ഓരോ ചുവടായി

ഫെബ്രുവരി 19, 2020
ആണ്ടുവട്ടത്തിലെ ആറാം ആഴ്ചയിലെ ബുധനാഴ്ച
ഇന്നത്തെ വായനകൾ

യേശു അന്ധന്റെ കൈപിടിച്ച് അവനെ ഗ്രാമത്തിനു പുറത്തേക്കു കൊണ്ടുപോയി. അവന്റെ കണ്ണുകളിൽ തുപ്പൽ പുരട്ടി, അവന്റെമേൽ കൈകൾ വച്ച് ചോദിച്ചു: “നീ എന്തെങ്കിലും കാണുന്നുണ്ടോ?” അവൻ നോക്കിയിട്ട് പറഞ്ഞു: “മരങ്ങളെപ്പോലെ തോന്നിക്കുന്ന മനുഷ്യർ നടക്കുന്നത് ഞാൻ കാണുന്നു.” പിന്നെ യേശു രണ്ടാമതും അവന്റെ കണ്ണുകളിൽ കൈകൾ വച്ചു. അപ്പോൾ അവൻ വ്യക്തമായി കണ്ടു; അവന്റെ കാഴ്ച തിരിച്ചുകിട്ടി, എല്ലാം തെളിഞ്ഞു കാണാൻ അവനു കഴിഞ്ഞു. മർക്കോസ് 8:23-25

ഒരു കാരണത്താൽ ഈ സംഭവം ഏറെ സവിശേഷമാണ്. യേശു ആദ്യമായി ആ അന്ധനെ സുഖപ്പെടുത്താൻ ശ്രമിച്ചപ്പോൾ രോഗശാന്തി പകുതി മാത്രമേ ഫലമണിഞ്ഞുള്ളൂ എന്നതാണ് അതിന്റെ സവിശേഷത. അവന്റെ അന്ധത മാറ്റാനുള്ള യേശുവിന്റെ ആദ്യ ശ്രമത്തിനുശേഷം അവനു കാണാൻ കഴിഞ്ഞു. എന്നാൽ അവൻ കണ്ടത് “മരങ്ങളെപ്പോലെ തോന്നിക്കുന്ന മനുഷ്യർ നടക്കുന്നതാണ്.” അവൻ പൂർണ്ണമായി സുഖം പ്രാപിക്കാൻ യേശു രണ്ടാമതും അവന്റെ കണ്ണുകളിൽ കൈകൾ വയ്‌ക്കേണ്ടിവന്നു. എന്തുകൊണ്ടാണ് അങ്ങനെ?

സുവിശേഷങ്ങളിലുടനീളം, യേശു ആരെയെങ്കിലും സുഖപ്പെടുത്തുമ്പോൾ, അത് അവർ പുലർത്തുകയും പ്രകടിപ്പിക്കുകയും ചെയ്യുന്ന വിശ്വാസത്തിന്റെ ഫലമായിട്ടാണെന്ന് നാം സ്ഥിരമായി കാണുന്നു. വിശ്വാസമില്ലാത്ത ഒരാളെ സുഖപ്പെടുത്താൻ യേശുവിന് കഴിയില്ല എന്നല്ല; മറിച്ച്, ഇങ്ങനെ ചെയ്യാൻ അവിടുന്ന് തിരഞ്ഞെടുത്തു എന്നതാണ്. അവിടുന്ന് രോഗശാന്തിക്ക് ഉപാധിയാക്കിയത് പൂർണ്ണമായ വിശ്വാസത്തെയാണ്.

ഈ അത്ഭുതസംഭവത്തിൽ, അന്ധന് കുറച്ചു വിശ്വാസമുണ്ടെങ്കിലും അത് അധികമില്ലെന്നു തോന്നുന്നു. അതിനാൽ, ഏറെ അർത്ഥവത്തായ ഒരു കാര്യം യേശു ചെയ്യുന്നു. അവന്റെ വിശ്വാസക്കുറവ് വ്യക്തമാക്കാൻ, ഭാഗികമായി മാത്രം സുഖം പ്രാപിക്കാൻ അവിടുന്ന് അവനെ അനുവദിക്കുന്നു. എന്നാൽ അൽപ്പമായ വിശ്വാസം കൂടുതൽ വിശ്വാസത്തിലേക്കു നയിക്കുമെന്നും അവിടുന്ന് നമുക്കു വെളിപ്പെടുത്തുന്നു. അൽപ്പമെങ്കിലും കാണാൻ കഴിഞ്ഞപ്പോൾ, ആ മനുഷ്യൻ കുറച്ചുകൂടി വിശ്വസിക്കാൻ തുടങ്ങിയെന്ന് വ്യക്തമാണ്. അവന്റെ വിശ്വാസം വളർന്നപ്പോൾ, യേശു വീണ്ടും അവന്റെമേൽ കൈകൾ വച്ച് അവന്റെ രോഗശാന്തി പൂർണ്ണമാക്കി.

നമുക്ക് എത്ര നല്ലൊരു ദൃഷ്ടാന്തമാണിത്! ചിലർക്ക് എല്ലാ കാര്യങ്ങളിലും ദൈവത്തിൽ പൂർണ്ണമായ വിശ്വാസമുണ്ടായിരിക്കാം. നിങ്ങൾ അങ്ങനെയുള്ള ഒരാളാണെങ്കിൽ, നിങ്ങൾ തീർച്ചയായും അനുഗൃഹീതരാണ്. എന്നാൽ വിശ്വാസമുണ്ടായിട്ടും പോരാടുന്നവർക്കുവേണ്ടിയാണ് ഈ വചനഭാഗം പ്രത്യേകിച്ചും നൽകിയിരിക്കുന്നത്. ഈ വിഭാഗത്തിൽപ്പെടുന്നവർക്ക് യേശു വലിയ പ്രത്യാശ നൽകുന്നു. തുടർച്ചയായി രണ്ടുതവണ ആ മനുഷ്യനെ സുഖപ്പെടുത്തിയ പ്രവൃത്തി നമ്മോടു പറയുന്നത്, യേശു ക്ഷമയുള്ളവനും കരുണയുള്ളവനുമാണെന്നും, നമുക്കുള്ള അൽപ്പവും നാം സമർപ്പിക്കുന്ന അൽപ്പവും സ്വീകരിച്ച് അവിടുന്ന് കഴിയുന്നത്ര നന്നായി ഉപയോഗിക്കുമെന്നുമാണ്. ദൈവത്തോട് ഒരു ചുവടുകൂടി അടുക്കാനും വിശ്വാസത്തിൽ വളരാനും നമുക്കു കഴിയേണ്ടതിന്, നമ്മുടെ അൽപ്പവിശ്വാസത്തെ രൂപാന്തരപ്പെടുത്താൻ അവിടുന്ന് പ്രവർത്തിക്കും.

പാപത്തെക്കുറിച്ചും ഇതുതന്നെ പറയാം. ചിലപ്പോൾ പാപത്തെക്കുറിച്ച് നമുക്ക് അപൂർണ്ണമായ മനസ്താപമേ ഉണ്ടാകൂ. മറ്റു ചിലപ്പോൾ, നാം ചെയ്യുന്നത് തെറ്റാണെന്ന് അറിഞ്ഞിട്ടും പാപം ചെയ്യുകയും അതിനെക്കുറിച്ച് ഒട്ടും മനസ്താപമില്ലാതിരിക്കുകയും ചെയ്യുന്നു. നിങ്ങളുടെ അവസ്ഥ ഇതാണെങ്കിൽ, പാപമോചനം നൽകുന്ന സൗഖ്യത്തിലേക്ക് ഒരു ചെറിയ ചുവടെങ്കിലും മുന്നോട്ടുവയ്ക്കാൻ ശ്രമിക്കുക. മനസ്തപിക്കാനുള്ള ആഗ്രഹത്തിൽ വളരണമെന്നെങ്കിലും ആഗ്രഹിക്കാൻ ശ്രമിക്കുക. അത് ഏറ്റവും കുറഞ്ഞ കാര്യമാകാം; എങ്കിലും അതിലൂടെ യേശു പ്രവർത്തിക്കും.

ഇന്ന് ഈ അന്ധനെക്കുറിച്ചു ധ്യാനിക്കുക. അവൻ കടന്നുപോകുന്ന ഈ രണ്ടു ഘട്ടങ്ങളിലുള്ള രോഗശാന്തിയെയും രണ്ടു ഘട്ടങ്ങളിലുള്ള മാനസാന്തരത്തെയും കുറിച്ച് ആലോചിക്കുക. ഈ മനുഷ്യൻ നിങ്ങൾ തന്നെയാണെന്നും, വിശ്വാസത്തിലും പാപത്തെക്കുറിച്ചുള്ള അനുതാപത്തിലും നിങ്ങളെ ഒരു ചുവടുകൂടി മുന്നോട്ടു നയിക്കാൻ യേശു ആഗ്രഹിക്കുന്നുവെന്നും മനസ്സിലാക്കുക.

കർത്താവേ, എന്നോടു കാണിക്കുന്ന വിസ്മയകരമായ ക്ഷമയ്ക്ക് ഞാൻ അങ്ങേക്കു നന്ദി പറയുന്നു. അങ്ങയിലുള്ള എന്റെ വിശ്വാസം ദുർബലമാണെന്നും അത് വളരേണ്ടതുണ്ടെന്നും എനിക്കറിയാം. എന്റെ പാപങ്ങളെക്കുറിച്ചുള്ള മനസ്താപവും വർധിക്കണമെന്ന് എനിക്കറിയാം. എനിക്കുള്ള അൽപ്പവിശ്വാസവും എന്റെ പാപങ്ങളെക്കുറിച്ചുള്ള അൽപ്പമായ മനസ്താപവും സ്വീകരിച്ച്, അവയിലൂടെ എന്നെ അങ്ങയിലേക്കും അങ്ങയുടെ കരുണയുള്ള ഹൃദയത്തിലേക്കും ഒരു ചുവടുകൂടി അടുപ്പിക്കണമേ. യേശുവേ, ഞാൻ അങ്ങയിൽ ശരണപ്പെടുന്നു.

കൂടുതൽ സുവിശേഷ വിചിന്തനങ്ങൾ

ദൈവകരുണയെക്കുറിച്ചുള്ള വിചിന്തനങ്ങൾ

ഇന്നത്തെ വിശുദ്ധർ/തിരുനാളുകൾ

നോമ്പുകാലത്തിനായി മൂന്നു മികച്ച പുസ്തകങ്ങൾ
ഓൺലൈനിൽ സൗജന്യമായി വായിക്കാം. ഇ-പുസ്തകമായും & പേപ്പർബാക്ക് പതിപ്പായും ലഭ്യമാണ്.