯಲ್ಲಿ ನಿಮ್ಮನ್ನು ಇರಿಸಿಕೊಂಡು, ನೀವು ಯೇಸುವಿಗೆ ಹೇಗೆ ಸ್ಪಂದಿಸುತ್ತಿದ್ದಿರಿ ಎಂಬುದನ್ನು ಚಿಂತಿಸಿ.  ಬಹುಶಃ ನಿಮ್ಮಲ್ಲಿ ಹಿಂಜರಿಕೆ ಕಾಣಿಸಬಹುದು.  ನಿಮ್ಮ ಹೃದಯದಲ್ಲಿ ಹಿಂಜರಿಕೆ ಕಂಡುಬಂದರೆ, ಅದನ್ನು ಪ್ರಭುವಿಗೆ ಸಮರ್ಪಿಸಲು ಪ್ರಯತ್ನಿಸಿ. ಆಗ ನಮ್ಮ ಪ್ರಭು ನಿಮಗಾಗಿ ಉದ್ದೇಶಿಸಿರುವ ಎಲ್ಲದಕ್ಕೂ ನೀವು ಸಿದ್ಧರಾಗಿರುವಿರಿ.

ಪ್ರಭುವೇ, ನಾನು ನಿಜವಾಗಿಯೂ ನಿಮ್ಮನ್ನು ಪ್ರೀತಿಸುತ್ತೇನೆ ಮತ್ತು ನಿಮ್ಮನ್ನು ಹಿಂಬಾಲಿಸಲು ನಿಜವಾಗಿಯೂ ಬಯಸುತ್ತೇನೆ.  ನಿಮ್ಮ ಪವಿತ್ರ ಚಿತ್ತಕ್ಕೆ “ಹೌದು” ಎಂದು ಹೇಳುವಲ್ಲಿ ನನ್ನ ಜೀವನದಲ್ಲಿರುವ ಪ್ರತಿಯೊಂದು ಹಿಂಜರಿಕೆಯನ್ನೂ ಜಯಿಸಲು ನನಗೆ ಸಹಾಯ ಮಾಡಿ.  ಪ್ರತಿದಿನ ನಿಮ್ಮ ಧ್ವನಿಯನ್ನು ವಿವೇಚಿಸಿ ಗುರುತಿಸಲು ಮತ್ತು ನೀವು ಹೇಳುವ ಎಲ್ಲವನ್ನೂ ಸ್ವೀಕರಿಸಲು ನನಗೆ ಸಹಾಯ ಮಾಡಿ.  ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.

ಏಳನೆಯ ದಿನ: ಲಿಸಿಯುವಿನ ಸಂತ ತೆರೇಸಾ – ಪುಟ್ಟ ಪುಷ್ಪ ಅವರಿಗೆ ನೊವೇನಾ

ಇನ್ನಷ್ಟು ಸುವಾರ್ತಾ ಚಿಂತನೆಗಳು

ದೈವಿಕ ಕರುಣೆಯ ಧ್ಯಾನಗಳು

ಎಲ್ಲ ಸಂತರು/ಹಬ್ಬಗಳು

ಇಂದಿನ ಸಂತರು –

ಸಂತ ವೆನ್ಸೆಸ್ಲಾಸ್, ರಕ್ತಸಾಕ್ಷಿ

ಸಂತ ಲಾರೆನ್ಸ್ ರೂಯಿಸ್ ಮತ್ತು ಸಂಗಡಿಗರು, ರಕ್ತಸಾಕ್ಷಿಗಳು

ದಿವ್ಯಬಲಿಯ ವಾಚನಗಳ ಆಯ್ಕೆಗಳು

ವೈಶಿಷ್ಟ್ಯಚಿತ್ರ: ಜೇಮ್ಸ್ ಟಿಸ್ಸೋ ಅವರ ‘ನೇಗಿಲು ಹಿಡಿದ ಮನುಷ್ಯ’, ವಿಕಿಮೀಡಿಯಾ ಕಾಮನ್ಸ್ ಮೂಲಕ