നമുക്കു ചുറ്റുമുള്ള തിന്മ

2019 ജൂലൈ 27, ശനിയാഴ്ച

ആണ്ടുവട്ടത്തിലെ പതിനാറാം ആഴ്ചയിലെ ശനിയാഴ്ച

ഇന്നത്തെ വായനകൾ

ഇന്നത്തെ എല്ലാ വിശുദ്ധരും

“കൊയ്ത്തുവരെ അവ രണ്ടും ഒരുമിച്ചു വളരട്ടെ; കൊയ്ത്തുകാലത്ത് ഞാൻ കൊയ്ത്തുകാരോടു പറയും: ‘ആദ്യം കളകൾ ശേഖരിച്ച് കത്തിക്കാനായി കെട്ടുകളാക്കുവിൻ; ഗോതമ്പാകട്ടെ എന്റെ കളപ്പുരയിൽ ശേഖരിക്കുവിൻ.’”  മത്തായി 13:30

വിശ്വാസത്തിന്റെ കണ്ണുകളുള്ളവർക്ക് നമുക്കു ചുറ്റുമുള്ള തിന്മ വ്യക്തമായി കാണാൻ കഴിയണം. വിശുദ്ധ ലിഖിതങ്ങളിലൂടെയും സഭയിലൂടെയും നമ്മുടെ കർത്താവ് നമുക്കു വെളിപ്പെടുത്തിയിട്ടുള്ളതെല്ലാം ലോകത്തിന്റെ വിവിധ മൂല്യങ്ങളോടും അഭിപ്രായങ്ങളോടും താരതമ്യം ചെയ്തുനോക്കുകയേ വേണ്ടൂ. അങ്ങനെ ചെയ്യുമ്പോൾ, അവ തമ്മിലുള്ള കടുത്ത വൈരുധ്യം നമ്മെ അമ്പരപ്പിക്കും.

ഈ ഉപമയിലെ ദൃശ്യം ഉപയോഗിച്ചു പറഞ്ഞാൽ, തന്റെ ഗോതമ്പുകൃഷി നോക്കാൻ പോകുന്ന കർഷകനെപ്പോലെയായിരിക്കും അത്. അങ്ങനെ നോക്കുമ്പോൾ, ഗോതമ്പിനിടയിൽ ഇടകലർന്നു വളരുന്ന കളകൾ അയാൾ കാണുന്നു. രണ്ടും ഒരുമിച്ചു വളരുന്നതു കാണുന്നുണ്ടെങ്കിലും, ഗോതമ്പുകൂടി പിഴുതുകളയാതെ കളകൾ നീക്കം ചെയ്യാൻ കഴിയില്ലെന്ന കാര്യവും അയാൾക്കറിയാം. അതിനാൽ, കളകളുടെ വളർച്ചയെക്കുറിച്ച് ആകുലപ്പെടുന്നതിനുപകരം, ഗോതമ്പ് നന്മയ്ക്കായി കൊയ്തെടുക്കുകയും കളകൾ ഒരുമിച്ചുകൂട്ടി കത്തിച്ചുകളയുകയും ചെയ്യുന്ന കൊയ്ത്തുകാലത്തിലേക്ക് അയാൾ ദൃഷ്ടി പതിപ്പിക്കുന്നു.

നമ്മുടെ ജീവിതത്തിലും അങ്ങനെതന്നെയായിരിക്കണം. നമ്മുടെ ലോകത്തിലെ തിന്മയിൽത്തന്നെ ശ്രദ്ധ കേന്ദ്രീകരിച്ചാൽ, നിരാശയിലേക്കു വഴുതിവീഴാനുള്ള പ്രലോഭനം എളുപ്പത്തിൽ നമുക്കുണ്ടാകും. നാം അതിനെ അവഗണിക്കരുത്; എന്നാൽ അതിനെക്കുറിച്ച് അമിതമായി ആകുലപ്പെടുകയുമരുത്. കർഷകനെപ്പോലെ നാമും “കൊയ്ത്തുകാലത്തിലേക്ക്” ദൃഷ്ടി പതിപ്പിച്ചാൽ മാത്രമേ ഇതു സാധ്യമാകൂ. ദൈവം എല്ലാ അനീതികളും പരിഹരിക്കുകയും നല്ലതിനെ ചീത്തയിൽനിന്നു വേർതിരിക്കുകയും ചെയ്യുന്ന ദൈവികനീതിയുടെ നിമിഷമാണ് നാം പ്രതീക്ഷിക്കുന്ന മഹത്തായ കൊയ്ത്ത്. ഇവിടെയും ഇപ്പോഴും അതു വ്യക്തമായി കാണാനാകുന്നില്ലെങ്കിലും, ഒടുവിൽ നീതി വിജയിക്കും.

നമ്മുടെ ലോകത്തിലെ തിന്മകൾ ഏതെല്ലാം വിധങ്ങളിൽ നിങ്ങളെ ബാധിക്കുന്നുവെന്ന് ഇന്ന് വിചിന്തനം ചെയ്യുക. ഒരുപക്ഷേ, മാധ്യമങ്ങളിലൂടെ നിരന്തരം ഒഴുകിവരുന്ന ദുഃഖവാർത്തകൾ നിങ്ങളെ തളർത്തുന്നുണ്ടാകാം. അല്ലെങ്കിൽ, ദൈനംദിന ജീവിതത്തിൽ മറ്റുള്ളവരിൽനിന്ന് പലതരം തിന്മകൾ നിങ്ങൾ നേരിടുന്നുണ്ടാകാം. എന്തുതന്നെയായാലും, ദുഷ്ടന്റെ ആക്രമണങ്ങൾ കണ്ട് ഞെട്ടുകയോ വിശ്വാസത്തിൽ ഇടറുകയോ ചെയ്യരുത്. നമ്മുടെ കർത്താവിൽ ദൃഷ്ടി ഉറപ്പിക്കുകയും വരാനിരിക്കുന്ന അവിടുത്തെ ദൈവികനീതിയിൽ പൂർണ്ണമായി വിശ്വസിക്കുകയും ചെയ്യുക.

കർത്താവേ, എല്ലാ കാര്യങ്ങളിലും അങ്ങ് വിശ്വസ്തനായിരിക്കുമെന്ന വാഗ്ദാനത്തിൽ ഞാൻ ആശ്രയിക്കുന്നു.  ഈ ലോകത്തിലെ പലവിധ തിന്മകൾ കാണുകയും അനുഭവിക്കുകയും ചെയ്യുമ്പോൾ, അവയുടെ കെണിയിലോ പ്രലോഭനത്തിലോ ഒരിക്കലും അകപ്പെടാതിരിക്കാൻ എന്നെ സഹായിക്കണമേ.  സംശയത്തിൽനിന്നും നിരാശയിൽനിന്നും എന്നെ മോചിപ്പിച്ച്, നീതിയും കരുണയും സംബന്ധിച്ച അങ്ങയുടെ വാഗ്ദാനത്തിൽ എനിക്കു പൂർണമായ പ്രത്യാശ നൽകണമേ.  ഈശോയെ, ഞാൻ അങ്ങയിൽ ശരണപ്പെടുന്നു.

കൂടുതൽ സുവിശേഷ വിചിന്തനങ്ങൾ

ദൈവകരുണയെക്കുറിച്ചുള്ള വിചിന്തനങ്ങൾ